San Mateo 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Lëë Jesús bislo xso cuent stub, xñee xaa:

²—Nak laañee xñabey Dios sinak tu rey nii beeñ tu lni worñee ptsiilña xiñgan xaa.

³Aan lëë xaa pxaal xmos xaa sitsyetsy meñ nii tsi lo lni, per kwnëdy meñ go nyi.

⁴Lëë rey go pxaal xmos stub, chëb xaa: “Kol këb lo meñ nii lëën tse beeñlo xixkwanaa, ni kol këb nii lëën tse lox bety xyosyaa nii xro. Kol këb lo meñ kiid meñ lo lni.”

⁵Per psaldy meñ nii koktsyetsy xmos rey. No meñ nii koktsyetsy si tañ, no gaa meñ go si lo xtsiiñ,

⁶ni no meñ nii ptee xcheñ xmos rey, axte nii beety xaa xaa.

⁷Por ngo nii blëë rey, aan lëë xaa pxaal xsoldad xaa kukyeety kchë meñ nii psaksi xmos xaa ni psaay soldad xkyedzy meñ go.

⁸Loxsye ngo lëë rey chëb lo xmos: “Lëë nii ktyaaw lo lni nagon lox koklo, per kwnëdy meñ nii koktsyetsy nyiid.

⁹Na kol tsi nëz aan kol këb kchë lo meñ nii ktsyool do nii kiid meñ lo xkyalwtsiilña xiñaa.”

¹⁰Lëë xmos rey pchoo kwey nëz, aan lëë xaa ptop meñ. Nikxe meñ bueno, nikxe gaa malo, kchëlo meñ kuni xaa aan lëë lidzy rey byaktsë.

¹¹’Tsiñee lëë rey kwsëëb leñ yu laañee nche sob meñ nii ptsiñni xmos xaa, lëë xaa kon tu xaa nii nakwty ladx nii chakw meñ nii chi lo tu kyalwtsiilña.

¹²Lëë rey chëb lo xaa: “¿Penak nii sëëdoo aan nakwtyoo ladx nii chakw meñ nii chi kyalwtsiilña?” Per ni tu pe chëbty xaa go.

¹³Tsigo lëë rey chëb lo xaa nii xkiisy niskwaan: “Kol kxituu niy xaa re ni ña xaa, aan kol tsikchon xaa lo nguey. Siko koon xaa ni kaw lay xaa.”

¹⁴Loxsye bitiits Jesús ngo, lëë xaa chëb: —Ndaly meñ xkwetsy Dios, per xisy meñ sëëb laañee xñabey xaa.

¹⁵Lëë xaa fariseo xyub dyon pe cos jkëëkiy xaa Jesús.

¹⁶Por ngo lëë xaa pxaal bla xaa nii no xlad xaa ksa bla xaa nii nak ksa Herodes kukëb lo Jesús: —Maestre, ndon noo nii nonsyke tiitsli xñeel. Xsaldyoo nii xñee meñ ni xseedyoo xa chak meñ. Liisy xluuyoo xa kpañ meñ sinak xñabey Dios.

¹⁷Kwnë dyon pe nonguial tizh noo tumi nii xtop xtisy Roma ote nonguialdyo yak.

¹⁸Per como nan Jesús pe cos tsiiñ si xaa, lëë Jesús chëb: —¿Penak nii chakladzy to kuñ do naa preb?

¹⁹Kol kluuy tu pes lon dyon. Tsigo lëë xaa go kuni tu pes lo Jesús.

²⁰Aan lëë Jesús kwnabtiits: —¿Cho nak xaa nii kë loo go?

²¹Tsigo lëë xaa go chëb: —Lëë xaa nak xtisy Roma. Lëë Jesús chëb: —Kol kizh nii nsëëb to lo xtisy Roma tsigo busy, ni kol kizh nii nsëëb to lo Dios.

²²Tsiñee biñ xaa go nii chëb Jesús, ntseeb psee xaa, aan so gak Jesús, lëë xaa sey.

²³Misme tse go lëë bla xaa saduceo kwey lo Jesús. Lëë xaa saduceo xñee nii kpañdy meñ kuty. Por ngo lëë xaa kukëb lo Jesús:

²⁴—Maestre, lëë Moisés gon chëb nii deelñee ktsiilña tu xaapkiy aan klyëëdy kety xaa, no nii ktsiilña betsy xaa kwnaa viud nii psaan xaa deelñee chapty me mëëd, parñee kap tsiil betsy xaa nii kuty mëëd.

²⁵Lady noo kwyo tu xaa nii kop xoop betsy, aan lëë xaa ptsiilña. Per blyëëdy lëë xaa kuty, aan como kopty tsiil xaa mëëd, lëë tu betsy xaa byaani tsiil xaa,

²⁶aan lëë xaa kutyak. Singo gak ptsyool stu betsy xaa. Ksa kadzy xaa ptsiilña me, per ni tu xaa psaandy mëëd.

²⁷Lëë byalo wi kwnaa go kuty.

²⁸Kwnë na dyon cho xaa kyaani kwnaa go tsiñee lëë xaa kpañ, deelñee ksa kadzy xaa ptsiilña me.

²⁹Tsigo lëë Jesús chëb: —Nandy to pe xñee do, porñee xyeñdy to xtiits Dios ni xnilasty to nii lëë Dios kuuñ kpañ meñ kuty.

³⁰Per nli xñen nii tsiñee lëë meñ kuty kpañ, ni mguiy ni kwnaa gaa ktsiilñadre, sink lëë kchë meñ nii kpañ kak sinak angly nii ncheno leñ kpaa.

³¹Chakladzy to lë kaknan do dyon pe nli spañ meñ kuty. ¿Pe karty nayak klab to laañee xñee nii yuub Dios chëb nii lëë xaa

³²nak xDios pxusykoltoo no Abraham, ni pxusykoltoo no Isaac ni pxusykoltoo no Jacob? Aan Dios gon nakty xaa xDios meñ kuty, sink xDios meñ nii mbañ nak xaa.

³³Tsiñee biñ meñ kchë nii kwnee Jesús, ntseeb psee meñ.

³⁴Lëë xaa fariseo ptyop tsiñee biñ xaa nii lëë Jesús psuugw chuw xaa saduceo.

³⁵Aan lëë tu xaa fariseo nii nak maestre ley kokladzy nyuñ Jesús preb. Por ngo lëë xaa chëb lo Jesús:

³⁶—Maestre, ¿cho nii xñabey Dios dyon kuuñtsyey meñ mastre non?

³⁷Tsigo lëë Jesús chëb: —“Bniladzy Tat Tios tyub styool ni psoob xtiits xaa.”

³⁸Ngo mastre precisy kuuñtsyeyoo.

³⁹Ni precisy nii jkëstyool xcombañeeroo sinak nii xkëstyool lii.

⁴⁰Nrii xñabey xley Moisés ni nrii biid kluuy kchë profet.

⁴¹Lëë xaa fariseo bii nche siko

⁴²tsi lëë Jesús kwnabtiits chëb: —¿Pe në do dyon cho lo xtiiy sëëd Crist? Tsigo lëë xaa fariseo chëb: —Lo xtiiy rey Davito.

⁴³Tsigo lëë Jesús chëb: —¿Penak tsigo nii worñee kwnee David xtiits Kyalbini Ntson, chëb David:

⁴⁴Lëë Dios chëb lo xaa nii xñabey naa: “Kwsob kwin nëzli, axte nii tsitsiñ tse nii kñabeyoo lo kchë meñ nii xlëë lool”?

⁴⁵¿Xa kchoo Crist lo xtiiy rey David deelñee misme rey David xñee nii lëë Crist xñabey lo xaa?

⁴⁶Per ni tu cho kwëbty lo xtiits Jesús, aan destye tse go ni tu cho byaxtre nyabtiits lo xaa.