Marka 6:9-53

⁹O yamiri ɓe ɓe ɓoornoo paɗe, kaa pati ɓe naɓora saayaaji ɗiɗi.

¹⁰O wii ɓe kasen: —Galle fuu mo njippi-ɗon e mum, keddo-ɗon ɗon faa nde iw-ɗon e oon nokku fuu.

¹¹So on ngarii e nokku, yimɓe njaɓɓaaki on naa kettinanaaki on, iwon ton, piɗɗon colla koyɗe mooɗon faa jeertina ɓe ko ɓe ngaɗi koo ana boni.

¹²Ɓe njehi, ɓe mbaajii yimɓe ɓee tuuba,

¹³ɓe ndibbi seyɗaani'en heewɓe, ɓe nguji nebam e ɲawɓe heewɓe ɓe cellini ɗum'en.

¹⁴Hirudus, kaananke oo, nani haala Iisaa ana haalee, sabi innde Iisaa walaa fuu ɗo yottaaki. Won wiyooɓe Yaayaa mo lootogal batisima wuurti, ɗum waɗi so o jogii baawɗe waɗude kaayɗe.

¹⁵Woɓɓe ana mbiya o annabi Iliyaasa. Woɓɓe duu ana mbiya o annabaajo no annabaaɓe aranndeeɓe ɓee nii.

¹⁶Nde Hirudus nani ɗum ndee, wii: —Yaayaa mo taƴunoo-mi hoore mum oo, kaɲum wuurti!

¹⁷Tawi Hirudus yamiriino Yaayaa nanngee, haɓɓee, uddee ley kasu. Saabe Hirudiya jom suudu mawniiko biyeteeɗo Filipa mo o ɓamnoo oo, waɗi.

¹⁸Sabi Yaayaa ana wiyannoo mo: —Dagantaako ma teetaa jom suudu mawna.

¹⁹Hirudiya mettaa e Yaayaa, yiɗi o waree, kaa heɓaali laawol,

²⁰sabi Hirudus ana hulannoo Yaayaa, ana anndunoo o gorko pooccitiiɗo, ceniiɗo. Ɗum waɗi so omo haybannoo ɗum. So o hettinike haala mum, hakkille makko jiiɓoto, haya kasen duu omo yiɗi hettinaade ɗum.

²¹Kaa noo, Hirudiya heɓi laawol ɲannde yiitu-mawuuri rimeede Hirudus. Hirudus waɗani howruuɓe mum e hooreeɓe sordaasi'en ɓee e inndee-anndee'en Galili ɓee fuu hiraande.

²²Ɓii Hirudiya debbo naati ana woma. Ɗum weli Hirudus e nootiiɓe ɗum ɓee fuu. O wii suka debbo oo: —Haalanam ko njiɗ-ɗaa faa mi waɗane.

²³O hunanii ɗum, o wii o hokkan ɗum huunde fuu ko ɲaagii mo, fay so tawii feccere laamu makko oo.

²⁴E ley ɗum, suka debbo oo yalti, wii inna mum: —Koɗum kaan-mi ɲaagaade? Inniraaɗo oo jaabii mo, wii: —Ɲaaga mo hoore Yaayaa mo lootogal batisima oo!

²⁵Suka debbo oo heɲii, wirfitii to kaananke oo too, ɲaagii ɗum, wii: —Ko njiɗu-mi, ngaddanaa kam jooni jooni hoore Yaayaa mo lootogal batisima oo e la'al!

²⁶Terɗe Hirudus mbaati faa wanaa seese, kaa nde wonnoo o hunike yeeso nootiiɓe mo ɓee, o waɲi yaltude e konngol makko ngol.

²⁷O neli ɗon e ɗon gooto e sordaasi'en doomooɓe mo ɓee, o yamiri ɗum yo waddoy hoore Yaayaa. Sordaasi oo wirfitii, naati e ley kasu oo, taƴi hoore Yaayaa,

²⁸tummbi e la'al, waddi, hokki suka debbo oo. Suka debbo oo duu hokki inna mum.

²⁹Nde taalibaaɓe Yaayaa ɓee nani ɗum ndee, ngari ɓamti tew makko oo, ngaɗoyi ɗum e yanaande.

³⁰Nelaaɓe ɓee ngarti e Iisaa, njantanii ɗum ko ngaɗi koo e ko mbaajii koo fuu.

³¹O wii ɓe: —Njehen nokku teelɗo, yalla oɗon keɓa fowtinaade. Sabi yaha-warta ana heewi, faa kanko e taalibaaɓe makko ɓee, ɓe ndonki heɓude fay no ɓe ɲaamira.

³²Ɓe njehi ɓe naatoyi laana, ɓe teeli kamɓe tan e feere maɓɓe,

³³tawi heewɓe njii eɓe njaha, annditi to ɓe peewi. Yimɓe heewɓe iwri e geelle ɗee fuu, keɲanii to ɓe peewi too, adii ɓe yottaade.

³⁴Nde o yalti e laana kaa ndee, o yii jamaa keewɗo. O yurminaa ɓe sanne, sabi eɓe mba'i no baali ɗi ngalaa duroowo nii. O darii omo waajoo ɓe kulle keewɗe.

³⁵Nde hiiri ndee, taalibaaɓe ɓee ɓattitii mo, mbii: —Jooni hiirii, kasen duu nokku oo yo ladde.

³⁶Yoppitin jamaa oo saakoo e geelle e daakaaji piliiɗi ɗii yalla ana coodoya ko ɲaama.

³⁷O jaabii ɓe, o wii: —Onon e ko'e mooɗon, ndokkee ɓe ko ɓe ɲaama! Non ɓe lamndii mo, ɓe mbii: —Ndennoo aɗa yiɗi min ɓama buuɗi cardi teemeɗe ɗiɗi min coodanoya ɓe buuru ko ɓe ɲaama?

³⁸E oon wakkati, o wii ɓe: —Hono foti buuruuje njogi-ɗon? Njehee ƴeewoyee! Nde ɓe njehi ɓe kumpitoyii ndee, ɓe mbii mo: —Buuruuje joy e liɗɗi ɗiɗi min njogii.

³⁹O yamiri taalibaaɓe ɓee njoƴƴinira jamaa oo tunaale-tunaale dow huɗo hecco.

⁴⁰Ɓe njooɗii ɓe ngaɗi tunaale-tunaale, yoga teemedere neɗɗo, yoga capanɗe njoyon.

⁴¹O ɓami buuruuje joy ɗee e liɗɗi ɗiɗi ɗii, o tiggitii kammu, o yetti Laamɗo. O taƴi buuru oo, o hokki taalibaaɓe ɓee njeɗa yimɓe ɓee. Hono non liɗɗi ɗiɗi ɗii duu.

⁴²Ɓe fuu ɓe ɲaami faa ɓe keddi.

⁴³Taalibaaɓe ɓee ndeentini kedde ɗee, kebbini cagiije sappo e ɗiɗi.

⁴⁴Ujunaaji joy gorko ɲaamunoo buuru oo.

⁴⁵Ɗon tan, Iisaa yamiri taalibaaɓe mum naata laana kaa yalla ana adoo ɗum oo too bannge weendu nduu faade Baytisayda, tawi kanko e hoore makko omo wondi e yoppitinde jamaa oo.

⁴⁶Nde o seerti e maɓɓe ndee, o ŋabboyi dow waamnde haayre faa o waɗa duwaawu.

⁴⁷Nde jemma wari ndee, tawi laana kaa ana hakkunde weendu too, kanko tan gooto heddii njoorndi.

⁴⁸O soynii taalibaaɓe ɓee ana ngurfa ko mbaawi fuu, sabi ɓe njaɓɓotooɓe henndu. Nde ɓadinoo weetude ndee, o wari e maɓɓe omo yaara koyɗe dow ndiyam ɗam, faa o hosi ƴaɓɓaade ɓe.

⁴⁹Kaa nde ɓe njii mo omo yaha e dow ndiyam ɗam ndee, ɓe cikki ɗum seyɗaani, ɓe ndarii eɓe ngulla,

⁵⁰sabi ɓe fuu, nde ɓe njiinoo mo ndee, ɓe kulii. Ɗon e ɗon Iisaa wii ɓe: —Mbaaltinee hakkillaaji mooɗon! Miin, mi Iisaa, pati kulee!

⁵¹O naati laana kaa, o tawti ɓe, henndu nduu darii. Ɓe mugaa.

⁵²Ɓe paamaano haaynde nde Iisaa waɗiri buuru oo ndee, sabi ɓe wumɓe ɓerɗe.

⁵³Ɓe lummbi weendu nduu, ɓe njottii Genesaret, ɓe panndi ɗon.