Markus 6:9-53

⁹A re ko ong eta nan sut, o der mi nan sakit riau.

¹⁰A ap kotin masani ong irail: Wasa kis, me komail pedelong onger ni im eu, komail mimieta, komail lao kowei sang wasa o.

¹¹A wasa eu, me kang kasamo o rong komail, komail sipede sang pwel ni nä omail, ni omail ko sang, pwen kadede ong irail.

¹²Irail ap kola o padapadaki me ren kalula.

¹³Re pil kause sang tewil toto o keie me somau toto, kakela ir ada.

¹⁴Erodes nanmarki mangiada pwe mar a indandsili, a ap masani: Iei Ioanes saunpaptais o, me mauredar sang ren me melar akan; iei i me a wia manaman pukat.

¹⁵Akai inda, me i Elias; a akai, me i saukop amen de amen me due saukop akan.

¹⁶Ni en Erodes mangiada, a ap masani: Ioanes, me i lepuke sang mong a; ari, a mauredar.

¹⁷Pwe pein Erodes me poron wong, saikidi Ioanes, o saliedi ong nan imateng pweki Erodias, en ri a ol Pilip a paud, pwe a id paude kida i.

¹⁸Pwe Ioanes me kapung ong Erodes: Me sota pung omui atia sang en ri omui ol a paud!

¹⁹Iei, me Erodias kailong kila i, ap men kamela i; ari, a sota kak.

²⁰Pwe Erodes laan Ioanes, pwe a asa, me i ol pung o saraui amen, i ari tataakata i, ap peiki ong o mamangi pereneki.

²¹Ari ran mau eu, ran en Erodes a ipwidi, a ap kotin kamadipa a saupedi ko, o a saumas oko, o na me lapalap en wein Kaliläa kan.

²²Ari, nain Erodias seripein ap kodo kakalek, kamakamait Erodes o me momod re a ko ni tepel. Nanmarki ap masani ong seripein o: Poeki re i meakot, me koe mauki; i pan ki ong uk.

²³I ari kotin kaula: Meakot koe poeki re i, i pan ki ong uk, lao lel apali en ai wei.

²⁴A ap pedoi wei indang in a: Da me i pan poeki? I ari inda: Monga en Ioanes saunpaptais o.

²⁵I ari puredo, madang dong ren nanmarki o, poeki, inda: I men, komui en madang kotikido monga en Ioanes saunpaptais nan eu dal en!

²⁶Nanmarki ap topwaila kaualap, a pweki a kotin kaula o pweki ir, me iang i ni tepel ko a sota men kapapalawei.

²⁷Nanmarki o ap madang poronela saunpei amen, masani, monga en wisikedo.

²⁸A ap kola, lepuke sang monga nan imateng, ap wa kodo monga o nan dal eu ap ki ong seripein o; seripein o ap kiong in a.

²⁹A tounpadak kan lao rongadar, re ap kodo ale kalep a, nekidala nan sousou o.

³⁰Wanporon oko kapokon irail pena ren Iesus, potoan ong i meakaros, me re wia o me re kawewedar.

³¹A ap kotin masani ong irail: Komail kelepe dong sap tan; kamol mas. Pwe me toto purepure ir; irail ari sota pisokki ong manga.

³²Re ap takeda sop kelep kolang sap tan.

³³A me toto kilang ar masalwei; me toto asa irail. Ir ari sapal sang kanim karos audi mo a ap pokon pena re a.

³⁴A Iesus lao keredi sang nan sop o, ap masani aramas toto, ap kupura ir ala; pwe likamata irail sip, me sota sile parail. A ap kotin tapiada kawewe ong irail me toto.

³⁵Wasa lao sautik penaer, sapwilim a tounpadak kan ap poto dong re a, potoan ong: Sap tan eu met, ap wasa sautiker;

³⁶Re kotin kadar ir pasang; pwe re en paangewei sap koren kan o kisin kanim akan o pein netiada kan ar prot, pwe sota man ar tungole meakot.

³⁷A ap kotin sapeng masani ong irail: Komail katungole ir! Re ap potoan ong i: Se en kola en netiada prot me denar riepuki, ap ki ong irail ren tungole?

³⁸A ap kotin masani ong irail: Lopon en prot depa mi re omail? Kowei kalelapok! Re lao kalelepok, rap potoan: Me limau o mam riamen.

³⁹A masani ong irail, re en wia pwini ir pasang, kamodang ir di ong nan rä.

⁴⁰Re ap mondi ni pwin akai; wad epuki o limek ni pwin ko.

⁴¹A ap kotikidar lopon en prot limau o mam riamen masandang nanlang laolaoki pwilitiki pasang o ari, kotiki ong sapwilim a tounpadak kan, pwe re en nek ong irail. O mam riamen oko pil nene ong irail karos.

⁴²Irail karos ari mangaer o medier.

⁴³Rap deuk pena kopou eisokriau maremor en kamadip o luan mam oko.

⁴⁴Irail me tungoler prot oko me ol limekid.

⁴⁵I ari kotin madang pain sapwilim a tounpadak kan, irail en ko ong nin sop o, tiong wong Petsaida palio, pwe a pan kotin kadar pasang pokon o.

⁴⁶A lao kotin kadar ir pasang, a ap kotidalang nan nana eu, pwen laolao.

⁴⁷A lao sautik penaer, sop o mi nan ailep en sed. A a kotin kalakalapuk nan sap.

⁴⁸I ari masani arail wiawia roro, pwe me ang matong irail. A nin soran a koti dong irail, weid pon sed, a pan dauli ir wei.

⁴⁹Ari, ni arail kilang a kotin weweid pon sed, re kiki ong, me ani amen. Re ap weriwer.

⁵⁰Pwe irail karos kilang i, ap masapwekada i ari madang masani ong irail, masani: Komail perenda! Ngai met! Der masak!

⁵¹I ari keredang pon sop o, ap moledi. Re ap puriamui kila kaualap o ponepone kida.

⁵²Pwe re sota lamelame prot oko; pwe mongiong arail kakaluakalar.

⁵³Irail lao kotido, re ap inen dong wein Kenesaret, ap kai ong liman sap o.