Marko 6:9-53

⁹lakini wavae viatu, na siyo kanzu mbili.

¹⁰Na akawaambia, “Nyumba yoyote mtakayoingia, kaeni hapo mpaka mtakapoondoka.

¹¹Na mji wowote usipowapokea wala kuwasikiliza, ondokeni kwao, kung'uteni mavumbi ya miguu yenu, iwe ushuhuda kwao.”

¹²Nao wakaenda wakitangaza watu watubu na kuacha dhambi zao.

¹³Waliwafukuza pepo wengi, na waliwapaka mafuta wagonjwa na wakaponywa.

¹⁴Mfalme Herode aliposikia hayo, kwa kuwa jina la Yesu lilikuwa limejulikana sana. Baadhi walisema, “Yohana mbatizaji amefufuka na kwa sababu hiyo, hii nguvu ya miujiza inafanya kazi ndani yake.”

¹⁵Baadhi yao wakasema, “Huyu ni Eliya,” Bado wengine wakasema, “Huyu ni nabii, kama mmoja wa wale manabii wa zamani.”

¹⁶Lakini Herode aliposikia haya akasema, “Yohana, niliyemkata kichwa amefufuliwa.”

¹⁷Maana Herode mwenyewe aliagiza Yohana akamatwe na alimfunga gerezani kwa sababu ya Herodia (mke wa kaka yake Filipo) kwa sababu yeye alikuwa amemuoa.

¹⁸Kwa maana Yohana alimwambia Herode, “Si halali kumuoa mke wa kaka yako.”

¹⁹Lakini Herodia alianza kumchukia na alikuwa akitaka kumuua, lakini hakuweza,

²⁰maana Herode alimwogopa Yohana; alijua kwamba ni mwenye haki mtu mtakatifu, na alimwacha salama. Na alipoendelea kumsikiliza alihuzunika sana, lakini alifurahi kumsikiliza.

²¹Hata ilipofika wakati mwafaka ikiwa imekaribia siku ya kuzaliwa Herode akawaandalia moafisa wake karamu, na makamanda, na viongozi wa Galilaya.

²²Ndipo binti wa Herodia akaingia na kucheza mbele yao, akamfurahisha Herode na wageni walioketi wakati wa chakula cha jioni. Ndipo mfalme akamwambia binti, “Niombe chochote unachotaka nami nitakupa.”

²³Akamwapia na kusema, chochote utakachoniomba, nitakupa, hata nusu ya ufalme wangu.”

²⁴Akatoka nje akamuuliza mama yake, “Niombe nini?” Akasema, “Kichwa cha Yohana Mbatizaji.”

²⁵Na mara moja akaingia kwa mfalme akaanza kusema, “Nataka unipatie ndani ya sahani, kichwa cha Yohana Mbatizaji.”

²⁶Mfalme alisikitishwa sana, lakini kwa sababu ya kiapo chake na kwa ajili ya wageni, hakuweza kumkatalia ombi lake.

²⁷Hivyo, mfalme akatuma askari kati ya walinzi wake na kuwaagiza kwenda kumletea kichwa cha Yohana. Mlinzi alikwenda kumkata kichwa akiwa kifungoni.

²⁸Akakileta kichwa chake kwenye sahani na kumpatia binti, na binti akampa mama yake.

²⁹Na wanafunzi wake waliposikia hayo, walikwenda kuuchukua mwili wake wakaenda kuuzika kaburini.

³⁰Na mitume, walikusanyika pamoja mbele ya Yesu, wakamweleza yote waliyofanya na waliyoyafundisha.

³¹Naye akawaambia, “Njooni wenyewe mahali pa faragha na tupumzike kwa muda.” Watu wengi walikuwa wanakuja na kuondoka, hata hawakupata nafasi ya kula.

³²Hivyo wakapanda mashua wakaenda mahali pa faragha peke yao.

³³Lakini waliwaona wakiondoka na wengi wakawatambua, kwa pamoja walikimbia kwa miguu kutoka miji yote, nao wakafika kabla yao.

³⁴Walipofika pwani, aliona umati mkubwa na akawahurumia, kwa sababu walikuwa kama kondoo wasiokuwa na mchungaji. Na akaanza kuwafundisha mambo mengi.

³⁵Muda ulipoendelea sana, wanafunzi wakamjia wakamwambia, “Hapa ni mahali pa faragha na muda umeendelea.

³⁶Uwaage waende miji ya jirani na vijiji ili wakajinunulie chakula.”

³⁷Lakini akawajibu akisema, “Wapeni ninyi chakula.” Wakamwambia, “Tunaweza kwenda na kununua mikate yenye thamani ya dinari mia mbili na kuwapa wale?”

³⁸Akawambia,” Mna mikate mingapi? Nendeni mkaangalie.” walipopata wakamwambia, “Mikate mitano na samaki wawili.”

³⁹Akawaamuru watu waketi katika makundi juu ya majani mabichi.

⁴⁰Wakawaketisha katika makundi; makundi ya mamia kwa hamsini.

⁴¹Kisha akachukua mikate mitano na samaki wawili, na kutazama mbinguni, akaibariki kisha akawapa wanafunzi waweke mbele ya umati. Na kisha aligawa samaki wawili kwa watu wote.

⁴²Walikula wote hadi wakatosheka.

⁴³Walikusanya vipande vya mikate iliyobaki, Vikajaa vikapu kumi na viwili, na pia vipande vya samaki.

⁴⁴Na walikuwa wanaume elfu tano waliokula mikate.

⁴⁵Mara akawaambia wapande kwenye mashua waende sehemu nyingine, hadi Bethsaida, wakati Yeye akiwaaga makutano.

⁴⁶Walipokuwa wamekwisha kuondoka, akaenda mlimani kuomba.

⁴⁷Kulipokuwa jioni, na mashua yao wakati huo ikiwa katikati ya bahari, naye alikuwa peke yake nchi kavu.

⁴⁸Na aliwaona wakitaabika kupiga makasia kwa sababu upepo uliwazuia. Ilipokaribia asubuhi akawaendea, akitembea juu ya maji, na alitaka kuwapita.

⁴⁹Lakini walipomwona anatembea juu ya maji, wakaingiwa na wasiwasi wakidhani ni mzimu hata wakapiga kelele.

⁵⁰kwa sababu walimwona wakajawa na hofu. Mara akasema nao akawaambia, “Muwe wajasiri! ni mimi! Msiwe na hofu.”

⁵¹Akaingia ndani ya mashua, na upepo ukaacha kuvuma, nao wakamshangaa kabisa.

⁵²Hivyo hawakuwa wameelewa maana ya ile mikate. Maana akili zao zilikuwa na uelewa mdogo.

⁵³Nao walipovuka ng'ambo, walifika nchi ya Genesareti mashua ikatia nanga.