Marcos 6:9-53

⁹Mepakay aw menepatos dan, meneng eked dan pengibing te ekasan.

¹⁰Migpunù sikandin, kagi din, “Aw domateng kaw doton te lonsod, ketingen kaw diyà te sebad balay. Ikà niyo eg-alin-alin lamig domeleg kaw doton te doma lonsod.

¹¹Aw doen otaw eked pegsagman kenyo, aw eked dan penenalan te itoladà niyo, tektaki niyo se napò te tanà lekat te sepatos niyo te pegkesayo niyo lekat te lonsod dan. Yan metaga-taga se otaw kidoen te doen salà ininang dan, so wedà dan penenalan kenyo.”

¹²Penga niyan, nesayo dan. Pengkey kenan dan pesalo, migtoladà dan te keilangan megselsel se kedita te otaw te salà ininang dan.

¹³Medita se bosaw impelowà dan lekat te otaw, aw medita heman se otaw doen mesakit pinetedakan dan te lana aw negolian dan.

¹⁴Nayan, dimineg se selotan si Herod tepad te ininang i Jesus aw menge tinoledaan din, so ontò nedengeg si Jesus. Doen menge otaw eg-ikagi, “Sikandin besi si Juan Memonyagay neantay den lekat te nematay, aw yan se doun te eg-inangen din se kepelahan metolos.”

¹⁵Meneng doen heman menge doma otaw eg-ikagi, “Sikandin se telekeliwat te kagi te Timanem gebii si Elias.” Doen heman menge doma otaw eg-ikagi, “Ontò sikandin telekeliwat te kagi te Timanem, iling te menge telekeliwat te kagi te Timanem gebii.”

¹⁶Meneng pegdineg i Herod tepad te ininang i Jesus, minikagi sikandin, “Sikandin besi si Juan Memonyagay, sìyan impesipal ko se lieg din, meneng neantay besi lekat te nematay.”

¹⁷Yan se inikagi i Herod, so kedengan impedakep din si Juan, aw impegapos din, aw impekeleboso din. Yan se ininang din ki Juan amon meluba se nayi din si Herodias inagaw din diyà te kedowa din si Felipe.

¹⁸Peg-agaw i Herod te nayi din, simila si Juan kandin, kagi din, “Mig-inang ka te salà, so nengagaw ka te nayi nikaw.”

¹⁹Yan se doun te neopal si Herodias diyà ki Juan, aw ibeg din ipeimatay din si Juan. Meneng wedà pekedeleg,

²⁰so egsagman si Herod ki Juan, so netegahan din te gayed eg-inang si Juan te metòlid, aw wedad salà ininang din. Yan se doun te eked kepakay diyà kandin aw imetayan si Juan. Egkeibeg si Herod domineg te ipegtoladà i Juan, meneng pegdineg din kenyan, ontò migkebulung se aneng-aneng din.

²¹Nayan, mig-inang si Herod te pista tepad te aldaw te pegtebaw din, aw impetanod din se kedita te opisyal, aw kapitan te sondalo, aw otaw meyaman. Yan se aldaw intelegsà i Herodias amon ipeimatay din si Juan.

²²Pegsayaw te laga batà i Herodias, ontò neluba si Herod aw menge otaw timanod. Penga niyan, minikagi si Herod, “Pemoyoi den se ibeg no diyà kanak pengkey eden, so ibegay ko iyan diyà kamno.”

²³Migsapà si Herod diyà kandin, kagi din, “Pengkey eden se pemoyoen nikaw, yan se ibegay ko kamno, pengkey taman te ketengà te tanà eglowanan ko.”

²⁴Penga niyan, nesayo se laga aw mig-insà diyà te inay din, kagi din, “Eden lay se mèpiya pemoyoen ko?” Minikagi se inay din si Herodias, “Pemoyoi te ipesipal din se lieg i Juan Memonyagay.”

²⁵Penga niyan, ayas limikò se laga doton ki Herod, aw nemoyò, kagi din, “Ibeg ko, ipesipal no se lieg i Juan Memonyagay, aw ipesawol no se olo din diyà te dakel sablag, aw ipeibing no dini kanak te eked kenamay.”

²⁶Ontò nelidò se pedowan i Herod. Meneng so migsapà sikandin, aw eked keibeg silahen te menge otaw timanod, eked sikandin tomalis te pakang din diyà te laga.

²⁷Yan se doun te wedà sikandin peg-alà-alà, aw insogò din se sondalo mangay te olo i Juan. Penga niyan, dimoton se sondalo te keleboso aw sinipal din se lieg i Juan.

²⁸Insawol din se olo din diyà te sablag, aw imbegay din diyà te laga, aw inibing te laga doton te inay din.

²⁹Pegdineg te menge tinoledaan i Juan te inimetayan sikandin, dimoton dan te keleboso, aw inabat dan se lawa din aw inlebeng dan iyan.

³⁰Nayan, peg-olì te menge sogounun i Cristo doton kandin, mig-indan dan diyà kandin tepad te kedita te ininang dan aw intoladà dan.

³¹Penga niyan, minikagi si Jesus, “Tenani niyo se doma otaw, aw taking kaw kanak doton te kesikmihan amon meg-etod kaw te eked kenamay.” Yan se inikagi din, so medita se otaw gayed egdoton kandin, aw kenà egpekekaen si Jesus aw menge tinoledaan din.

³²Penga niyan, nesayo dan lekat kidoen. Simakay dan te belangay aw dimoton dan te kesikmihan te wedad doma dan.

³³Nayan, medita se otaw kimità te pegkesayo dan, aw netegahan dan te sikandan si Jesus aw menge tinoledaan din. Yan nesayo dan lekat te medita ogpeanan dan, aw kimagnan dan diyà te kilid te lanaw, aw nekeonà dan dimateng doton te peselowan te belangay sinekayan i Jesus.

³⁴Pegtenà i Jesus, kinità din se ontò medita otaw migtagad kandin. Ontò din dan neidowan, so iling dan te menge ayam-ayam karniro megketading te eked kenamay aw wedad megdiyaga kandan. Penga niyan, migtoladà si Jesus kandan te medita kebenalan.

³⁵Pegkeapon niyan, dimoton se tinoledaan din kandin, aw minikagi dan, “Ontò ini kebigtilan, aw agpet den delem.

³⁶Pekeseyowi se kedita te otaw doton te menge lonsod aw kedepagan amon mayad dan te kànen.”

³⁷Meneng minikagi si Jesus, “Pemekàni niyo dan.” Minikagi dan diyà kandin, “Eked day kebatog. Simpana mayad kay te pan botong te ipekaen day kandan, keilangan dakel se kwarta ibayad day kenyan, menge dowa gatos kwarta dinaryo.”

³⁸Minikagi si Jesus, “Tengtengi niyo aw pila se pan inibing niyo.” Pegkità dan, limikò dan doton ki Jesus aw minikagi dan, “Lima olò se pan, aw didowa se ikan.”

³⁹Penga niyan, impeebong-ebong i Jesus se kedita te otaw aw impeonsad din dan kidoen te sagbet.

⁴⁰Peg-onsad dan, doen menge inebongan teg sebad gatos otaw, aw doen heman menge inebongan teg keliman otaw.

⁴¹Penga niyan, inabat i Jesus se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din se pan aw imbegay din diyà te menge tinoledaan din amon iteped dan diyà te menge otaw netipon. Impeteped din heman se didowa ikan diyà te kedita te otaw.

⁴²Kimaen se kedita dan aw nebesog dan.

⁴³Penga niyan, inimon dan se samà te pan aw ikan kinaen dan, aw sempolò teg dowa se buun nepenò.

⁴⁴Menge lima melalan se meama kimaen te pan, aw doen heman menge bayi aw mengisù.

⁴⁵Penga niyan, impeonà i Jesus se menge tinoledaan din simakay te belangay pesalo doton dipag te lanaw, doton te Bitsayda. Dalem niyan, impeolì din se kedita te otaw netipon.

⁴⁶Pegkesayo dan, timikedeg si Jesus doton te bontod amon megtawal-tawal.

⁴⁷Pegsallep te aldaw, mediyò den se belangay doton te lawod te lanaw. Meneng si Jesus kidoen pa te bontod olò din sebad.

⁴⁸Kinità din te ontò melima se pegbugsay dan, so simongsong dan te kelamag. Ontò mata-mata te iselem, dimoton si Jesus kandan aw minipanaw sikandin diyà te lanto te lanaw. Ibeg din mekesaeb kandan.

⁴⁹Meneng pegkità dan kandin, eden dan aw along sikandin, so minipanaw sikandin diyà te lanto te lanaw. Migpuypuy dan,

⁵⁰so kimità se kedita dan kandin, aw ontò dan nelemitan. Meneng pegketà timawal si Jesus, kagi din, “Peseligi niyo se pedowan niyo, so siaken ini. Ikà niyo egkelemitan.”

⁵¹Penga niyan, eleg simakay si Jesus te belangay, aw timunung se kelamag. Ontò dan nepela,

⁵²so pengkey kinità dan se kepelahan ininang i Jesus diyà te pan aw ikan, meneng wedà dan pa ketegahi te doen tolos din, so magsen se olo dan.

⁵³Nayan, penga te pegbatas dan te lanaw, dimateng dan doton te Genesarit, aw migpondo dan kidoen.