67 Opepengpeng hemuta heke Ioanes temene Sakarias pe haliu hot sapele NeHalang na helenga:
68 “Ta heto haka tote NeHalang Israel mur aria Non Soke! Iange i sio at ke halaua nena hana mur pe mene mule iri nga reria poinga poreke ngana mur.
69 Pe tung sue hemasinga e nge na kerkerenga halang ke hemas mule ita lochloch. Pe i nenge hemasmas nem at nga mata nenge Teuit (NeHalang nena hekuleileinga).
70 Hetatalonga mur nge nike te hele hote na helenga kerkereng ngana mur.
71 Ke te teke NeHalang mene mule ita nga rera ngarang mur peria pe nge iri nenge muteria taua ita ero.
72 Pe NeHalang hele ke teke lape letena ia rera tete mur pe letena metene helenga tomunga hel nenge pengpeng toto.
73 Nena helenga utona nenge heleia lange Apraham ma ke mai:
74 NeHalang lape mene mule ita nga rera ngarang mur peria ke ta ume mana nge i pe ta mataua rera ngarang mur ero ol.
75 Pomalam laka poinga poreke ngana e tu nge ita ero pe ta pengpeng toto nga NeHalang matana nga etue lochloch nenge tatu nga ich.”
76 Sakarias hele lange tuna, “Iau tuk iong pe lape te hetue iong NeHalang nenge I Soke nga Lut Toto nena hetatalonga. Iong lape iong muka nge Non Soke ke o hepengia nena kue.
77 Pe o hele lange hana lochloch ke NeHalang lape hemas mule iri ke pomai: lape saua reria poinga poreke ngana mur ke te lasus toto.
78 NeHalang letena poreke hali ia ita nga rera poinga poreke ngana mur pe tangtang ia tutuna mur ita ke poi ke manga chaia matana nenge haka
79 pe tualeme sio at nga tapa pe tua hatalia ita nenge ta tuteu nga metenga ana mulil. Pe henonoua ita nga kue nenge langa tunga nge nek.”
