Markus 6:9-53

⁹Oupwe ipweipw sus, nge ousap uwou aruachön üfemi.”

¹⁰A pwal üreniir, “Lon meni leni ra etiwakemi, oupwe nonom lon ewe imw tori ämi oupwe towu seni ewe telinimw.

¹¹Nge are oupwe tori eu telinimw, nge resap etiwakemi ika aüselingakemi, oupwe towu seni ei telinimw o wichikala pwülün fän pechemi, pwe epwe eu minen pwärätä ngeniir, pwe ra mwäl.”

¹²Iwe, ra feila o afalafala ekewe aramas pwe repwe aier seni ar tipis.

¹³Ra asüela chomong anün rochopwak, ra pwal epiti chomong chon samau ren lö seni föün olif o apöchöküleer.

¹⁴Iwe, ewe king Herotes a rong usun pworausen Jesus, pwe itan a föüla ekis meinisin. Ekoch aramas ra apasa, “Johannes Soupapatais a manausefäl seni mäla. Iei popun a wor an tufich le föri ekewe manaman.”

¹⁵Nge ekoch ra apasa, “Ätei Elias,” nge pwal ekoch ra apasa, “Ätei eman soufos usun eman ekewe soufosun lom.”

¹⁶Lupwen Herotes a rong ekei kapas a apasa, “Johannes, ätewe üa pöküela üan a manausefäl.”

¹⁷Pun Herotes a allük, pwe repwe turufi Johannes, repwe föti o atolonga lon imwen fötek. Herotes a föri ei föför pokiten Herotias pwülüen pwiin we Filip, i a pwülüeni seni.

¹⁸Pun Johannes Soupapatais a apasa, “Esap pwüng ngonuk om kopwe pwülüeni pwülüen pwiüm we.”

¹⁹Iei mine Herotias a fokun song ngeni Johannes o a ekieki an epwe niela. Nge esap tongeni pokiten Herotes.

²⁰Iwe, Herotes a meniniti Johannes, pun a silei pwe i eman mwän mi pwüng o pin, iei mine a tümwünü, pwe esap tori feiengau. Herotes a sani an epwe rongorong ngeni än Johannes afalafal, inamwo ika a tolong lon watten osukosuk, lupwen a rongorong ngeni.

²¹Nge feilfeil a tori eu fansoun mi fich pwe än Herotias ekiek epwele pwönüetä. Ei a fis lon ränin uputiuen Herotes, lupwen a föri eu kametip fän iten nöün kewe nöüwis, nöün kewe meilapen sounfiu me ekewe aramas tekia lon Kalilea.

²²Iwe, nöün Herotias we föpwül a tolong lon ewe leni o a pworuk, pwe Herotes me chokewe mi eti le mongö ra pwapwaiti. Iei mine a üreni ewe föpwül, “Met ka mochen üpwe ngonuk? Ngang üpwe ngonuk meinisin.”

²³A pwal allükülükü an pwon fän akapel, “Meinisin mine ka tüngor üpwe ngonuk, inamwo ika esopun mwüi.”

²⁴Iei mine ewe föpwül a feila ren inan we o aisini, “Met ngang üpwe tüngor?” Nge inan we a pölüeni, “Kopwe tüngor möküren Johannes Soupapatais.”

²⁵Iwe, ewe föpwül a müttir liwinla ren ewe king o tüngor ngeni, “Üa mochen pwe iei chök kopwe ngeniei möküren Johannes Soupapatais lon eu sepi.”

²⁶Iwe, ewe king a fokun letipeta ren ei tüngor. Nge pokiten an pwon fän akapel pwal pokiten chokewe mi eti le mongö a tipeeu ngeni an we tüngor.

²⁷Iei mine lon ewe chök otun Herotes a tinala eman sounfiu seni ewe mwichen chon tümwünü ewe king o a allük ngeni, pwe epwe uwato möküren Johannes. Iwe, ewe sounfiu a feila lon ewe imwen fötek o pöküela üen Johannes.

²⁸Mürin a uwala ewe mökür lon eu sepi o ngeni ewe föpwül, nge i a ngeni inan we.

²⁹Iwe, lupwen nöün Johannes kewe chon kaiö ra rong ei pworaus, ra feila o angei somän Johannes o peiaseni.

³⁰Iwe, nöün Jesus kewe chon kaiö ra liwinto ren Jesus o apworausa ngeni meinisin mine ra föri, pwal mine ra eäni afalafal.

³¹A fokun wor chomong aramas mi feito o feila, pwe Jesus me nöün kewe chon kaiö esap chüen mwo nge wor fansoun ar repwe mongö. Iei mine Jesus a üreniir, “Ousipwe feila oukich chök lon eu leni mi toau seni lenien aramas, pwe oupwe tongeni ekis asösö.”

³²Iei mine ra tötä won efoch wa o saila ngeni eu leni mi toau seni lenien aramas.

³³Nge chomong aramas ra küneer lupwen ra saila o ra müttir silleniir. Iei mine ra feila seni ekewe telinimw meinisin o säla mwer, pwe ra tori ewe leni mwen Jesus me nöün kewe chon kaiö resamwo tori.

³⁴Iwe, lupwen Jesus a tötiu seni ewe wa, a küna eu mwichen aramas mi chomong. Iwe, a fokun tongeer, pun ra wewe ngeni sip esap wor nöür chon mas. Iei mine a popuetä le afalafala ngeniir chomong mettoch.

³⁵Iwe, lupwen a lekuniol, nöün kewe chon kaiö ra feito ren o üreni, “A fen lekuniol, nge ei leni a toau seni lenien aramas.

³⁶Kopwe tinala ekewe aramas, pwe repwe feila lon ekewe leni me sopw mi arap pwe repwe kamö aner mongö.”

³⁷Nge Jesus a üreniir, “Ämi oupwe ngeniir met repwe mongö.” Iwe, ra aisini, “Ka mochen aipwe feila kamö pilawa won ükükün ruopükü föün moni silifer, pwe repwe mongö?”

³⁸Iwe, Jesus a aisiniir, “Fiteföü pilawa mi wor remi? Oupwe feila o pii.” Nge lupwen ra küna, ra üreni Jesus, “A wor limeföü pilawa me ruoman ik.”

³⁹Mürin Jesus allük ngeni nöün kewe chon kaiö, “Oupwe üreni ekewe aramas, pwe repwe mottiu lein ekewe fetil lon eu mwich me eu mwich.”

⁴⁰Iei mine ekewe aramas ra mottiu lon en me an mwich, ipükü lon ekoch mwich, nge lime pwal lon ekoch mwich.

⁴¹Mürin Jesus a angei ekewe limeföü pilawa me ekewe ruoman ik, a sachetä läng o iotekin kilisou ngeni Kot won. A kinikisiretiu o a ngeni nöün kewe chon kaiö, pwe repwe ineti ngeni ekewe aramas. A pwal ineti ekewe ruoman ik, pwe epwe tori ekewe aramas meinisin.

⁴²Iwe, ir meinisin ra mongö o ra mötüla.

⁴³Mürin ekewe chon kaiö ra ionifengeni o amasoua engol me ruu chüük ren lusun ekewe pilawa me ekewe ik.

⁴⁴Iwe, iteiten ekewe mwän mi mongö ükükün limungeröü.

⁴⁵Iwe, lon ewe chök otun Jesus a apacheua nöün kewe chon kaiö, pwe repwe tötä won ewe wa o akomwola mwan Petsaita epek ewe noom. Nge i epwe üreni ekewe aramas pwe repwe liwinla ngeni lenier.

⁴⁶Mürin an kapong ngeni ekewe aramas, Jesus a feita won eu chuk pwe epwe iotek.

⁴⁷Lupwen a pwinila, ewe wa a tori lukalapen ewe noom, nge Jesus a emanüla winifanü.

⁴⁸Iwe, a küna pwe nöün kewe chon kaiö ra pekus le fötül, pun ewe asepwäl a enito me mwer. Iwe, wünümweerän ina epwe lefilen kulok ülüngat me kulok wonu, Jesus a feito rer, nge a fetal won matau. Jesus a fetaleto o sänger seniir.

⁴⁹Nge lupwen ra küna pwe a fetal won ewe matau, ra ekieki pwe i eman anü. Iei mine ra puchörütä,

⁵⁰pun ir meinisin ra küna i o ra fokun rükö ren. Lon ei chök otun Jesus a kapas ngeniir o üreniir, “Oupwe tipepwora! Ngang ei. Ousap niuokus.”

⁵¹Mürin Jesus a tötä won waar we, nge ewe asepwäl a manasösötiu. Iwe, ir meinisin ra fokun weitifengeniir,

⁵²pun resap mwo weweiti met wewen än Jesus ineti ekewe föün pilawa, resap fokun miritila ren.

⁵³Iwe, ra saila pekilan ewe noom o tori ewe fanü lon Kenesaret. Ikenan ra emisini waar we.