MALUKO 6:9-53

⁹Valeni ng'hwabasa, ila sambimpape kivalo kiyagwe.”

¹⁰Vivija kawalongela, “Hanhu hohose hondam'bokeligwe, kaleni baho mbaka vondamsegele.

¹¹Kamba muhengila mkiwambo na wanhu wahalema kuwabokela ama wahalema kuwategeleza, segeleni na kung'unheni timbwisi dili mmagulu genu. Iyo yowa nzuma yao!”

¹²Avo wachola na kuwapetela wanhu waleke vilozo vao.

¹³Wawinga vinyamkela bwando, na kuwabakaza mavuta ga mizaituni watamu na kuwahonya.

¹⁴Mndewa Helode Antipa, mtawala wa Galilaya, kazihulika mbuli zino, kwavija sang'hano za Yesu zenela kila hanhu. Wanhu wayagwe walonga, “Yohana M'batiza kazuka. Kino kicho kilamso kana mhiko zino za kutenda mizonza.”

¹⁵Wayagwe walonga, “Ino iyo Eliya.” Na wayagwe walonga, “Ino iyo muhokozi yalingile kamba imwe wa wahokozi wa umwaka.”

¹⁶Helode viyahulike, kalonga, “Ino iyo Yohana M'batiza! Nimkanhile pala jake, kawa mgima kabili!”

¹⁷Kwavija Helode mwenyego kakala yalagize Yohana yagogigwe, abaho, yageligwe mkifungo. Katenda vino sama ya Helodia mtwanzi wa Filipo mkulu wake, ayo yakalile yamsolile.

¹⁸Kwavija Yohana kakala yananahile kumulongela Helode, “Havilumbile gweye kumsola mtwanzi wa mkulu wako Filipo.”

¹⁹Avo Helodia kamwihila Yohana, kalonda kumkoma, ila hadahile.

²⁰Helode kamdumba Yohana kwavija kavitanga kamba Yohana hakalile munhu kizenzeleganye na kakala munhu wa Mulungu, avo kamwimiliza. Kanogelwa kumtegeleza, ila yehesha kumtegeleza kakala yogaya ng'hani mkugelegeza, ila kipigiti chose kakala yomtegeleza.

²¹Hakimambukizo Helodia kapata nzila. Dikala zua da ng'humbukila ya mvumbuka ya Helode, kipigiti Helode vayawatendele lusona wakulu wose wa silikali, wakulu wa asikali, na wakulu wa wenekae wa Galilaya.

²²Mndele wa Helodia kengila na kuvina, Helode na iwahenza wakalile baho wanogelwa ng'hani. Avo mndewa kamulongela ija imndele, “Nipule kinhu chochose chuulonda, nokugwelela.”

²³Mkuiduila kamulongela, “Nokugwelela kinhu chochose chondaunipule, hata lwenza lwa undewa wangu.”

²⁴Avo ija imndele kalawa kunze kumuuza mamaake, “Nikapule choni?” Na heyo kamulongela, “Pala da Yohana M'batiza.”

²⁵Ija imndele kabwela hima ha mndewa na kupula, “Nolonda unigwelele sambisambi pala da Yohana M'batiza muna ulungo!”

²⁶Mndewa kona giogio ng'hani, ila sama ya kiduilo chayaiduile na sama ya iwahenza wakalile haja hameza, hadahile kulema.

²⁷Avo kamulagiza asikali yomkomhokela yagale pala da Yohana. Asikali kachola mding'anda da kufungila wanhu, na kukanha pala da Yohana.

²⁸Abaho, kadigala mulungo na kumgwelela imndele, na heyo kamgwelela mamaake.

²⁹Wanahina wa Yohana viwahulike gano, weza kulusola lukuli lwake na kuluzika.

³⁰Iwatumigwa wa Kilisto wabwela waiting'hana na Yesu wamulongela gose gawatendile na kufundiza.

³¹Kukala na wanhu bwando wayagwe wokwiza na wayagwe wochola mbaka Yesu na wanahina zake hawapatile hata kipigiti cha kuja. Avo Yesu kawalongela, “Tusegeleni tuchole hanhu ha kifiso, muhumule kidogo.”

³²Avo wakwela mngalawa wasonga kusegela weiyeka, wachola hanhu ha kifiso.

³³Wanhu bwando wawona vowosegela, mkipigiti kiguhi wawatanga, avo wanhu kulawa m'viwambo vose wakimbila na magulu na walongola kuvika hanhu hayakalile yochola Yesu na wanahina zake.

³⁴Yesu viyahumuluke muna ingalawa, kajona dale kulu da wanhu, kawonela bazi mmoyo kwavija wakala kamba ng'hondolo walibule mchunga. Avo kasonga kuwafundiza vinhu bwando.

³⁵Zua vidiswile, wanahina zake wamcholela wamulongela, “Zua diswa na hano hatuli twa muluwala,

³⁶walongele wanhu wachole mmigunda na m'viwambo va mmabehi giladi wakagule vinhu vakuja.”

³⁷Yesu kawedika, “Wagweleleni mwenye vinhu vakuja.” Na hewo wamuuza, “Kolonda tuchole tukawagulile mikate ya kitumetume cha munhu cha milenge minane tuwagwelele waje?”

³⁸Avo Yesu kawauza, “Mikate mingahi imulinayo? Gendeni mkalole.” Viwayonile, wamulongela, “Ilibaho mikate mitano na somba wabili.”

³⁹Abaho, Yesu kawalongela wanahina zake wawagole wanhu wose muna gamadale na kuwalongela wakale hasi muluzondo.

⁴⁰Avo wanhu wakala hasi mmadale ga wanhu mia mia na wanhu malongo matano matano.

⁴¹Abaho, Yesu kaisola ija imikate mitano na iwasomba wabili, kalola uchana kuulanga, na kamgwelela hewela Mulungu. Kaimogola imikate na kuwagwelela wanahina zake wawagolele wanhu. Vivija kawagolela iwasomba wabili wanhu wose.

⁴²Wanhu wose waja na kwiguta.

⁴³Abaho, wanahina wadondola migelo longo dimwe na mibili ya imikate na iwasomba wasigale.

⁴⁴Mheta ya wambigalo wadile wakala alufu tano.

⁴⁵Bahaja Yesu kawalongela wanahina zake wakwele muingalawa walongole kuchola Betisaida, mwambu uyagwe wa idilamba, kipigiti heyo vayakalile yowalaga wanhu.

⁴⁶Viyeshile kuwalaga iwanhu, kachola hakigongo kutambika.

⁴⁷Viivikile ichungulo, ngalawa ikala hadidindi da idilamba, kipigiti Yesu viyakalile yeiyeka mulusanga.

⁴⁸Kawona wanahina zake wogaya kuzikunhiza zinyiko kwavija wakala wochola kudilawa beho, avo mkipigiti cha hagatigati ya nzogolo zikwika na imitondo, kawacholela yotembela uchana ya igamazi. Kalonda kuwabita,

⁴⁹ila wamona yotembela uchana ya igamazi. Watoa nyangi wagiza wona mzimu.

⁵⁰Wose viwamuwene wona bwembwe. Bahaja Yesu kawalongela, “Iyo nie, sambimdumbe.”

⁵¹Abaho, kakwela mngalawa hamoja nao, na dibeho dinyamala. Wanahina zake wakanganya ng'hani.

⁵²Kwavija hawakitangile kilamso cha kuwagwelela mandia wanhu alufu tano, nzonzi zao hazigogile gaja.

⁵³Waloka idilamba na wavika muisi ya Genesaleti, aho hawaitatilize ngalawa yao.