Maaruku 6:9-53

⁹Mwiwale jampali, ila mwihithuule nkhumi wa phiiri.

¹⁰Amana mwifiya nyuupa moote, mwiiye attaapho mpakha siikhu mwinttelaaye olaavo.

¹¹Na miti mikinoko amana zihuupwekhereleni na khuhuusiilini, mwitathe lifufu la mmoolu mwenu mwilaakamo, nkhama oshaahiti vakatthi vaya.”

¹²Yo khulawa na khulaleya atthu yoori athupwiye.

¹³Yo aari wiikara masheethwani awaatta na owaavaaza mafuttha mmwishwa mwaya na owaavonisa alwele awaatta.

¹⁴Mfwalume Herooti khusiila elupiwaka hapari epile, maana nzina la Yinsa laajuwiwe saaneene. Atthu akina khwaaza olupa yoori: “Yaahaya Namoosa eetta osisimuwa muufwa! Tiito zinrettikhanaaye minjuza zootikinisa khwa ye.”

¹⁵Akina aari olupa yoori: “Ye ti Aliyaasi.” Akinoko khusala olupa araka: “Ye napiyu, nkhama manapiyu apale a raku.”

¹⁶Ila Herooti wakathi asiiliyeevo vitthu epile, khuri: “Yaahaya, mwinyi kinshijiyeeyo, asisimuwa muufwa!”

¹⁷Maana Herooti aarumiye yoori akholiwe Yaahaya, afukeliwe nkalapooso, mwaasa wa Herootiiya, muukha wa Filiipe ttwiiye, othuuto anraliyeeyo.

¹⁸Mwaasa wa Yaahaya aari omuuza Herooti yoori: “Khahi halaali weeyo onrala muukha wa ttwiiyo.”

¹⁹Herotiiya aarina katapu khwa Yaahaya, khusala atakha omuula, ila khuhisala awahi oretta,

²⁰mwaasa Herooti aari omoova Yaahaya na aari omwiinanela, maana aari ojuwa yoori ye mwinyi wa shariya na ttakatthiifu. Amana ansiilaka, eetta oshanka; khwa etthiipo waari ontuvela onsiila.

²¹Omwiisho Herotiiya khupattha kiphenyo siikhu ya oretta mwaakha Herooti. Khuretta njampo Herooti na anamalokozela awe awulu, attunkhulu a anajanka na ooshi apale eeyiye afwalume a nti wa Kalileya.

²²Wakathi mwaana wa Herotiiya aviriyeeyo khwiina, khuntuvela Herooti na apale awaakharipushiyeeyo. Mfwalume khumuuza mwanankha otule yoori: “Okivekele wakhula etile ontakhaaye kintta owinkha”.

²³Khumwaahiti khwa olapha yoori: “Wakhula onikivekelaaye, kintta owinkha, mpakha phantte ya ofwalume aka.”

²⁴Mwaana otule khusaruwa khumuuza mamaawe yoori: “Kiveke niini?” Mamaawe khunjipu yoori: “Oveke eeshwa ya Yaahaya Namoosa.”

²⁵Nasaapiru mwanankha otule khwaakuva khulawa wa mfwalume khuveka yoori: “Kintakha mwikinkhe nasaapi eeshwa ya Yaahaya Namoosa mparathu.”

²⁶Mfwalume khwiiya woohuzunikha channu, ila mwaasa wa olapha opule aalaphiyeeyo na wa apale awaakharipushiyeeyo, khuhiwahi okatthala etile avekeliweeyo ti mwanankha otule.

²⁷Nasaapiru khunruma najanka khumuuza ontiisela eeshwa ya Yaahaya Namoosa. Ye khulawa okalapooso, khushija eeshwa ya Yaahaya Namoosa.

²⁸Khuttha mparathu khumwinkha mwanankha otule na ye khumwinkha mamaawe.

²⁹Noosiila hapari epile anakhiyoni a Yaahaya namoosa, khuta khuthuula mwiili awe khulawa khuzikha.

³⁰Maaswihaapa khurutela aphale aariivo Yinsa khumuuza zooshi arettiyeezo na asomisiyeeyo.

³¹Aarivo atthu awaatta aari otaaye na olaavo, paata ya Yinsa na anakhiyoni awe woona yoori khaarina kiphenyo ya oja. Ye khuwooza yoori: “Mwite nilawe puuro yawiitthaleya navumule vattitthiiru.”

³²Aphano yo khulawa nkalawa mpakha puuro yawiitthaliye.

³³Atthu awaatta khuwoona alawaka paata ya owaajuwa. Atthu a miti zooshi za ottuukhule, khutthira khufiyawo yo ahinafiye.

³⁴Eeshukhaka nkalawa Yinsa, khoona khuntti khuluyeene ya atthu, khuwoonela huruma, maana aari nkhama pwittipwitthi zoohiina makhampuzi. Aphano khwaaza owaasomisa vitthu zawaatta.

³⁵Weettelaka oripa, anakhiyoni awe khunsusela khumuuza yoori: “Puuro eti ti yawitthaaleya, na waripa.

³⁶Owaamwaze atthu apa yoori alawe mmashapa na miti epile naattamiyeeyo yoori oozanye etthu yoojiwa aje.”

³⁷Ila ye khuwaajipu yoori: “Mwiwenkhe mweeyo ena etthu yoojiwa.” Yo khumuuza yoori: “Atthu apa yoori aje, ninhithajiya miiya piiri za nzurukhu wa feeta!”

³⁸Yinsa khuuzela yoori: “Mwina phaawu kavi? Mwilawe moone.” Anakhiyoni apale khulawa khoona khujipu yoori: “Ninaaye phaawu thaanu na swi piiri.”

³⁹Aphano, Yinsa khuwaaruma yoori ooshi eekhale, khuntti khwa khuntti va nyaani piishi

⁴⁰Khuretta etthiipo khwaawanyeya khwa khuntti ya miiya na khuntti ya hamusiini.

⁴¹Athuuliyeevo phaawu epile thaanu na swi piiri khweekesa pinkuuni khuparikhiya. Nawiisha khumeya phaawu epile khuwenkha anakhiyoni awe yoori awaawanyeze atthu apale. Theenya khuwaawanyeza swi epile piiri ooshi aya.

⁴²Ooshi khuja khurupala,

⁴³na anakhiyoni khulokotthela khwiitaala khelenke khumi na piiri za nyeenye za phaawu na za swi.

⁴⁴Atthu aajiyeeyo aari alufu thaanu alume ene.

⁴⁵Elottelanaka, Yinsa khuwaaruma anakhiyoni awe yoori awele nkalawa alokoze Betezayiita phantte ya kaapu ya ntthatta, wakathi ye asaliyeeyo aleezananaka atthu.

⁴⁶Paata ya oleezanana, khuwela vakulu yoori alompe.

⁴⁷Weettelaka oripa, kalawa yaari vakatthi wa pahari na Yinsa aari otthwe vathi.

⁴⁸Ye khuwoona anakhiyoni awe afutthaka kaafi woovelavelavo, maana eetta wiinyula pheevo. Lifwajiri, Yinsa khulawa aphale aariivo eettettaka vatulu wa pahari, khusala asaleela owaavikana.

⁴⁹Wakathi amooniyeevo eettettaka vatulu wa pahari, khusala amoona nkhama nshitapehe, aphano khusala anyakula.

⁵⁰Maana ooshi aamoniyeeyo aari oosuthuwa. Ila Yinsa nasaapiru khuwooza yoori: “Mwiminyale! Ti miiyo! Mwihoove!”

⁵¹Aphano Yinsa khuwela nkalawa khwiiya vamote na anakhiyoni awe, na pheevo khunyamala, na yo khwiiya ooshanka,

⁵²maana khazaaweleyiye minjuza za phaawu. Rooho zaya zaari zookhomaala.

⁵³Paata ya olokha pahari, khufiya Jenezare, ottuukho khufukelela kalawa yaya.