1Nehn en Jesus apel nah sohnpadahkkok koaroannoang Jerusalem, irai lel Bethphage pohn Nahna Olip. Jesus kadarla sohnpadahk roahmen mijarai
2pwehng ara “Kamwa alwe nehn kahnihmw en mijoahn, kamwa pirin kapangda ejel men pirapirdi, pwilihki nah pwinihk siksik men mine ipoa; Kamwa lapwadda ara ukdo ipoai.
3A ma emen idoakkoang kamwa mehkij, kamwa pwehng ih pwa, ‘Koaunno anahne ara,’ nehn anjoauwohr in nen mweidoahng kamwa.”
4Mehpwiak wiawi pwa en pwoaida da ma johkohppo pwa:
5“Pwehng kahnihmw Zion, Kapang, oamw nahmwarki allalu indoa ipoamw! In aksiksik, mine pohn ejel lihmen. Mine pohn nihn ejel pwinihk pwulopwul men.”
6Sohnpadahkkok ken inla wiahda me ohroj ma Jesus pwehng ara.
7Ara ukdo ejello apel nah pwinihkko, kihdihoang ara likkoauwok pohra; Jesus doauda mwindi puwoa.
8A pokonno koalik oau piroakihdi arai likkoauwok nehn allo, a epwi pel poaloahdi rahn suhkoa piroakihoang nehn allo.
9Pokonno ma alu mijen Jesus apel ihr ma alu mwerin, sapkihda ahr koaul rahrahuki, “Kapnga oang ih ma kijehn David! Koahs en kapaiahda ih ma indoa in oadoan Koaunno! Kapnga oang Koawoa!”
10Nehn en Jesus dilda nehn Jerusalem, Kahnihmmwo pwon mwoakidkihda ah dilda. “Inje woal mene?” irai idoak.
11A pokonno kin japoang irai, “Ih ioar Johkohp Jesus, jang Nazareth wein Galilee.”
12Jesus inla dilda nehn Umw Joarwiho, kajroahjang loaloa irai ohroj ma noaski apel dopdop koapwoa. Ih ukuddi en john kawiliali mwanihok arai sehpillok apel koauwehla dohn noaski mwureiok.
13Ih pwehng irai, “Ne insingdi nehn Puk Joarwi ma Koahs pwa, ‘Umwoaie pirin adanki umwen kapkap,’ a kamwai no wiahkihla dohn johnpirap!”
14Armaj majkunpwi apel mwoasorpwi indoa ipen Jesus nehn Umw Joarwiho, ih kemwehuwihla irai.
15Jamwrou laplappok apel johnpadahk kan in Kojonneddo lioaskihla irai kapang manman kapwuriamwei pwiai apel rong en jerihok nehn Umw Joarwiho rahrahuki, “Kapnga oang ih ma kijehn kadaudok in David!”
16Irai idoak oang Jesus, “A koawoa rong dahkij jeri pwiai pwahpwahpwa?” “Eh ngoahi rong,” Jesus japoang. “Kamwai kahjikkoar wadek Puk Joarwi? Ma pwa ‘Koawoa no oaloa kaping unjek jang in oawoan jeri kan apel jeri kan ma kin dihdi?’”
17Jesus injang iparai, injang nehn kahnihmmwo inla Bethany, wija ih koammoaldi inpwonngo.
18Inminjoang in rehnno, nehn en Jesus japahllahng in kahnihmmwo, ih mwakohkohda
19a ih kapangda suhkoa pik pas imwin allo. Ih inla pwa ih en kapang ma mine wah, joh wah ih kapang, a pwen soahr doari. Doar ih pwehng suhkoahu, “Koawoa johla pirin pwuroahng uhwa!” Anjoauwohr suhkoahu mengda.
20Sohnpadahkkok kapang me, irai inenin pwuriamweikihla, irai ken idoak, “Imdoahr suhkoa pase kak pispisinnoar mengda?”
21Jesus japoang, “Ngoahi pwehng kamwai in mehlel, ma kamwai kin pwojon johpwa peikajal, kamwai kak wiahda da ma ngoahi wiahng suhkoa pase; a jaudihoar mehr doari, Kamwai pel kak pwehng dolloauwe, ‘Sohjang men, pein peiddihlahng koawoa nehn jeddo,’ a pirin pwoaida.
22Ma kamwai kamehlele, kamwai nen oaloa da ma kamwai poaki nehn amwai kapkap.”
23Nehn en Jesus japahlla nehn Umw Joarwiho, ih pwuroahng sapda padahk, a jamwrou laplappok apel epwi joumajpwi indoa ipoa wiahng peidek pase: “En inje manman ma koawoa wihwiahki joang pwiak? Inje ma kioang koawoa manman oauwe?”
24Jesus japoang irai, “Ngoahi pirin pel idoak oang kamwai peidek oau; ma kamwai japoangla ngoahi, a, ngoahi pirin pwehng kamwai nehn en inje manman ma ngoahi wihwiahki joang pwiak.
25John Johnpoapdaij kihjang ia ah manman in poapdaiji armaj? Jang ipen Koahs ke jang ipen armaj?” Irai sapda akmaipene nehn pwungarai pwahpwahpwa, “Ma kisai japoanngki pwa ‘Jang ipen Koahs,’ ih nen pwehng kisai, ‘A amwda kamwai ke joah kamehlele John?’
26A ma kisai japoanngki pwa, ‘Jang ipen armaj,’ me keperroang kisai, pwa armaj ohroj kin wiahki John johkohp men.”
27Doar irai japoangla Jesus pwa, “Kamai jehjoa.” A Jesus wud japoang irai, “Doar ngoahi pel jehpirin pwehng kamwai jang in en inje manman ma ngoahi wihwiahki mehpwiai.”
28“A da kamwai lemlemehioang karajraj pase? Woalmen mine ma nainki jermwein roahmen, Ih inla ipen jermwein koalikko, ih pwehng, ‘Noai jeri, inla doadoahk nehn mwoaswelin wainno rehnnoauwe.’
29Jermweinno japoang jamahu pwa, ‘Ngoahi kia,’ a mwuhr ih koluhla, ukudla ah lamlam ih inla nehn mwoaswelin wainno.
30Mwahmwahu pel inla ipen jermwein siksikko pwehng joanngohr. Jermwein siksikko japoang jamahu pwa, ‘Eh, ngoahi pirin inla.’ A ih johpwa inla.
31Inje in jermwein roahmenno ma kapwaiahda injenen jamahu?” Irai japoang, “Jermwein koalikko.” Doar Jesus pwehng irai, “Ngoahi pwehng kamwai in mehlel, pwa johnrik daksissok apel Lihn noaski palwoaroaraihok nen dilda nehn Wein Koahs mijen kamwai.
32Pwa John Johnpoapdaij indoahng kamwai, pwa en kajalehng kamwai alin mourro, kamwai ken joah kamehlele ih, a johnrik daksissok apel lihn noaski palwoaroaraihok kamehlele. A nehn amwai kapang mehpwiak wihwiawi kamwai joahpwa nimen ukudla amwai lamlam, kamehlelehla ih.
33“Kamwai pel rong apkas karajraj: Mine johnmwoaswel men ma anki mwoaswelin wain oau. Ih ken kelihpene, jaripda dohn ungud wain oau loaloa, kouda wijahn iroir oau. Ih kioang armaj en koadoahkoa ih ummwoaisla nehn wai.
34Nehn ah ne lel anjoau in doddol wehn mwoaswelin wainno, ih ken kadarla ah laduhpwi ipen sohndoadoahkkok pwa en oaloa pwoaijoa jang nehn mwoaswello.
35A sohn doadoahk in nehn mwoaswello koldi laduhwok, emen irai pokihjili, a emen irai kojukdi, a emen irai kasoahki sakai.
36Doari woallo ma anki mwoaswello pel pwuroahng kadarla laduhpwi ma dir jang pwihn keiouwo. Sohndoadoahkkok wiahng irai joanngohr.
37Oh mwuhr ih kadarla nah jermweinno iparai, lemleme, ‘Mehlel irai uhdahn pirin woaunki noai jermweinno.’
38A nehn en sohndoadoahk in nehn mwoaswello kapang jermweinno, irai pwahpene nehn pwungarai, ‘Ioar nihn woallo jermweinwa me; koa, kisai kojukdi ih, kisai ken wud japwankihla jappwe!’
39Doari irai jipoardi ih, kerpwihla likin mwoaswello, irai kojukdi ih.”
40Jesus idoak iparai, “Anjoauwo ma woallo ma anki mwoaswello pwurdo, da pwa ih nen wiahng sohn doadoahkkok nehn mwoaswello?”
41A irai japoang, “Ih uhdahn pirin kojukdi armaj nauna pwiak. Ih kioang epwi sohndoadoahk sohrohr nehn ah mwoaswelin wainno, ma uhdahn pirin kioang pwoaijoa anjoau ma koanoahng.”
42Doar Jesus pwehng irai, “Da, kamwai kahjikkoar wadek da ma Puk Joarwi pwa? “‘Sakai ma johnkou umw kan ne kerpwihla, wud wiahla sakain pwukoakoaimw! KOAUNNO ma wiahda me; mehkij ma kapwuriamwei mehlel oang kisai.’
43“Ioar ngoahi pwehngkihoang kamwai, pwa Wein Koahs pirin liklikjang kamwai liklikkoang oau wei ma nen kak kapwarahda wehn Wein Koahs.
44Armaj men ma pirin kipdihoang pohn sakaihoauwe, ih pirin kipdihoar mwoarpijoang, a ma armaj men ma sakai oauwe pirin kipdihoang puwoa pel nen kamwisihdi emen ma ih kipdihoang puwoa, ih pirin lelloar kamwisihpene.”
45Nehn en jamwrou laplappok apel Pharisee‑ok irai rongda en Jesus karajraj pwiak, irai lioaskihla pwa ih karajrajki irai.
46Doar irai jong en joalihdi ih, a irai mijik pokon in armajjok, pwa irai kin wiahki Jesus johkohp men.
