Matthew 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Nehn anjoauwo sohnpadahkkok indoa ipen Jesus idoak, “Inje ma keiou laplap nehn Wein nehnloannge?”

²Doar Jesus pangindo jeri siksik men kihdi nehn pwung irai.

³Ih pwa, “Ngoahi pwehng kamwai in mehlel, pwa ma kamwai johpwa wikla doahroarla jeri, kamwai nen johkak dilda nehn Wein nehnloannge.

⁴Pwa emen ma kin aksiksikla doahrla jeri siksik mene ih pirin keiou laplap nehn Wein nehnloannge.

⁵Apel emen ma kin kajamwo jeri siksik men doahre in oadoaioa ih kin kajamwo ngoahi.

⁶“Ma emen ma kahrehng en emen jeri siksik pwiai ma kamehlele ngoahi en johla ahr pwojon, mwehu oang en pirapirroang oau sakai koalikko in sipinwoaroa, pwa en sikmehula.

⁷Ia woahr nauna in oang jampah mihn koauwehla pwiai ma pirin kahrehioang emen en kerpwihla ah pwojon! A joah, joang pwiai pirin pwen mine anjoau ohroj, a ia woahr nauna in oang armaj meno ma mehpwiai sapdahjang ipoa!

⁸“Ma oaloap poahmmwen ke oaloap ehmmwen kahrehng koawoa nehn dihp, poaloahjang, kerpwihla! Pwa nen mwehuwoang koawoa en dilloang nehn mour joahsukko, ki oaloappoar poahmmwen ke oaloappoar ehmmwen jang poah riau ke eh riau kerpwiheklahng nehn oaiho ma johkin kunla.

⁹A ma oaloap pwoaroan mijoamwen kin kahrehng koawoa nehn dihp, roahkjang, kerpwihwehjang koawoa! Mwehu ma koawoa loapin pwoaroan maj dilda nen mour joahsuk jang pwoaroan maj riau a kerpwiheklahng nehn oai in nehn ehl.

¹⁰“Kamwai Kanaihoahng pwa kamwai en johpwa mwamwahlki emen siksik pwiai. Kamwai en kidal pwa arai sohnloang kin mine ipen Joamoaiho nehnloannge anjoau ohroj.

¹¹Pwa Nihn Armaj indoahng koamoaurla irai kan ma no joaloangla.

¹²“Da kamwai lemleme? Ma armaj men nainki jihpw epwiki, emen arai joaloangla, ih joh nen kihdi jihpw duweijek dohmenno arai en mwingmwingehjili pohn nahna, a ih inla rapahki jihpw joaloanglahu?

¹³A ma ih kapangda, ngoahi pwehng kamwai in mehlel, pwa ih nen uhdahn perenki jihpw meno jang jihpw duweijek dohmenno ma johpwa joaloangla.

¹⁴Ioar nen doahr Jamamwaiho nehnloannge, ih johpwa mwehuki emen siksik pwiai en joaloangla.

¹⁵“Ma rioamw men wiahda dihp oang koawoa, inla ipoa, kajalehioang dipoahu. A me en wiawi in rir. Ma ih rong koawoa, a koawoa no kajpahlihdo rioammwo.

¹⁶A ma ih joah koawoa, a emen ke roahmen armaj en pwilihda koawoa, pwa ara roahmenno en wia kadehdehn joang ohroj ma doahr da ma Puk Joarwi pwa.

¹⁷A ma ih pel johpwa nimen rong irai, a koawoa lelki mwomwohdjo. A ma ih pel johpwa nimen rong mwomwohdjo, a wiahkihla ih mihn likin men ke johnrik daksis men.

¹⁸“Ngoahi pwehng kamwai in mehlel, pwa me ohroj ma kamwai joalihdi nehn jampah, a nen pel joaldi nehnloannge; a me ohroj ma kamwai lapwadda nehn jampah, a nen pel lapwda nehnloannge.

¹⁹“Apel ngoahi pwehng kamwai in mehlel, ma roahmen ipamwai nehn jampah minminkihpene ara kapkap, poaki mehkij, ih uhdahn pirin pwoaidahng ara jang ipen joamoaiho nehnloannge.

²⁰Pwa wijahkij ma roahmen ke jilmen pokon pene in oadoaioa, ngoahi kin pwili irai mine wijahu.”

²¹Peter sohdo ipen Jesus pwehng ih, “Maing oai Koaun, pehn doapoa ngoahi en mahkoahng rioaiho ma kin wia dihp oang ngoahi? Isar ma ngoahi mahkoahng ih pehn ujuh?”

²²A Jesus japoang ih pwa, “Joahpwa isar pehn ujuh, a pehn ujuh wad ijihjek.

²³Pwa Wein nehnloannge doahroar nahmwarki men ma lemehda en wia koapwung in pwaipwanid oang nah papahk.

²⁴Nen ah sapda wia koapwunngo, a emen irai wijikdohng ipoa, ma pwaipwanidki doahloa milienpwi.

²⁵Papahu johpwa nainki mwani isar in dupukla ah pwaipwaniddo, doar nahmwarkiho pwa ih en noasla, doahroar lidu men, pwilihkihoahr pahioa, nah jerihok, apel ah koapwoa ohroj pwa en kak dupukla ah pwaipwaniddo.

²⁶Papahu ken poadpwomwla mwohn nahmwarkiho, ‘Maing, koawoa en menlau mahkoahng ngoahi, koawoa en kanangmahng ngoahi, pwa ngoahi pirin dupukkoang koawoa me ohroj.’

²⁷Nahmwarkiho ken ipwilkihda ih apel mahkoahng ih ki ah pwaipwaniddo doar ken mweidoahng ih en inla.

²⁸“Mwerin a injang wijahu, ih suhwoang emen pwilihoa papah ma pwaipwanidki oang ih doahloa jipidpwi, ih jipoardi, padikpene sipinwoaroa, pwehng ih, ‘Pispis dupukdo oamw pwaipwanid oang ngoahi!’

²⁹Papahu rukidi mwohn ih poakmahk, ‘Menlau kanangmahng ngoahi, pwa ngoahi nen dupukkoang koawoa!’

³⁰A ih kia rong, doar ih peiddoang pwilihoahu nehn kalpwuhj oaroh pwilihoahu en dupukla ah pwaipwaniddo.

³¹Nehn en pwilihoa papahk kapangda dahkij wiawi, irai injinjuwedkihla koalik, inla pwehng nahmwarkiho me ohroj ma wiawi.

³²Nahmwarkiho pangindo nah papahu pwehng: ‘Koawoa papah naunahmen! Ngoahi mahkoahng koawoa oamw pwaipwanid ohroj oang ngoahi, pwa koawoa poakmahk ipoai;

³³A da koawoa ke johpwa mahkoahngki pwilihoammwo, doahroar oai ne mahkoahng koawoa.’

³⁴Doari nahmwarkiho inenin lioas, doari ih peiddoang papahu nehn kalpwuhj pwa ih en loklok oaroh ngehd ih en dupukla ah pwaipwanid ohroj.”

³⁵Doar Jesus pwa, “Ioar joangwa ma joamoaiho nehnloannge pirin wiahng kamwai, ma emen emen kamwai johpwa mahkoahng riah jang nehn ah mohngiong.”