Mɑlǝkɩ 6:9-53

⁹Ɩ́ lɛɛ ntɑŋkpɑlɑ. Ɩ́ tɑɑ suu wontu nɑ ɩ́ tǝnɩ.

¹⁰Ḿpʋ́ɣʋ́ ɩ tɑsɑ-wɛ tɔtɔ sɩ: Ye ɩ́ tɑlɑ ɩcɑtɛ tɑɑ nɑ ɩ́ sʋʋ tǝyɑɣɑ ŋkɑ kɑ tɑɑ, ɩ́ cɑɣɑ tǝnɑ hɑlǝnɑ mǝ kʋlʋɣʋ.

¹¹Nɑ ye pɑ tɑ mʋ-mɛɣɛ tiili yɑɑ pɑ tɑ nɩɩnɑ-mɛ, ɩ́ lɩɩ tǝnɑ nɑ ɩ́ kpiisi-wɛɣɛ mǝ nɔɔhɛɛ mʋsʋɣʋ, nɑ pǝ́ hʋlɩ-wɛ sɩ ɩ́ kpɑɑlɑ-wɛ.

¹²Ḿpʋ́ɣʋ́ Yesu ɩfɑlɑɑ tɛɛwɑ nɑ pɑ́ lɑkɩ yǝlɑɑ kɛ wɑɑsʋ sɩ pɑ́ lɑɣɑsɩ tɔntɛ.

¹³Nɑ pɑ́ tɔɣɔnɩ ɑlɔɣɑɑ pɑɣɑlɛ, nɑ pɑ́ tɑɑ kʋtɔntʋnɑɑ pɑɣɑlɛ kɛ nim nɑ pǝ́ wɑɑ-wɛ.

¹⁴Yesu hǝtɛ tɔŋnɑ yɑɑʋ kɛ pɑɑ timpi. Ḿpʋ́ɣʋ́ wulɑʋ Helɔtɩ nɩɩ Yesu tɑŋ. Nɑ yǝlɑɑ lɛlɑɑ nɑ́ɑ́ tɔŋ sɩ: Ɩsɔ Lʋm Sɔlʋ Yohɑɑnɩ ɩ́lɛ́ ɩ femnɑ. Pǝ tɔɔ kɛ́ ɩ wɛnɑ piti tǝmɑ lɑpʋ pǝsʋɣʋ.

¹⁵Ɩlɛnɑ lɛlɑɑ sɩ Ilii lɩɩnɑ. Pǝ kɑɑsɩ lɛlɑɑ nɑ́ tɔŋ sɩ lɔŋtɑɑ Ɩsɔ kʋyɔɣɔtʋtʋ tɛlǝsǝlɑɑ tɑkɑ nɔɣɔlʋɣʋ.

¹⁶Helɔtɩ nɩɩ mpʋ, ɩlɛnɑ ɩ́ tɔ sɩ: Lʋm Sɔlʋ Yohɑɑnɩ wei ɩ nyʋɣʋ mɑ yelɑɑ nɑ pɑ́ sɛtɩ tɔ ɩnɩ ɩ femnɑ.

¹⁷Nn kʋpɑm, wulɑʋ Helɔtɩ ɩnɩ ɩ kɑ tɔmnɑ sɩ pɑ́ kpɑ Yohɑɑnɩ nɑ pɑ́ hɔkɔ-ɩ nɑ pɑ́ tʋ-ɩ sɑlǝkɑ tɑɑ. Pǝ tɑɣɑ pʋlʋ tɔɔ kɛ́ Helɔtɩ lɑpɑ mpʋ. Ɩ kɑ kpɑɣɑ ɩ tɑɑlʋ Filipʋ ɑlʋ Helɔtiyɑtɩ kɛ́.

¹⁸Ɩlɛnɑ Yohɑɑnɩ yɔɣɔtɩ-ɩ sɩ: Pǝ tɑ mʋnɑ sɩ ń lɛɛkɩ nyɑ́ tɑɑlʋ ɑlʋ nɑ ń sɩɩnɑ nyɑ́ tɩ.

¹⁹Ḿpʋ́ɣʋ́ Helɔtiyɑtɩ tɑɑ wɩɩnɑ Yohɑɑnɩ kɛ sɔsɔm, nɑ ɩ́ pɛɛkǝɣɩ sɩ ɩ kʋ-ɩ. Amɑ Helɔtɩ tɔɔ ɩ tɑ pǝsɩ nɑ ɩ́ lɑ pʋlʋ.

²⁰Pǝ tɑɣɑ pʋlʋ tɔɔ, wulɑʋ Helɔtɩ nyǝ́mɑ sɩ Yohɑɑnɩ kɛ́ yʋlʋ kʋpɑŋ, ɩ kɛ́ Ɩsɔ yʋlʋ. Pǝyele ɩ nyɑŋɑɣɑnɑ-ɩ kɛ́, nɑ ɩ́ kentiɣi ɩ tɔɔ. Ye ɩ nɩɩ Yohɑɑnɩ tɔm pǝ pɛkǝlǝɣɩ-ɩ ɩ tɑɑ kɛ́. Pɑɑ nɑ mpʋ ɩ nyɩɩlɑɣɑ sɩ ɩ́ nɩɩkɩ-tɩ.

²¹Ḿpʋ́ɣʋ́ wulɑʋ Helɔtɩ lʋlʋɣʋ kʋyɑkʋ ɑcimɑ tɑlɑɑ. Nɑ ɩ́ lɑ ɑcimɑ nɑ ɩ́ yɑɑ ɩ kɑwulɑɣɑ tɑɑ sɔsɑɑ sɔsɑɑ nɑ yoolɑɑ sɔsɑɑ, nɑ Kɑlilee tɛtʋ tɑɑ nyʋɣʋ nyǝ́mɑ nyʋɣʋ nyǝ́mɑ. Sɛsɛ pǝ wɛɛ sɩ kʋyɑkʋ ŋkʋɣʋ Helɔtiyɑtɩ kɑ́ hiki mpi ɩ pɛɛkɑɣɑ tɔ.

²²Ḿpʋ́ɣʋ́ Helɔtiyɑtɩ ɩnɩ ɩ pɛɛlɔ sʋʋ timpi yǝlɑɑ sɛɛ mpʋ tɔ nɑ ɩ́ pɑɑ. Ntɛnɑ pǝ́ lɑ Helɔtɩ nɑ ɩ mʋʋlɑɑ mpɛɣɛ leleŋ. Tǝnɑɣɑ Helɔtɩ tɔmɑ pɛɛlɔ ɩnɩ sɩ: Sǝlǝmɩ-m mpi n cɑɑ tɔ, mɑɑ hɑ-ŋ.

²³Hɑlǝnɑ Helɔtɩ tuu sɩ pɑɑ mpiɣi ɩ sǝlǝmɑ-ɩ, ɩnɩ ɩ kɑ́ hɑ-ɩ. Pɑɑ ɩnɩ ɩ kɑwulɑɣɑ mɑɣɑmɑɣɑ hɔɣɔlʋɣʋ.

²⁴Pɛɛlɔ ɩnɩ ɩ lɩɩwɑ, ɩlɛnɑ ɩ́ polo ɩ pɔɔsɩ ɩ too sɩ: Pepeɣe mɑ sǝlǝmɩ-ɩ? Ɩlɛnɑ toto cɔ-ɩ sɩ: Tɔ sɩ ɩ́ hɑ-ŋ Ɩsɔ Lʋm Sɔlʋ Yohɑɑnɩ nyʋɣʋ.

²⁵Tǝnɑɣɑ ɩ mǝlɑ wulɑʋ kiŋ kɛ kpɑkpɑɑ nɑ ɩ́ tɔ sɩ: Mɑ cɑɑ sɩ ń hɑ-m Ɩsɔ Lʋm Sɔlʋ Yohɑɑnɩ nyʋɣʋ kɛ nyǝnɑɣɑ tɑɑ kɛ́ cǝnɛɣɛ nɔɔnɔɔ.

²⁶Ḿpʋ́ɣʋ́ wulɑʋ Helɔtɩ lɑŋlɛ wɑkǝlɑ sɔsɔm. Amɑ ɩ tɛmɑ tuuu kɛ ɩ mʋʋlɑɑ mpɛ pɑ tǝnɑ pɑ ɩsɛntɑɑ, ɩlɛ pǝ fɛɩ sɩ ɩ kɑ́ kisi.

²⁷Tǝnɑɣɑ ɩ tilɑ tɑŋlɑɑ tɑɑ nɔɣɔlʋɣʋ kpɑkpɑɑ sɩ ɩ́ polo ɩ́ kɔnɑ Ɩsɔ Lʋm Sɔlʋ Yohɑɑnɩ nyʋɣʋ. Ɩlɛnɑ tɑŋlʋ nɑ́ɑ́ tɛɛ sɑlǝkɑ nɑŋ tɑɑ nɑ ɩ́ sɛtɩ Yohɑɑnɩ nyʋɣʋ.

²⁸Nɑ ɩ́ tʋ-kʋɣʋ nyǝnɑɣɑ tɑɑ nɑ ɩ́ kɔɔ ɩ́ cɛlɑ pɛɛlɔ ɩnɩ, nɑ ɩ́lɛ́ ɩ polo ɩ́ cɛlɑ ɩ too.

²⁹Yohɑɑnɩ ɩfɑlɑɑ nɩɩ mpʋ, ɩlɛnɑ pɑ́ polo pɑ́ kpɑɣɑ Yohɑɑnɩ nɑ pɑ́ pi.

³⁰Ḿpʋ́ɣʋ́ Yesu tillɑɑ mǝlɑɑ, ɩlɛnɑ pɑ́ kɛɛsɩ-ɩ pǝ tǝnɑ mpi pɑ lɑpɑ nɑ pɑ sɛɣɛsɑɑ tɔ.

³¹Mpɑ pɑ pukɑɣɑ Yesu kiŋ, nɑ mpɑ pɑ kʋlɑɣɑɑ sɩ pɑ kpeŋ tɔ pɑ pɑɣɑlɛ fɛɩ kɛɛsʋɣʋ. Hɑlǝnɑ Yesu nɑ ɩ ɩfɑlɑɑ pɑ tɑ nɑ ɩsɛ sɩ pɑ́ tɔɣɔ tɔɣɔʋ mɑɣɑmɑɣɑ. Ɩlɛnɑ Yesu tɔ ɩ ɩfɑlɑɑ sɩ: Ɩ́ kɔɔ nɑ tǝ́ lɩɩnɑ kpeeŋɑ kɛ timpi nɔɣɔlʋ fɛɩ tɔ nɑ ɩ́ hɛɛsɩ pǝcɔ mɑɣɑmɑɣɑ.

³²Ḿpʋ́ɣʋ́ Yesu nɑ ɩ ɩfɑlɑɑ pɑ sʋʋ kpɩɩlʋɣʋ kɛ pɑ tike nɑ pɑ́ tɛɛnɑ kpeeŋɑ tɔɔ.

³³Amɑ yǝlɑɑ pɑɣɑlɛ loosɑ-wɛ nɑ pɑ́ nyɩ-wɛɣɛ kpɑkpɑɑ. Ɩlɛnɑ yǝlɑɑ lɩɩ ɑcɑlɛɛ ɑcɑlɛɛ nɑ pɑ́ kpɑɣɑ ɑsewɑ nɑ pɑ́ lɑɑlɩ-wɛɣɛ tǝnɑɣɑ tɑtɛ.

³⁴Yesu lɩɩnɑ kpɩɩlʋɣʋ tɑɑ nɑ ɩ́ nɑ yǝlɑɑ sɑmɑɑ, ɩlɛnɑ pɑ tɔm lɑpɩ-ɩ pǝtɔɔtǝlɛ kɛ sɔsɔm. Pǝ tɑɣɑ pʋlʋ tɔɔ, pɑ nǝɣǝsǝnɑ kɛ́ ɩsɩɩ heeŋ wei ɩ fɛɩnɑ tiikilu tɔ. Ḿpʋ́ɣʋ́ ɩ sɛɣɛsɑ-wɛɣɛ sɔsɔm.

³⁵Pǝ kɔmɑ tɑɑnɑɣɑ ɩlɛnɑ ɩ ɩfɑlɑɑ polo nɑ pɑ́ tɔmɩ-ɩ sɩ: Cǝnɛ kɛ́ nyɩɩtʋ tɑɑ kɛ́, nɑ ilim tɛmɑ.

³⁶Tɔɣɔnɩ-wɛ nɑ pɑ́ yɛlɩ kʋtɔɣɔʋ yɑpʋ kɛ pǝcɔlɔ pǝcɔlɔ cɑcɑkǝŋ tɛɛ nɑ pǝ ɑcɑlɛɛ tɑɑ.

³⁷Tǝnɑɣɑ Yesu tɔmɑ-wɛ sɩ: Mɩɩ hɑnɑ-wɛɣɛ tɔɣɔnɑɣɑ kɛ mǝ mɑɣɑmɑɣɑ. Ḿpʋ́ɣʋ́ Yesu ɩfɑlɑɑ pɔɔsɑ-ɩ sɩ: Pɑɑ tɩɩ polo nɑ tǝ́ yɑ kʋtɔɣɔʋ kɛ Liɣitee nyǝɣǝtʋ ŋmʋnʋɣʋ (200), pɩɩ tɑlɑ yǝlɑɑ pɑnɛɣɛ we?

³⁸Tǝnɑɣɑ Yesu tɔmɑ-wɛ sɩ: Ɩ́ polo nɑ ɩ́ wiili nɑ mɑ́ nɑ́, potopotonɑɑ ɩsǝnɑɣɑ ɩ́ wɛnɑ? Yesu ɩfɑlɑɑ wiilɑɑ, ɩlɛnɑ pɑ́ heeli-ɩ sɩ: Potopotonɑɑ kɑkpɑsɩ nɑ pǝ kɑɑsɩ tiinɑ kɛ nɑɑlɛ.

³⁹Ḿpʋ́ɣʋ́ Yesu tɔmɑ ɩ ɩfɑlɑɑ sɩ: Ɩ́ cɑɣɑsɩ sɑmɑɑ tǝnɑɣɑ tintikɑ tintikɑ kɛ nyǝlǝwee tɔɔ.

⁴⁰Tǝnɑɣɑ pɑ cɑɣɑ loosi, lɛlɑɑ kɛ nɩɩnʋwɑ (100) nɩɩnʋwɑ (100), lɛlɑɑ kɛ nɩɩlɛ nɑ nɑɑnʋwɑ nɑɑnʋwɑ.

⁴¹Tǝnɑɣɑ Yesu kpɑɣɑ potopotonɑɑ kɑkpɑsɩ nɑ tiinɑ nɑɑlɛ ɩnɩ, nɑ ɩ́ teki ɩsɛ nɑ ɩ́ sɛɛ Ɩsɔ kɛ́ ɩ́ nɑ tǝmlɛ, nɑ ɩ́ fɑɣɑ-wɛ nɑ ɩ́ cɛlɑ ɩ ɩfɑlɑɑ sɩ pɑ́ tɑlɑ yǝlɑɑ. Nɑ ɩ́ tɛɛsɩ tiinɑ nɑɑlɛ kɛ mpʋ tɔtɔ, nɑ pɑ́ tɑlɑ pɑ tǝnɑ tǝpɑɩ.

⁴²Ḿpʋ́ɣʋ́ pɑ tǝnɑ pɑ tɔɣɑɑ nɑ pɑ́ hɑɣɑ.

⁴³Nɑ ɩ ɩfɑlɑɑ koti hɔɣɔlɑsɩ nsi sɩ kpisɑɑ tɔ, nɑ pǝ́ su tɔkʋŋ nɑɑnʋwɑ nɑ nɑɑlɛ.

⁴⁴Mpɑ pɑ tɔɣɔ mpʋ tɔ pɑ tɑɑ ɑpɑlɑɑ nyɔɔŋ tɑlɑ ɩsɩɩ iyisi kɑkpɑsɩ (5000).

⁴⁵Ḿpʋ́ɣʋ́ Yesu tɔmɑ ɩ ɩfɑlɑɑ kɛ pǝ wɑɑlɩ kɛ́ kpɑkpɑɑ sɩ: Ɩ́ sʋʋ kpɩɩlʋɣʋ nɑ ɩ́ tɛɛ-m nɔɣɔ nɑ ɩ́ tɛsǝnɑ Pɛtɛsɑitɑ ɩcɑtɛ tɔɔ. Ɩlɛnɑ Yesu nɑ́ɑ́ sɑɑlɩ tǝnɑ nɑ ɩ́ pɑɑsǝnɑ sɑmɑɑ yɑsʋɣʋ.

⁴⁶Pɑ yɑ tǝmɑ, ɩlɛnɑ Yesu polo ɩ́ kpɑ pʋɣʋ nɑkʋlɩ kʋ tɔɔ kɛ́ Ɩsɔ sǝlǝmʋɣʋ.

⁴⁷Pǝ kɔmɑ yuɣu, ɩlɛ kpɩɩlʋɣʋ tɑlɑ teŋku hɛkʋ tɑɑ kɛlɛ, nɑ Yesu wɛ ɩ tike kɛ tɛtʋ tɔɔ.

⁴⁸Ḿpʋ́ɣʋ́ ɩ loosɑ-wɛ nɑ pɑ́ sɑɑkɩ kpɩɩlʋɣʋ pǝ fɛɩ pǝ polo. Heelim mɑkɩ tuluŋɑ kɛ́ nɑ pǝ́ mǝlǝɣǝnɑ-wɛ nɑ wɑɑlɩ wɑɑlɩ. Ḿpʋ́ɣʋ́ Yesu tɔmɑ lʋm tɔɔ nɑ ɩ́ puki pɑ kiŋ. Sɑɑ ɩnɩ pǝ wʋsǝnɑ kɑmpɑɑŋ koou kɛ mpʋ.

⁴⁹Pɑ nɑ-ɩ nɑ ɩ́ tɔŋ lʋm tɔɔ, ɩlɛnɑ pɑ́ hʋʋ sɩ ɑsǝnɑɑlɩɩ, nɑ pɑ́ sʋʋ kɑpusi mɑpʋ.

⁵⁰Pǝ tɑɣɑ pʋlʋ tɔɔ, pɑ tǝnɑ pɑ nɑɑkɑɣɑ-ɩ mpʋ tɔ pǝ lɑpɑ-wɛɣɛ sɔɣɔntʋ kɛ sɔsɔm kɛ́. Amɑ ɩ tɔmɑ-wɛ sɩ: Ɩ́ tɔkɩ tɔnǝŋ, mɑɣɑ, ɩ́ tɑɑ nyɑ́.

⁵¹Ɩ yɔɣɔtɑ mpʋ, ɩlɛnɑ ɩ́ kpɑ pɑ kiŋ kɛ kpɩɩlʋɣʋ tɑɑ nɑ ɩ́ cɑɣɑ nɑ heelim hɛɛ, nɑ piti kpɑ ɩ ɩfɑlɑɑ kɛ sɔsɔm.

⁵²Pǝ tɑɣɑ pʋlʋ tɔɔ, pɑ tɑ cɛkǝnɑ potopotonɑɑ mpɛ pɑ piti tǝmlɛ kɛ pɑ lɑŋkpɩɩsǝŋ tɔɔ.

⁵³Yesu nɑ ɩ ɩfɑlɑɑ pɑ tɛɛsɑ tɛsʋɣʋ kɛ lʋm nɑ pɑ́ tɑlɑ Kenesɑlɛtɩ tɛtʋ tɑɑ, ɩlɛnɑ pɑ́ tʋ pɑ kpɩɩlʋɣʋ nɑ kʋteŋ.