Marcos 6:9-53

⁹Sapato sahuequin bi rabe coton sahueyamanon.

¹⁰—Xoboho hihcohax janobi banenahue, jaa jema janinhax canoxon caman.

¹¹Mato Johue hahyamaxon mato nincacatsihyamahiboya janohax caquin maton sapato qui hueotai mai poto jato qui tahabahini botannahue yohitimabohi honanahbo —jato jaquin.

¹²Jaan jascajaha boresscacani, shinan pontenahue jato jabonahi bocani.

¹³Hicha yoshin rihbi picocanquin. Hicha hisinyahpabo rihbi xeniyaxon bemanxon rohajacanquin.

¹⁴Jascajahiboya cahen Jesusen joi jatihixonbi nincacanquin. Herodes janeya quiquin hapon rihbi nincaquin. Jesus yohihi cahen caibo nescari yohuannish: —Nashimanica Juan ta mahuatipish bi teehihribihiqui. Jaa copi ta jascajaquin coshin hahquiqui —hihcani.

¹⁵—Elías yamanica tah qui —hihqui caibo rihbi. —Papan joi yohinica tah qui. Neateman Papan joi yohipahoni quescapah tah qui —hihqui caibo sca.

¹⁶Jesusen hahcai nincacax Herodes sca jascarihbihi: —Juan ta jihuerihbihihqui. Hean rehtequin textebahinhoh bi ta teehihribihiqui —hihqui.

¹⁷Jascari yohuanyahnoxon ta Herodias copi Juan bihmaxon Herodesnen Juan sipojanishqui. Herodias Felipenin haibo que bi ta Herodesnen bichinnishqui. Jahuen huetsan haibo bichinquin.

¹⁸Bichinaiton cahen Juaman Herodes yohiquin: —Miin huetsan haibo bichintima joi ta jaiqui, noquen nincati joi —hahquin.

¹⁹Jan jascahah Herodesnen haibo Herodias Juan qui rainyamahi jihuexon rehtecatsihquin bi hahtipahyamaquin, jahuen benen pantehah.

²⁰Juan ponte jihueti hohchajomahi honanax Juan qui raquequin Herodesnen coiranquin, caibaan rehtemis hihxon. Juan nincaxon jahua shinanti honanyamaquin bi nincaquin, coin coinxon.

²¹Jahuen bari nocotai neten sca cahen Herodesnen fiestajaquin. Pihi jahuebo jahuen tinintibo quenamaquin, jahuen sontaro hapobo quenamaxon Galilea mai meha patorobo rihbi quenamaquin. Fiestajahiboya jahuen haibaan Juan copicatsihquin shinanquin: Rahma caya tah hen Juan rehteti hahtipahscai hihqui.

²²Fiestajahibo qui hihcohax Herodiasnen baque xontaco jato bairahxonaiya hahan Herodes hihti jenimahi, jan quenamahabo rihbi. Jenimaxon Herodesnen yohiquin: —Min queenaibo hea yocareshue, hen mia hinannon.

²³Jascajaxon Papa Dios quenaxon sca xontaco yohirihbiquin: —Min hea yocacaibo tah hen mia hinantihi, heen yonotibo jatíhi hena hihnon jatíhi rihbi mina hihnon caman —hahquin.

²⁴Yohiha jahuen mama yocaqui sca caresscai. —¿Jahua yocapan? —hahquin. —Nashimanica Juaman mapo rahan —hahquin jahuen maman.

²⁵Hapo qui histon caribixon sca yohiquin: —Nashimanica Juaman mapo tah hen queenai rahmabi. Quencha qui nanexon min hea hinanti tah hen queenai —hahquin.

²⁶Yocacah sca hapon masa shinanquin. Hihtijaquin masa shinanxon bi Dios quenaxon yohixon copi jahuen joi huetsajati hahtipahyamaquin. Jan quenamahibaan nincacah copi rihbi jeenhahscaquin.

²⁷Jeenhihxon, rehtexonnica sontarobo sca raanquin, jahuen mapo bihtanahbo. Raanah caxon carcel janinxonbi Juan textecanquin.

²⁸Quencha qui jahuen mapo nanehax jaya joxon xontaco hinancanquin. Xontaconen sca jahuen mama hinanrihbiquin.

²⁹Jascajahibo nincacax ta Juaman haxenicabo jahuen yora bichi canishqui. Jahuen yora bihxon tsahoncanquin.

³⁰Jesusen jato raanah catanipish Jesus qui jahuen raantibo joribihi. Joxon jaabaan hahtanipi yohixon jaabaan haxematanipi yohirihbiquin jatihibi.

³¹Yohihiboya Jesusen jato yohiquin: —Mato rahsibi tantihi bonahue jano tsoabi yamahiton —jato jaquin. Cahi jahuibo hichahiya ta pinoxon bocabi tantiti hahtipahyamacannishqui.

³²Jano tsoabi yamahiton sca nontin bocani jaabo rahsibi.

³³Jaabo cahi cahen hichaxon jiscanquin. Jato honancanquin. Jatihibi jema janinhax quetanpaquebahini cahax jaabo pari nocoti, jano nontin cahi janin.

³⁴Nocoxon hicha tsamascaibo Jesusen jisbonaquin. Coiranyamaha carnerobo behnocanahi quescapahbo jato jisquin. Jatohon shinanxon hicha jato haxemarihbiquin.

³⁵Bepiscaiya sca hahqui joxon jahuen haxenicabaan yohiquin: —Neno ta jahua yamahihqui. Bepi rihbi sca ta jaiqui.

³⁶Jano huaiyahpabo jaiton jato raanscahue, hochoma jemabo janinxon rihbi jaton piti marohi cahabo —hahcanquin.

³⁷Jascahahbo: —Piti hinannahue, matonbi —jato jaquin. —¿Non doscientos denario copi paan marohi catihin, jato pimanoxon? —hahcanquin.

³⁸—¿Jahuentihi paan man jain? Jistannahue —jato jaquin. Jistani jahuex sca: —Pichca rahan. Rabe yapa rihbi —hihcani.

³⁹Jato jatihibi sca Jesusen yohiquin, cincuenta cincuentaboya cien joni rahsi jano huasi mipaxbihtaiton tsahonon.

⁴⁰Jascari tsinquitax tsahocani cincuenta cincuentabo, cien cienbo.

⁴¹Jaton pichca paan bihxon jaton rabe yapa rihbi bihxon nai bejisihnixon Papa yocaxon paan tehcapaquexon jahuen haxenicabo hinanscaquin, tsamajaquetaibo hinanpaquehahbo. Yapa rabe rihbi jatihibi hinanpaquemaquin.

⁴²Hinanah jatihixonbi pihi yanicahini.

⁴³Paan tequeboya yapa tequebo tsinquirihbixon sca doce tasa bohasjacanquin.

⁴⁴Paan pihibo cahen cinco mil bebobo. Hichaxon bi jatihi tasa bocho texejacanquin.

⁴⁵Jaatian sca chini canoxon jahuen haxenicabo yohiquin, nontin nanetax Betsaida jema janin pohquejaquenon. Jaabo cahiya cahen tsamajaquetaibo Jesusen yohiquin xobon caresscatannon.

⁴⁶Jato yohihax manan manixon Papa yocaqui cahi.

⁴⁷Yamescaiya cahen nonti caresscai bi Jesus huesti main baneti.

⁴⁸Nihuen tsahcahah huinacasquimahibo bi jaan jato jisquin. Xaba paqueri jaima sca jato qui cahi, jene benicanahi. Jato huinobahincatsihqui bi jaabaan meraquin.

⁴⁹Jene benicahinquihranai jisish, Yoshin tah qui, hihquish sai saihihcani.

⁵⁰Jatihixonbi jisish hihti raquecani. —Jointi coshijanahue. Hea tah hen qui. Raqueyamanahue —jato jaquin.

⁵¹Jato qui nontin nanetaiya cahen nihue tantiscai. Nihue tanticahinaiya hihti rahtescacani.

⁵²Paan tehcapaquexon jahuen coshi jan jato jismahipi bi honanyamacanquin, jaton shinan chahomahiya.

⁵³Pohquejaquetax Genesaret main taxnati. Taxnaxon nonti nexacanquin.