1Gutnius ta Nedun Lapan, Yesus Kristus ti ihir ihpa ndre kurtih.
2Profet Aisaiah ndre pihe ti idetorwe pohon Lapan ihpa, “Yu we kuhtakalan ndramat todo kidokai kise munen, pe iy we kise kisitatilen salam kile huyen.
3Homou lau iyuw imin lok sehir tam pwi, ihpa, ‘Adahnan salan Lapan ki‑in. Atatilen salan kile huyen.’”
4Ile pe ndramat odo tokai ise munen ti Jon odo Baptais. Jon imin lok sehir ndre akan poi ke porah iyin eriy, pe isohou puko‑on ile ta sa lau ihpa, “Tawene taduu ke‑eu odo punou mo‑on pe atsa otpo baptais, kile pe Lapan kolon ke‑eu odo to‑ir taduu.”
5Ile pe sa lau sulo‑on odo Yerusalem pe lok se yi odo Yuda, hala pe haltahrung Jon. Su henen to‑ir ta su ile moleu pe Jon itou baptais ile ta su odo wo Yordan.
6Kolewen Jon ti hahnan odo lemlemun kamel, pe iy inehndrusi let iyin ndrokoron. Song anan Jon ti kalangou pe wayen pakok odo purken kei.
7Iy ipe ile ta sa lau ihpah, “Ndramat homou ndre we kise omur todo ti ise puli‑i lakopwi. Yu ti undranon Iy pwi. Yu undranon kukaluluhu pe kuruwyon esuke‑en su Tadan pwi.
8Yu untudou baptais odo wo, odoke Iy ti we kitou baptais odo Lapan Mulwen.”
9Kalmene‑en kurti pe Yesus iyus taon Nasaret, odo Galili Distrik, pe ile ndrongon Jon. Pe Jon inuhen Iy odo wo Yordan.
10Idu ke ndre Yesus ise eleng odo lon wo ti, Iy indre‑et ile eleng, pe iltuwe parar iseket idu kopwi. Pe Lapan Mulwen iyuh ise pule‑en ihpa ndre pal.
11Kuruwen pohoi iyus lom parar iseket ti ipe ihpa, “Ou ti Nedu. Yu wasu‑u Ou lakopwi. Yu uhposon Ou.”
12Idu ke ndre kuruwen pohoi iyus parar ti imnin, eri Lapan Mulwen ikuni Yesus ile lok sehir, pat pe on ke porah iyin eriy.
13Yesus imin lok erti rang ndre hangoh ndroda su ka‑an puyep. Pe Satan ile pe ituhne ipe kihnan Iy pe Iy kindretahrung nolou ta Lapan pwi. Pe su engel henehnuwii Iy.
14Sa kah hendrundrotowe Jon odo Baptais pe hokuni iy inna kou. Idu ndruwen erti, Yesus ile Galili Distrik pe ipehre Nolwo‑on Lapan.
15Iy ipe ihpa, “Losengin indrihir. Mundrun ndre Lapan we kile king odo lokpoi ti indrisa. Ada‑as punou mo‑on ha‑au pe otpo bilip kile Nolwo‑on Lapan.”
16Yesus inelila odo ngerin Ndras Galili, pe Iy iltuwe horu madan tinton rumuu, Saimon pe Andru. Horu ti lau odo pondrih ni, ile pe horu herempiyi kupwen.
17Pe Yesus ipe ile ta horu ihpa, “Arsa oru‑us Yu, pe Yu we kutuhnon oruu kile takun ndramat.”
18Ile pe horu herpiyen kupwen ta horu into ndre poi pe horu‑us Yesus.
19Iy illa ile lehpe lakopwi, pe iltuwe Jems pe Jon. Jems horu Jon ti tama’ horu Sebedi. Horu hermin lon ndrole’ horu, pe heresokopet pe herempisi ta horu kupwen.
20Yesus madan ihtek ta horu ti pe iyuwen horu lakopwi. Horu herpiyen tama’ horu ndrodan ndre su lewen marai honto ndre ndrol, pe horu‑us Yesus.
21Su hala taon Kaperneam, pe idu Sabat, eri Yesus ile lon omwen surok ta su Yuda pe ipehre nolwo‑on Lapan ile ta sa lau.
22Sa lau hehretek ile suhwon, odosa Iy indrenolou ihpa ndre su ndramat ndre tuno’ su Lo ti pwi. Su sape ndramat odo Lo ti henosohou illa ke nolou ndre sa ndramat se yi hendresohou kah ile eri, odoke Yesus ti isohou ihpa ndre Iy ti Tadan pawa odo sohou.
23Sa hehretek ti orngon homou sinel imin pule‑en ti idehel idu pule‑en Yesus ihpa,
24“Yesus odo Nasaret, Ou apa ospo sa kile tadu? Ou apa asahyan odu tih? Yu tuno Ou! Ou ti Ndramat Kapin ta Lapan!”
25Yesus ihrurute anan ihpa, “Onlou kah! Asa mahun odo tadan!”
26Pe sinel kuti iruhyon orngon kuti ile puko‑on, inum pe idehel ile mo‑on pe indreh iyeu.
27Sa lau ndre sulo‑on hehretek pe poho’ sa idohoh idu kopwi. Homou ihndremte homou ihpa, “Homosa kutih? Iy itou tatuhne pe punou ile handrai yi. Iy isohou Nolwo‑on Lapan ihpa ndre ndramat tadan pawa. Pe inlou ta sa sinel pe su hohrung Iy!”
28Ile pe Yesus rangan ihnding sowin kopwi odo lon Galili Distrik ndre mandra‑an.
29Yesus ise kiu odo omwen surok pe illa ile um ta Saimon horu Andru. Sa lau se ho‑us yi, ndrodan ndre Jems pe Jon.
30Osohon Saimon ti inemetir iyin petle odosa iy imet sik pe mundren mburten, ile pe su henen ndralngan Yesus.
31Iy illa ile hun osohon Saimon, indrotowe lumwen, pe isori iy imin eleng. Osohon Saimon ile huyen, pe itou song ile ta su pe su hoyo‑on.
32Idu lukumwen ti pe mundrun Sabat inum. Ile pe sa hekuni sa lau ndre hamat sik, ndrodan ndre sa lau ndre sinel hodo ta su, eri hala hu Yesus.
33Sa lau ndre sulo‑on odo taon Kaperneam ti hala pe hodo malal odo um ta Saimon horu Andru.
34Yesus ihnan sik handrai pe handrai odo mundre’ sa lau ti honum. Iy iyes sinel odo mundre’ sa lau yi. Odoke Iy isinip ana’ su sinel we hendresohou pwi, odosa, su tuno’ su Iy ti Nedun Lapan.
35Yesus itlang maping ndrelik odo lon um, pe iyeu ile ngerin taon. Ndramat hondruto sehir erti pwi. Iy imin eriy pe inesurok.
36Saimon su lewen hala helpondrih Iy.
37Su hetureh Tadan pe hapa ihpa, “Sa lau ndre sulo‑on hempondrih Ou.”
38Odoke Iy ipe ile ta su ihpa, “Tidu titla lok se yi ndre he‑en mukehe odo ketih, pe Yu kulpehre Nolwo‑on Lapan. Yu use ti odo paninye nolou ta Lapan ile lok ndre sulo‑on.”
39Ile pe Iy ile lok ndre sulo‑on odo lon distrik Galili pe ipehre Nolwo‑on Lapan odo lon omwen surok sim pe sim, pe iyesilpinen su sinel ha‑au odo ta sa ndramat.
40Orngon homou tadan sik lepra ile, pe pandrulku‑un ndre rukei ile poi idu madan Yesus, pe iy ideng ipe ihpa, “Uh Ou ereh, eri ahnan yu kuhir huyen odo madan Lapan.”
41Yesus madan ile tadan pe ikarndrum iy lakopwi. Iy itlon lumwen ile pe itkuni orngon kuti, pe ipe ihpa, “Yu wasu‑u. Ou ala huyem.”
42Pe sik tan orngon ti ihkepwi pe iy ile huyen.
43Yesus sowin kopwi ipe ile tadan iyeu, odoke ipe nolou puko‑on ile tadan ihpa,
44“Antahrungii? Nombrun enen ndralngan homou. Ndresale kopwi ala pe elilngan ou kile tam pris, pe ahnan ofa kihpa ndre Lo ta Moses ipe tih. Kile pe sa lau hehtuno sa ihpa ndre ou ti kah huyem.”
45Odoke orngon ti ile lok ndre sulo‑on odo Galili pe inen sane kuti ile ta sa lau. Ile pe Yesus indranon kindrila lon sih taon pwi, odosa sa ndre sulo‑on hempondrih ke Iy. Iy immin ke lok ndre ndramat hondruto eriy pwi ti, odoke sa lau odo hokor pe hokor halla ndrongon Iy.
