SAN MARCOS 6:9-53

⁹Jalakjunil ni katachꞌantanul ixvarachikꞌan, vachuꞌ katalhaꞌal vamun aqxtaun ixlaqchꞌitkꞌan, jantu aqxtꞌuy.

¹⁰Jalakjunil: —Tejkan kꞌatꞌanutꞌachipitik ni aqataun chaqaꞌ, va ancha katꞌaulꞌalhiyapitikcha tus tejkan katꞌaxtꞌuchꞌoꞌoyapitik ni anchanuꞌ putaulan.

¹¹Incha jantu katalaqaꞌiyan, incha jantu kataqalasmakputunan, ex katꞌaxtꞌuchꞌoꞌoyapitikcha. Kachꞌankꞌalapꞌuxkꞌanapitik ni pꞌoqxni la minchꞌajakꞌan, chuncha lay katakꞌatsal ni jantu ox yu tamakaniyan. Laqsaval klajunau, tejkan kaminaꞌ ni Dios mukꞌanaꞌ laqtaqal ex apalay ay kunaꞌ ixmaqanlqajnatkꞌan xajantu ni lapanakni yu ixtatꞌajun Sodoma kun Gomorra.

¹²Ex chuncha ixtꞌaltanan tataxtulcha laqputeꞌenin ni maqskꞌiniy katamapaxalcha ixjatapastakꞌatkꞌan ni lapanakni.

¹³Lhuvaj taqanꞌanin talakmaxtunil yu jantu ox espíritus. Vachuꞌ talhixapal lhuvaj taqanꞌanin kun aceite, va tamaꞌayajnichoqol.

¹⁴Ex yu lhachimoꞌonuꞌ Herodes va kꞌatsal yu tacha ixmakay ni Jesús. Tachun ni lapanakni ixtamispaꞌojoy yu ixmakay ni Jesús. Tanaul: —Ka va kujchoqotacha ni Juan yu jamaqchajꞌavanaꞌ. Ka xlhiyucha lhitꞌajun tapꞌasta ni lay kamakal ay axtoqnuꞌ.

¹⁵Alati lapanakni va ixtanajun: —Ka va Elías. Yu alati ixtanajun: —Va qayntaun yu ixlaqputeꞌey ixchivinti Dios maqancha.

¹⁶Tejkan chuncha qasmaklhi ni Herodes, va naul: —Ni anchanuꞌ va Juan, va yu ikmalaqachanal ixchaqxpꞌuxnika ixꞌaqtsul. Va tꞌajunchoqoycha.

¹⁷Ni Herodes ixmalaqachanantacha ixchꞌika ni Juan ex manul laka pachꞌin. Va chuncha ixnajun kamakal ixanati yu ixjunkan Herodías. Yucha ixjunitacha ixanati ni Felipe, yu ixlaqaj ni Herodes pero Herodes ixmaxtunitacha, va tꞌatsukul.

¹⁸Ni Juan va ixjunitacha ni Herodes: —Yu ixanati ni milaqaj jantu lay kꞌalhitsꞌukꞌu tacha mixanati.

¹⁹Xlhiyucha yu Herodías ayaj ixkajiy ni Juan va ixmaqniputun pero jantu lay kamaqnil.

²⁰Yu Herodes ixtalhauniy ni Juan, ixkꞌatsay va ox vas ixjunita ixjatsukunti, ixmakay yu tacha ixnajun Dios. Ex mas ni Herodías ixmaqniputun ni Juan, yu Herodes va ixlhistakta. Vachu tus ox ixꞌachajqasmakniy yu ixlaqputeꞌeniy ni Juan, mas jantu ox ixmalaqasiy yu ixlaqputeꞌey.

²¹Taval taun julchan ni Herodías va temal tacha pulay kamaqnil. Laqchaꞌalcha ixkꞌatan ni Herodes. Ni Herodes va makal taun ay lakvayti. Va laklhijunil ni lapanakni yu ixtaꞌaqtayjuy ali yu xaꞌukxtinin tropas, vachuꞌ alati yu xalajꞌay lapanakni yu ixtavilanal xalakatꞌun Galilea.

²²Ex chuncha yu istsiꞌi ni Herodías tanuchal taꞌan ixꞌalinta ni kꞌatan, va aqtayl jatꞌinin. Va ayaj maqamal ni Herodes, vachu yu ixtatꞌatꞌajun vaynin ayaj tamaqamal. Ex yu jalhachimoꞌonuꞌ Herodes va junil ni jatsiꞌi: —Kꞌiskꞌinin va yu uxintꞌicha achꞌaniy. Yu kitꞌin kakxtaqniyan.

²³Ex vachu junil: —Laqsaval ijkunan ni kakxtaqniyan yu kiskꞌiniy mas va tichichuncha kaval tus kaval pakltaun ni kilakamunukpaꞌ taꞌan klhichimoꞌoy.

²⁴Taval ni jatsiꞌi va al lhisakminin ixnati: —¿Tisunchacha kakskꞌiniyacha? Yu ixnati va junil: —Chavay ni uxintꞌi va kaskꞌiniyeꞌe ixꞌaqtsul ni Juan yu jamaqchajꞌavanaꞌ.

²⁵Ex chuncha ni jatsiꞌi va taun laqatsꞌalaj tanuchal taꞌan ixvil ni jalhachimoꞌonu, va junil: —Yu kitꞌin iknajun chavaycha niman kꞌixtꞌaqnin laqa ay plato yu ixꞌaqtsul ni Juan yu jamaqchajꞌavanaꞌ.

²⁶Tejkan chuncha junkal ni jalhachimoꞌonu Herodes, va ayaj maqaninil. Pero ixjunitacha ni laqsaval kaxtaqniyaꞌ yu kaskꞌinacha, vachu ni lapanakni yu lakjuntaꞌitacha lakvayti va taqasmakꞌol ixchivinti yu junil ni jatsiꞌi. Xlhiyucha jantucha lay kamapaxal ixjatapastakꞌati.

²⁷Ex chuncha ni jalhachimoꞌonuꞌ Herodes niman lhijunil qayntaun ixtropa kaꞌal iniꞌ ixꞌaqtsul ni Juan yu maqchajꞌavanaꞌ.

²⁸Ex ni tropa va al ni laka pachꞌin, va chaqxꞌinil ixꞌaqtsul ni Juan, ex lhiminil laqa ay plato, xtaqnilcha ni jatsiꞌi. Ex yu jatsiꞌi va maqxtaqnil ixnati ixꞌaqtsul ni Juan.

²⁹Ex chuncha yu ixtꞌaltanan ni Juan tejkan takꞌatsalcha ni maqnikal, va takiꞌinilcha ixlakatunaj. Va talhaꞌalcha maknunun laka putaknun.

³⁰Ex taval yu ixjamalaqachantacha ni Jesús va talaqminchoqol ni Jesús. Va talaqputeꞌel tachun yu tamakal ali yu tamalaninil.

³¹Ex ni Jesús va lakjunil ixtꞌaltanan: —Chavay ni uxiknankꞌan kꞌatꞌantꞌikcha taꞌan jantu tꞌujuꞌ lapanakni, kaꞌaucha jastaknan kilaqꞌamankꞌan. Yuꞌuncha va jantu lay katastaknal taun panchꞌixcha para katavayl, va por ixtamin, ixtaꞌan pumalhuu lapanakni. Xlhiyucha chuncha naul ni Jesús.

³²Ex va chuncha va tatajulcha laka barco. Va taꞌal jastaknan xꞌamankꞌan taꞌan jantu tꞌujuꞌ lapanakni.

³³Pero lhuvaj lapanakni talaqtsꞌil tejkan al, va talaqmispal. Ex chuncha pumalhuu xalapanakni ni laka putaulanaxna va tatakyauꞌal laka tꞌun. Taval yuꞌuncha pꞌunaj tachaꞌal, yu Jesús kun ixtꞌaltanan va astan tachaꞌal.

³⁴Tejkan ni Jesús taxtulcha laka barco va jalaqtsꞌil lhuvaj lapanakni. Va jalakmapaynil ni lapanakni, ixtaꞌalinta tacha borregos yu jantu kaꞌalil qayntaun yu kalaklhistaklhi. Ex chuncha ni Jesús aqtaylcha jalakmalaniy, va pulhuu chivinti jalakmasunil.

³⁵Ex chuncha tejkan toqoxalcha ixtꞌaltanan ni Jesús talaqmil, va tanajun: —Aniy jantu tꞌujuꞌ chaqan, chavaycha toqoxalcha.

³⁶Kꞌalakmastꞌakꞌachꞌoꞌo ni lapanakni kataꞌanchalcha inin ixvaytikꞌan ukstsꞌuniy taꞌan alin lakstꞌuniy putaulanaxna.

³⁷Ex ni Jesús va lakjunil: —Uxiknankꞌan kalakvavatꞌik. Ex yuꞌuncha va tanaul: —¿Ex kijnankꞌan kajkꞌanau inin vayti para kaklakvavayau? Maqskꞌiniy lhuu tumin ni kaklhiꞌiu yu kataꞌul, kaval 200 julchan lhitapatsa.

³⁸Ex chuncha ni Jesús va naul: —¿Tas chuncha maꞌalinatꞌikcha mivaytikꞌan? Kꞌapꞌinchꞌipitik laqtsꞌinin. Tejkan takꞌatsalcha tachun ixꞌalinta, tanaul: —Va aqskis pan ali aqxtꞌuy jatanti.

³⁹Ex ni Jesús jalaqmalaqachal katalhijunil ni lapanakni para katataulal oqxlaqtamin taꞌan alin lakstakꞌau jatsꞌinan.

⁴⁰Ex chuncha ni lapanakni tataulalcha tamin ciento, yu alati va tataulal pakltamin ciento.

⁴¹Ex chuncha ni Jesús chꞌapalcha ni aqskis pan ali yu aqxtꞌuy jatanti. Talaqstꞌal ni laktꞌiyan, va xtaqnil lhimalaqpuchuncha ni Dios. Ex chuncha laqcheꞌelcha ni pan, jalaqxtaqnilcha ixtꞌaltanan para katamapitsinilcha ni lapanakni. Vachu jalaqcheꞌeniꞌol tachun ni lapanakni ni anchanuꞌ aqxtꞌuy jatanti.

⁴²Tachun tavaynꞌol, va tus ox taꞌotsaꞌol.

⁴³Ex chuncha tapusakchoqol yu xajchal xatalaqcheꞌeniꞌ ni pan kun ni jatanti. Va tus laqakautꞌuy canastas tamaꞌaqtsamal.

⁴⁴Ni joꞌakna yu tavayl va laqakis mil.

⁴⁵Ex ni Jesús va niman laklhijunilcha katatajuchoqolcha ni laka barco ixtꞌaltanan para kataꞌanchoqolcha ni Betsaida. Ni Jesús jantu niman kalaktꞌaꞌal. Vananaj ixtꞌajun lakmastakꞌanaꞌ ni lapanakni.

⁴⁶Tejkan lakmastakꞌaꞌochoqolcha ni lapanakni ex ni Jesús va al tapayniniꞌ Dios laka aspajun.

⁴⁷Tejkan putsꞌislhicha, yu ixtꞌaltanan ixpakltauncha lakamar ixtaꞌanta laka barco. Ni Jesús va ixꞌamancha ixyal ni lakatꞌun.

⁴⁸Ex ni Jesús jalaqtsꞌil ni ixtꞌaltanan va tacha jantu kalal katamaltanal ixbarcokꞌan. Yu un va ayaj pꞌasni ixꞌunilata taꞌan ixtapuꞌanta. Tejkan tunkumintacha ni Jesús va iltanajmintacha la ixꞌukxna lakxkan. Va ixlaqmaqxapuꞌiniputun ixtꞌaltanan.

⁴⁹Pero tejkan talaqtsꞌil ni iltanajminta la ixꞌukxna ni lakxkan talhilal va taun maqtsꞌisvanaꞌ. Ex va tamatꞌasal.

⁵⁰Tachun yu talaqtsꞌil, va ayaj tatalhanal. Ex ni Jesús niman jaxaqalal, va lakjunil: —¡Ay kꞌamakꞌatꞌik melhanutkꞌan! Va kitꞌin. Jantu katꞌalhanantꞌik.

⁵¹Ex ni Jesús va tajulcha laka barco taꞌan ixtatajumanal. Ni un va vakcha junchoqol. Ex yuꞌuncha tatalhanal, va tus vak takꞌatsal.

⁵²Vananaj ayaj pꞌas ixtajunita ixjalhanutkꞌan. Jantukaꞌ ox ixtamalaqasiy tichichuncha lapanaki junita yu lalhaval ni pan.

⁵³Tejkan tapatukukchalcha ni lakamar va tachaꞌalcha xalakatꞌun Genesaret, tachꞌiꞌulalcha ni barco.