Mark 6:9-53

⁹Kae sumasuma ko kote, saba kega gara kana birauwa kona yauni.

¹⁰Ba meo ku yove kona riu wai namai kona mamana yepo nao meyaga kona kasibau taveyei.

¹¹Ba meo meyagai kega sina verabeyimi, kona sina nonorimi wai koni bisumarei maranai kaemi yai momokara ko kasitataba ini mamatarisi sina kuiri kata wose goyona si wosei wai.”

¹²Damanina ba si kasibau si nae ba si rumamara kata pipiya asi piragagoyosi yai sita tombaubaunisi.

¹³Ba kanuma goyogoyosi pesarisi siru kwabina si kasibau, ba gubagubagisi pesarisi olive wairoronai gayamisi si boroisi ba si yawasisi.

¹⁴Taupauma Herod nikona i nonori, kairavina Iesu kana waba i rakata ba pipiya si kuira roboi. Mutusi si wona, “Kona John Babataito biyina rabobowai i bomsiri, ba kona kairavina kiyakiyaya kaimasawisi i wosewose.”

¹⁵Mutusi si wona, “Kona Elijah.” Ba mutusi si wona, “Kona wai peroveta, nanakasike bage peroveta katamanina kesana.”

¹⁶Saba maranai Herod nikona i nonori wai i wona, “Niko sebare John, gayamina a kasiyaragi wai rabobo ai i bomsiri mena.”

¹⁷Herod ikesina i kaotunesi wai John si kaupatupatumi, ba patuma yovena kamonai si terei. Nikona wai Herod tuwateina Philip kaowana Herodias i rabai wai kairavina i wosei.

¹⁸Kairavina John mamanina Herod i wonewonei, “Nikona kega damanina kata tuwateim kaowana kuta utusekwai.”

¹⁹Kata Herodias John kurina i yagisi saki ba ana waina ita kasibunui saba kega rubana ita wosei.

²⁰Kairavina Herod John i nagarei wai ibo papari kairavina i kuiri kata kona, pipiya ana yawasa totorina ba kaobaisiyena. Maranai Herod John i nonori i bisisiya wai nuwanuwana i kairagaraga, saba yebo ana waina saki iti tinabaenegei.

²¹Damanina Herodias ana mara gairena i panani kata Herod ana tupuwa marana. Kam kaikapona i wosei, ana babada kaikaposi, abiya babadisi ba Galilee kana babada kairavisi.

²²Kona maranai Herodias natuna wasike i riu ba i binokonokoa riku wai Herod kana bonunu yabata si kinani wai si nuwagaire saki, ba taupauma wasike yegeyegena i wonei, “Awaika wata am waina wai ki babaiku wai ana berim.”

²³Ba kaobiyoyobana maragasina i berei i wona, “Awaika kuni baba wai ana berim! Nanakasike abisiri yia au basileiya sepina rubana.”

²⁴I kasibau ba sinana i toirubai i wona, “Awaika kairavina ani baba?” Ba i kaobeyei i wona, “John Babataito biyina gayamina.”

²⁵Wasikena yagiyagina wata i riu taupauma kurina ba i wona, “Au waina John Babataito biyina gayamina.”

²⁶Nikona taupauma i nonori wai, i nuwapoya saki saba ana kaobiyoyobana i wosei wasikena kurina ana babada matasi yai, kata kega ita kasei.

²⁷Kata yagiyagina wata kasibunuwa biyina i kaotunei ba i porai, kata John gayamina ita botuwei. Ba sebarena i nae yove patumai John gayamina i kasiyaragi, wagawaga kairavisi kega rubana ana waina iti gesei. Ba yagiyagina wata kasibunuwa biyinai i kaotunei ba i porai, kata John gayamina ita botuwei. Ba sebarena i nae patuma yovenai John gayamina i kasiyaragi,

²⁸ba gayamina kabomai i wani, ba wasike ikei i yauni i nae sinana i berei.

²⁹Nikona John ana nonorayauna si nonori wai si botu tupuwina si yauni ba karawagai si dogui.

³⁰Iesu ana apostles si notuwa ba awaika si wosei ba si bibeyebeyena wai ereonowana si mamatarei.

³¹Ba pipiya pesarisi si botubotu ba si nenae kairavina, kega rubana sita kam, Iesu i wonisi, “Komi wata ko botu ba tana nae ku kupura bogana ba koni yakam.”

³²Kata kosi wata wakai si nae ku kupura bogana.

³³Saba pipiya pesarisi si kinanisi si tauya wai pipiya mutusi si kinanisi ba si wara tetei wai pipiya pesarisi kae tano ai si vera si nao.

³⁴Damanina ba Iesu i verakasibau wai, koroto kaikapona i kinanisi! Ba i kamyosukuvisi basuna kosi nanakasike bage sheep, kega ere kasi aba potapota. Kona kairavina i dagui sawara pesarisi i bibeyebeyisi.

³⁵Kona maranai kao i kakaba, ba ana nonorayauna si botu kurina, ba si wona, “Nikona wai kupura bogana ba kao matapa i kakaba.

³⁶Pipiya ki pora taveyisi sina nae kata bao ba meyaga dubosi yai ikesisi kam sina gimona ba sina kam.”

³⁷Saba Iesu i kaobeyisi i wona, “Komi kam ko berisi sina kam.” Ba kosi si toirubai si wona, “Mekabage kom am waina yakai bread 200 silver coins rubana kana gimona ba kana bereis sina kam kona?”

³⁸Kata Iesu i toirubaisi, i wona, “Komi ko kinani, bread biyamo wata gwabimi yai?” Ba si panani, kata bread nima masiyana ba enaga siyauwa asi ruwamo.

³⁹Ba Iesu ana nonorayauna i wonisi, kata pipiya si wosisi dugu yogiyogisi yai sisikorokoro tepanai sita makira.

⁴⁰Damanina ba nanakasike si makira mutusi 100 ba mutusi 50.

⁴¹Iesu bread nima masiyana ba, enaga siyauwa ruwamo i yauna. Ba i gagawa ku sapama ba i kaikaiwa. Ba bread i botomni. Ba ana nonorayauna i berisi kata pipiya siti yabisi. Ba yebo enaga siyauwa ruwamo ereonowana i yabisi.

⁴²Ba ereonowasi si kam, ba si kam siyabagi.

⁴³Bread ba siyauwa si kam boterei wai ana nonorayauna poga 12 si bonawisi.

⁴⁴Ba kosi si kam wai sebasebare wata asi 5,000 rubana asi rakaraka yabata.

⁴⁵Iesu ana nonorayauna yagiyagina wata i geruisi ku waka kata siti nao ku Bethsaida, ba kona ikesina muri yai pipiya iti pora taveyisi.

⁴⁶Ba i pora taveyisi murinai, i gae ku koya barana pari kairavina.

⁴⁷Rabisi pompom ai, waka wai boga basunai ba Iesu ikesina wai tano ai.

⁴⁸Iesu ana nonorayauna sibe i tobeyebeyisi kairavina boe si bibagei wai i kinanisi. Maratom didibarinai okowa tepanai i yewo i nae kurisi ba yogina ikei ita tupasirisi.

⁴⁹Saba maranai okowa tepanai i yewoyewo si kinani wai, si nosi bage kona momosika wai si rasa.

⁵⁰Kairavina ereonowasi si kinani wai si nagara saki, ba yagiyagina wata kurisi i wona, “Koi nuwatora ba kega ko nagara niko yauku!”

⁵¹Ba i sugae ku waka, ba sibe i botere wai kosi si wareyei.

⁵²Kosi bread 5 basuna kega si kuiri kairavina kosi nuwanuwasi wai guduguduna.

⁵³Maranai si garubona ku Gennesaret si yota ba namai waka si rowai.