1O Ježiš lenge pale vakerelas andro podobenstva:
2“O ňeboskero kraľišagos hino sar jekh manuš, savo sas kraľis, a kerďa peskere čhaske bijav.
3Bičhaďa peskere sluhen, hoj te džan te vičinel pro bijav le manušen, ale on na kamenas te avel.
4Pale bičhaďa avre sluhen a phenďa: ‘Phenen le manušenge, save hine vičimen: O dilos imar pririchtinďom, mire gurumňa the o thule džvirini hine imar murdarde a sa imar hin kisno! Aven pro bijav!’
5Ale lenge oda sas jekh a gele het, vareko pre peskeri maľa a vareko, hoj te bikenkerel.
6A okla chudle leskere sluhen, ande len avri pre ladž a murdarde len.
7Sar oda šunďa o kraľis, choľisaľiľa, bičhaďa peskere slugaďen a murdarďa ole vrahen. A lengero foros podlabarďa.
8Akor phenďa peskere sluhenge: ‘O bijav imar hino pririchtimen, ale o manuša, save sas vičimen pro bijav, na sas hodne te džal.
9Vašoda džan pro droma avri le forostar a vičinen pro bijav savoren, kas arakhena.’
10Ola sluhi gele pro droma a skidle savoren, kas arakhle, le lačhen the le nalačhen. A andre bijaveskeri sala sas pherdo hosci.
11Ale sar avľa andre o kraľis te dikhel pro hosci, dikhľa ode manušes, savo na sas urdo andro bijavutne gada.
12A phenďa leske: ‘Prijaťeľina, sar avľal andre, te na sal urdo andro bijavutne gada?’ A ov sas čhit.
13Akor phenďa o kraľis le sluhenge: ‘Phanden leske o pindre the o vasta a čhiven les avri andro kaľipen!’ Ode ela o roviben a randena le dandenca andre dukh.
14Bo hin but vičimen, ale frima hin avrikidle.”
15Akor o Farizeja odgele a dovakerenas pes, sar les te chudel andro lava.
16Bičhade ke leste peskere učeňiken le Herodijanenca a on leske phende: “Učiťeľina, džanas, hoj sal čačipnaskero a sikaves le Devleskero drom andro čačipen. A na džal tuke pal oda, so o manuša phenen, bo na dikhes pro manuš.
17Phen amenge, so gondoľines: Kampel te počinel le Cisariske o daňe, vaj na?”
18Ale o Ježiš prindžarďa lengero nalačhipen a phenďa: “Soske man kamen te chudel pro lav, tumen dujemujengere?
19Sikaven mange e minca, savaha pes počinel o daňe!” On leske ande o denaris.
20A phučľa lendar: “Kaskero hin kada obrazis the nav?”
21Phende: “Le Cisariskero.” Avke lenge phenďa: “Den oda, so hin le Cisariskero, le Cisariske, a so hin le Devleskero, le Devleske.”
22Sar oda šunde, čudaľinde pes, omukle les a gele het.
23Oda džives avle ke leste o Saduceja, save phenen, hoj o manuš našťi ušťel andral o meriben. A phučle le Ježišostar:
24“Učiťeľina, o Mojžiš phenďa, te vareko merela bi o čhave, leskero phral peske mušinela te lel leskera romňa, hoj te kerel le phraleske čhaven.
25Sas ke amende efta phrala. Ešebno iľa romňa a paľis muľa. A vaš oda, hoj les na sas čhave, mukľa la romňa peskere phraleske.
26Avke pes ačhiľa le dujtoneha, the le tritoneha – dži ke eftato.
27Paľis, sar mule avri savore phrala, muľa the oj.
28Akor, te savore efta phrala laha dživenas, kaskeri lendar ela romňi, sar ušťena andral o meriben?”
29O Ježiš lenge odphenďa: “Tumen calkom na achaľon, bo na prindžaren le Devleskero lav aňi leskeri zor.
30Bo sar ušťena o mule andral o meriben, na lena romňen a na džana romeste, ale ena sar o aňjela andro ňebos.
31Tumen na genďan, so phenďa o Del, pal o mule, save ušťena andral o meriben?
32‘Me som o Del le Abrahamoskero, o Del le Izakoskero the o Del le Jakoboskero!’ O Del nane Del le mulenge, ale le džidenge!”
33Sar oda šunde o nipi, čudaľinenas pes upral leskero sikaviben.
34Sar o Farizeja šunde, hoj o Ježiš phandľa le Saducejenge o muj andre, sa pes zgele.
35Jekh lendar, zakoňikos, phučľa le Ježišostar, hoj les te chudel avri:
36“Učiťeľina, savo prikazaňje hin nekbareder andro Zakonos?”
37O Ježiš leske phenďa: “‘Kameha le Rajes, tire Devles, andral calo tiro jilo, andral caľi tiri duša the andral caľi tiri goďi.’
38Ada hin oda baro the ešebno (peršo) prikazaňje.
39A dujto hino ajso sar o ešebno: ‘Kameha avres avke sar pes korkores!’
40Pre kala duj prikazaňja ačhel calo Zakonos the o Proroka.”
41Sar pes zgele o Farizeja, phučľa lendar o Ježiš:
42“So tumen phenen pal o Kristus? Kaskero hino čhavo?” Phende leske: “Le Davidoskero.”
43Phenďa lenge: “Akor soske o David les andro Duchos vičinel Rajeja? Bo phenel:
44‘O Raj phenďa mire Rajeske: Beš tuke pal miri čači (pravo) sera, medik tuke na thovava tire ňeprijaťeľen tel o pindre.’
45Te korkoro o David les vičinel ‘Rajeja’, sar šaj avel o Kristus leskero čhavo?”
46Ňiko leske na džanelas te odphenel aňi lav a ole dživesestar ňiko buter lestar pes na tromanďiľa (odvažinďa) te phučel.
