1Mwerin anjoaukij Jesus aluhla nehn mwoaswel oau Sabbath. Nah sohnpadahkkok mwakohkohda irai dolihdi wehn wihdpwi irai kang.
2Anjoauwo Pharisee‑ok kapang irai, irai pwehng Jesus, “Kapang! Nihmw sohnpadahkkok wia me ma uhwoang kojonned in Sabbath.”
3Ih japoang, “Kamwai johkin wadek da David wia anjoauwo ma ih apel pwilihoahk mwakohkola?
4Ih dilda nehn Umwen Koahs, pwilihoahk kangla pilahwa joarwiho—ma uhwoang kojonned irai en wia, pwa jamwrouwok oar kin kang.
5Ke kamwai kahjik wadek nehn kojonned en Moses ok ma pwa Sabbath ohroj jamwrouwok nehn Umw Joarwi koauwehla kojonned in rehn joarwi a irai johpwa dipanki?
6Ngoahi pwehng kamwai pwa mine armaj men ma laplap jang Umw Joarwiho.
7Puk Joarwi pwa, ‘Kadek mwehujang meiroang in mahn.’ Ma kamwai woahwoahki lal kamwai nen johpwa koauwe armaj joh dipoa.
8Pwa Nihn Armaj ioar Koaun in Sabbath.”
9Jesus injang o, inla nehn jinakokehu,
10woal men ma mwoasor oaloap poah mine o. Armajpwi pel mine o ma jongjong en kadipoahki Jesus ah japwung. Irai idoak oang ih, “Johpwa uhwoang asai kojonned koawoa en kemwehuwihla armaj johmwehu Sabbath?”
11Ih pwehng irai, “Ma emen in kamwai nainki jihpw men a ih kipdihoang nehn lipw oau Sabbath, kamwai joah nen pwoakda ih jang nehn lippwo?
12Ia woahr kajampwalin armaj men jang jihpw men! Doari mwehu en wia me mwehu Sabbath.”
13Doar ih pwehng woal mwoasor poahu, “Kailwe poahmmwen.” Doar ih kailla poah doari ken mwehula dauluhl, doahrla loap mwehuwo.
14A Pharisee‑ok ken injang o planehda irai en kojukdi Jesus.
15A Jesus kidal pwa da irai pilpilahne, Ih injang wijahu, armaj dir kahujla ih. Ih kemwehuwihla johmwehu ohroj iparai,
16a ih pwehng irai en johpwa pwa inje ih.
17Me kapwaiahda dahkij Isaiah kokohpki doahr ih:
18“Noai luduhwa, ma ngoahi ne pilda. Ih ioar ngoahi ipwilki, apel perenki, ngoahi pirin kihdahng ngenihoa puwoa, ih pirin kalohkihda kadeik oang wei kan.
19Ih jehpirin akmai ke rahrahu; ih jehpirin kapahrak nehn al kan.
20Ih jehpirin sipwangdi alek piroakla kan, ke kakunihla lahm oau. Ih pirin sihkeiki pwa pwung paiai en pwoaida.
21Sohn wei ohroj pirin koapwoarpwoarkihla oadoa.”
22Doari woal men ma ngen jaus dilingla ih, ma pel majkun pel jehjoa lallal, wijikdohng Jesus. Ih kemwehuwihla woallo doar ih ken kak lallal pel kapangda wija.
23Pokonno pwuriamweikihla, “Audi ih ma kijehn kadaudok en David wa me?”
24A anjoauwo me Pharisee‑ok rongda me, irai pwa, “Kamwai johpwa pwuriamweiki ah kak kahuj jang ngen jaus. Ih kihjang ah manman ipen Beelzebul, koaunin ngen jaus.”
25Jesus ne kidal da arai lemleme, ioar ih pwehngkihoang irai, “Wei oau ma uhpene apel peipene nen pwungarai jehpirin mour woaroai. Kahnihmw oau ke peneinei oau ma sowoa kan pel uhpene nehn pwungarai nen uhdahn mwoarpijoang.”
26A doar ma oau pwihn mahwin oang oau pwihn nehn wein Jehsen, woahwoahki pwa wein Jehsen ne pwalpijoang, doar nen pispis mwoarpijoang.
27Kamwai pwa ngoahi kin kahuj jang ngen jaus kan pwa Beelzebul ma kioang oai manman. A inje ma kioang nihmwai sohnpadahk kan manman in kahuj jang ngen jaus kan? Pein nihmwai sohnpadahk kan nen kadehdehng kamwai doahr amwai japwung!
28Joah, jaudi, a Ngenin Koahs ma kioang ngoahi manman in kahuj jang ngen jaus kan, a ioar me ma kadehdehda pwa Wein Koahs ne lel kamwai.
29“Joh emen kak koauwehla umwen woal sihkei men pwa en pirapoa ah koapwoa kan ma ih johpwa koldi piroahpene woal sihkeiho. Ioar wioapoawahr doari ih kak pirapoa ah koapwoa kan.
30“Emen ma johkin pwili ngoahi, kin uhwoang ngoahi, a ma johkin jeuweje ngoahi rikpene, kin kamwroahpijoang. .
31Me ioar kahrpoahwa ngoahi pwehng kamwai, Dihp ke lahlahwe ohroj kak mahkla—a lahlahwe Ngen Joarwi ioar johkak mahkla.
32Emen ma lahlahwe Nihn Armaj, kak mahkla, a lahlahwe Ngen Joarwi pwanah johkak mahkla—apkas ke pel allaluhla.
33“Ma kamwai poadokdi suhkoa mwehu pas, a wah pirin mwehu. Ma kamwai poadokdi suhkoa nauna pas, wah pirin nauna. Pwa kamwai pirin kidal suhkoa kan ki wahrai kan.
34Kamwai doahroar sinek! Imdoahr armaj nauna doahr kamwai kak pwa mehkij mwehu? Pwa dahkij ma kamwai pwa ioar kin kajalehda audoapoan nehn kapehdimwaikan.
35Armaj mwehu men kin pwahla lal mwehu jang nehn ah mohngiong mwehu, a armaj nauna men kin pwahla lal nauna jang nehn ah mohngiong nauna.
36“Doari, kamwai en kidal pwa nehn Rehnin Kadeikko armaj ohroj uhdahn pirin pwukoahki arai lallal mwahl ohroj.
37Pein amwai sikesik kan ma pirin kadeikda kamwai ma kamwai mwakelkel ke dipan.”
38Johnpadahk in Kojonned apel Pharisee pwi indoa ipen Jesus pwehng ih, “Johnpadahk, kamai nimen koawoa en kajalehng kamai oau manmanno.”
39Jesus japoang, “Ia woahr nauna apel rosros in armaj in anjoau kije! Kamwai poaki manman oau jang ipoai a manman wahr ngoahi nen kioang kamwai ioar manman in johkohp Jonah.
40Pel doahr en Jonah minmine nehn kapehdin mwumw koalikko rehn jiluh pel pwong jiluh, ioar doahr, Nihn Armaj, pirin mine pehn jampah rehn jiluh pel pwong jiluh.
41Nehn Rehnin Kadeikko mihn Nineveh pirin uhwoang kamwai apel kadeikda kamwai, pwa ahr koluhla apel wiliakapwla nehn ahr rong en Jonah padahkko. A apkas emen ma laplapjang Jonah mine me.
42Nehn Rehnin Kadeikko Li nahmwarki in Sheba pirin uhwoang kamwai apel kadeikda kamwai,pwa ih jeiloakdo jang nehn ah weiho pwa en rong doahroar en nahmwarki Solomon kaweid loalkoang. A apkas emen ma laplap jang Solomon mine me.
43“Nehn en ngen jaus men kin diljang nehn armaj men, ih kin allaluhjili nehn japwsoahn, rapahki wijahn koammoal a nehn ah johkin diar.
44Doar ih ken pwehng pein ih, ‘Ngoahi en pirin pwurlahng nehn umwoaiho.’ Doar ih pwurla diarda pwa umwahu ne soahnda, mwakelkel, apel joan.
45Doar ngen juweddo pel pwurla rapahkihda pel ngen jaus ijimen ma nauna jang ih, irai ohroj dilda koaujoanla wijahu. A doari armajjo a kapwa nauna jang mijkoalkoal. Ioar joangoan mour wa me nen wiawi oang armaj nauna in rehn pwiai.”
46Nehn en Jesus siksikesik oang pokonno, inahu apel riahk mine likin, nimen lal oang Ih.
47Armaj men pwehng ih, “Inoammwo apel rioammwok minmine likinno, irai nimen lal oang koawoa.”
48Jesus japoang, “Inje inoai? Inje rioai kan?”
49Doar Ih doklahng nah sohnpadahkkok ih pwa, “Irai pwiai ioar inoai apel rioaikoa.
50Emen ma kin wia injenen Joamoaiho nehnloannge ioar rioai woal, rioai li apel inoai.”
