1Moses-kenh-rnem-then Pharisee-rnem-then anenh, Jerusalem-areny-rnem-then. Rernem Jesus-warl akarrirrek.
2Rernem arek, kwertengerl Jesus-kenhel-rnem itep aternngel amern alhewerarl arlkwek, itep lhewelhey-angenhel.
3Jew-rnem-then, Pharisee-rnem-then itep lhewelhenh amern arlkwey-alenty.
4Amern store-ek inemel, rernem irrarlkemel ingkerrenh kwatyel, rernem ampernemel arlkwey-alenty. Arrwekeleny-rnem-kenh angka nhenh ayntenh. Tyampet-rnem irrkwernem-then ingkerrenh rernem irrarlkek, rernem amern ampernemel arlkwey-alenty.
5Rernem Jesus renh ilek, “Kwertengerl ngkwenhel-rnem nthakenharl itep lhewelhey-angenharlan amern arlkwey-alenty. Arrwekeleny-kenh apmer nhel aknganek amern arlkwey-alenty itep lhewelhetyek.”
6Jesus-el renh-rnem ilek, “Arrantherr tnakelheyel. Awank-akerr Isaiah-el Akngey-kenh angka pip-warl ingkwernek, arrantherran aneyel-apeny. Akngey angkek ikwer-rnem,
7‘Arrantherr irrtywerremel atyeng inkwerelheyel, angka atyenh-angkwarr apentey-angenh. Arrantherr akwerrng iterreyel arrekantherrenh-angkwarrant, alakenh-anyem arrekantherrenh iterrenty Akngey-kenh-angkwarr-weny.’”
8Jesus-el renh-rnem ilek arrpemarl, “Arrantherr iterreyel arrekantherrenh-angkwarrarl, arrantherr anetyek. Arrantherr Akngey-kenh-angkwarr apentey-angenh.
9Atha ileyel Akngey-kenh angkel, ‘Arrantherr amey-rnem-then, akngey-rnem-then ikwer-rnem awelhenherr-arey. Moses-kenh angka alakenh-anyemarl aynteyel arrwekelenyan. Ameyek, akngeyek awelheyang, arrantherr apmwangkwarrarl aneyel.’
11Arrantherr arntarnt-areyang akngey-then amey-then. Arrantherr apmwel-areth akalty-antheyel, Akngey-kenh-angkwarr-weny. Arrantherr man ikwerel amey-rnem-then akngey-rnem-then arntarnt-arey-angenh, man ilenh arrantherr ayerrpileyel. Arrantherr irrtywerremel ileyel man nhenhan Akngey-kenh-arrpantey.
13Arrantherr angka Akngey-kenh ingkerrenh ipmeyel, angka arrekantherrenh-angkwarr apenteyel.”
14Jesus-el renh-rnem akarrilek. Ra ilek, “Atyeng arrantherr awelhenherr-arey arternp. Amern arrantherr arlkwetyek alhewer, nthakenharl arrantherr apmwelhiley-angenh, amern alhewer arlkwemel. Angka Akngey-kenh nhenh aynteyel, amern alhewer arlkwetyek. Arrantherr apmwel-areth angkenty, arrantherr Akngeyek apmwelhileyel.”
17Jesus-el renh-rnem ilek-penh, ra apmer-warl alpek kwertengerl ikwerenh-rnem-akert. Kwertengerl ikwerenhel-rnem renh ayernek, “Ntwa anwernenhantherr anayntiletyek angka irrkaty, ntwarl renh-rnem ilek-apeny.”
18Jesus-el renh-rnem ilek, “Arrantherr ywarn-antey iterreyel angka nhenhan atharl arrenhantherr ileyelan. Amern arrantherr inemel alhewer arlkwetyek, nthakenh apmwelhiley-angenh. Amern arrantherr arlkwenty, kwernenhenty atnert-warl, rap atnert-they ywerrenhem. Amern, aker, alhewerarl arrantherr arlkwem.
20Arrantherr apmwel-aretharlap iterrenty, arrantherr apmwangkwarrarlap aneman. Arrantherr ingwer-kenh arrkar irrtyertel ikngwenty, arrantherr apmwangkwarrarlap aneman. Arrantherr irrtyert-awarr anenty, arrantherr apmwel-aretharl ilenh-angkwarran-anem. Arrantherr ingwerenty atwenty, arrantherrap apmwangkwarrarlap aneman. Arrantherrarl irrtywerremel ilenty, arrantherr apmwangkwarrarlap aneman. Arrantherr ahelirrenty ingwer-rnemek, arrantherr apmwangkwarrarlap aneman. Arrantherr tyel-angkenty ingwer-rnemek, arrantherr apmwangkwarrarlap aneman. Arrantherr ingkerrenh-angkwarr alhewer alhenty, arrantherr apmwangkwarrarl anem. Arrantherr mwerr-arrpantey tnakelhenty, arrantherr apmwangkwarrarlap aneman. Arrantherr Akngeyek irrpelthirrenty, arrantherr apmwangkwarrarl anem.
23Alakenh-anyem, arrantherr apmwangkwarrarl anem, arrantherrarl iterreyel-angkwarr, arrantherr Akngey-kenh-angkwarr apmwelhileyel, ikwer inkwerelheyang-anem. Amern alhewer arlkwemel, nthakenh arrantherr apmwelhiley-angenh.”
24Jesus ra apmer Tyre-warl alhek, warl ingwer-kenhel aney-alhek. Jesus-el renh-rnem ilek, “Ingwer-rnem iley-angenh, rernem ayenh arlkarewerl-anekerr. Ayeng artenyel aneyel, atha kwertengerl atyenh-rnemantarl akaltyilem.”
25Arelh apmer Phoenicia-areny ra awek, Jesus-arl aney-alhek warl ingwer-kenhel. Arelh alethang anyent Greek, angka ingwer angkenh, Jew-kenh angkeweny. Ra Jesus-warl alhek, kwenirrey-alhemel, ampwethel alernelhemel. Kwey ikwerenh arrenty apmwakertarl anenh. Amikwel Jesus renh ayernek, “Ampa atyenh-kety, ntwa arrenty irrenta!”
27Jesus angkek, “Nthakenh atha ingwer-rnem arntarnt-arey-angenh. Anwantherr ampernem-tangkwel wantey. Atha atyenh-rnemantarl, Jew-rnem arntarnt-areyel. Rernem ampernem-apeny atyenh. Arengk-rneman ampel-rnem arlkwenty-penhant wantey. Atha atyenh-rnem, Jew-rnem-tangkwel arntarnt-areyel. Atha arrenty-rnem Jew-rnem-kety irrentem.”
28Arelh anyent angkek ikwer, “Arengkel-rnem arlkwetyek arrpemarl, arengk-kenh amernan rernem iweyek arrpemarl. Jew-rnem rernem ingkerrenh atyenh-rnem-kety arlkarirreyel. Atyenh-rneman arengk-apenyarl aneyel, Jew-rnem-angkwarr. Jew-rnemel renh-rnem arntarnt-arey-angenh. Atha ngenh iterl-areyel, ntwa ingkerrenh arntarnt-arey-angker. Ayenh-then arntarnt-ara!”
29Jesus-el arelh ilek, “Nga arraty atyeng-warl angkek. Kel arrenty tyerrelhemel alpek kwey ngkwenh-they.”
30Arelh apmer ikwerenh-warl alpek. Ra arek, arrenty kel tyerrelhemel alpenty kwey ikwerenh-they.
31Jesus alpek apmer Tyre-ampeny-they, apmer Sidon-angkwarr, Galilee kwaty ilkwewarl. Ra apmer Decapolis-angkwarr alhek.
32Artwa ingwer-rnemel artwa anyent atnwenhek Jesus-warl. Ra angkey-angenh, iylpa arwengk awey-angenh akerter. Rernem Jesus renh ayernek, ra renh mwerriletyek, iylpa altyweriletyek, mwerr-anem ra angketyek.
33Jesus-el artwa anyent renh tawen-they akwerr-warl atnwenhek. Jesus-el itep-atherrel iylpatherr-warl arrernek, artwa arwengk ikwer-warl. Jesus-el itep ikwerenh-warl apelh arrernek. Ra aleny artwa arwengk renh itepel arnep-arnek, ra mwerr angketyek, awetyek.
34Jesus-el irrwerl alker itnywenek, angkemel, “Iylpatherr irrpelthel altywerila!”
35Ikwer-penh artwa ra mwerr-anem aweyel-anem, mwerr-anem angkeyel-anem.
36Jesus-el renh-rnem artwerilek, “Ingwer-rnem-warl iley-angenh. Akater anenherr-arey, atharl artwa anyent mwerrilek.”
37Ingkerrenh rernem artewentyel iterrek, angkerrenhan, “Ngangker inngan yanhey, artwa yanhan arntety-rnem mwerriley-angkerarlap ran, awey-angenh-rnem-then, angkey-angenh-rnem-then.”
