1Kilisiti cɛpɑ-tʋɣʋ tɑ́ yomle tɑɑ kɛ́ sɩ tǝ́ pǝsɩ kɑsɑɣɑmpiyɑ tǝkpem. Pǝ tɔɔ ɩlɛ ɩ́ sǝŋ tǝcɑ, nɑ ɩ́ tɑɑ yele nɑ cɛpʋ pǝnɛ pǝ tɔm liɣiti-mɛ nɑ ɩ́ tɑɣɑnɩ yomɑɑ kɛ pǝsʋɣʋ tɔtɔ.
2Ɩ́ tʋ ŋkpɑŋŋ kɛ teu, Pɔɔlɩ mɑ́ mɑ tʋlǝɣɩ-mɛɣɛ tǝfoo sɩ, ye ɩ́ tɛmɑ mǝ tɑɑ nɑ ɩ́ pɛlɩ, pǝ wɛ ɩsɩɩ Kilisiti kɔntɛ lɑpɑ mǝ kiŋ ntɛ́ yem.
3Mɑ tɑsǝɣɩ yǝlɑɑ tǝnɑɣɑ kpɑɑlʋɣʋ sɩ, wei ɩ́ pɛlɑɑ, tǝlɑsɩ ɩsɩɩ ɩ tɔkɑ kʋsǝsɩɩtʋ tǝnɑ tǝpɑɩ, ɩ kɑɑ sɛkɩ pʋlʋ.
4Mɛ mpɑ ɩ́ cɑɑ sɩ Ɩsɔ ɩ́ nyǝnɩ-mɛɣɛ kʋpɑmɑ kɛ mǝ kʋsǝsɩɩtʋ tǝŋʋɣʋ tɔɔ tɔ, mǝ nɑ Kilisiti ɩ́ yɑɑ kɛ́ nɑ ɩ́ pɛŋ mǝ tǝɣɩ Ɩsɔ pɛɛlɛɛ.
5Ye tɑ ɩlɛ tǝ nyǝmɑ́ sɩ Ɩsɔ kɑ́ pǝsɩ-tʋɣʋ yʋlʋpɑmɑ nɑ tǝ tɑŋɑ ḿpʋ́ɣʋ́ nɑ Ɩsɔ Feesuɣu toŋ wei ɩ lɑkɩ tɑ́ kiŋ kɛ tɑ́ tɛm Ɩsɔ nɑ tɑ́ tɑ́ɑ́ tɔ pǝ tɔɔ tɔ.
6Pǝ tɑɣɑ pʋlʋ tɔɔ, ye tɑ́ nɑ Yesu Kilisiti tǝ lɑɑlɑɑ nɑ tǝ́ kpɛntɩ, pɑɑ tǝ pɛlɑɑ pɑɑ tǝ tɑ pɛlɩ pǝ lɩɩ kʋlʋm kɛ́. Amɑ mpi pɑ cɑɑ tɔɣɔlɛ sɩ tǝ́ tɛ Ɩsɔ nɑ tɑ́ tɑ́ɑ́ nɑ tɑ́ɑ́ tɛm mpɩ pǝ tɑɑ kɛ́ sɔɔlʋɣʋ nɑ́ wɛɛ nɑ kʋlɛ kʋ tɔŋɑ.
7Ɩ́ kɑ lɑkɑɣɑ teu ɩlɛ nɔɔnɔɔ ɑwe lɑpɑ nɑ ɩ́ mǝlɩ hɛɛʋ kɛ tɑmpɑnɑ tǝŋʋɣʋ tɑɑ?
8Nti pɑ heelɑ-mɛ nɑ ɩ́ tɛ mǝ tɑɑ nɑ ɩ́ tisi tɔ tǝ tɑ lɩɩnɑ Ɩsɔ wei ɩ yɑɑ-mɛ tɔ ɩ kiŋ.
9Pɑ tukɑ ɩtuule sɩ: Kʋkʋsʋm kɛ pǝciimɑɣɑ kpɑɑsǝɣǝnɑ somtu tǝfʋʋʋ.
10Pɑɑ nɑ mpʋ Tɑcɑɑ yelɑɑ nɑ mɑ́ wɛɛnɑ nɑɑni kɛ mǝ tɔɔ tǝkpɑtɑɑ sɩ ɩ́ kɑɑ kpɑɣɑ hʋwɛɛ nnɑ ɑ fɑɣɑnɑ mɑ nyǝnɑ tɔ. Amɑ wei ɩ lɑkɩ-mɛɣɛ yɛlɛyɛlɛ tɔ pɑɑ ɩ kɛ́ wei te Ɩsɔ kɑ́ nɑnɑ pʋntʋ.
11Mɑ tɑɑpɑlɑɑ ye pɛlʋɣʋ tɔm wɑɑsʋ kɛ mɑ tɔŋnɑ lɑpʋ tɔtɔ, pɑɑ tʋkɑɣɑ-m kʋnyɔŋ suwe tɔtɔ? Ye pɩɩ wɛ ḿpʋ́ɣʋ́ tɑmpɑnɑ, Kilisiti wei pɑ kɑmɑ tesikɑ tɔɔ nɑ mɑɑ kpɑɑlǝɣɩ ɩ tɔm tɔ ɩ tɔm ntɩ tǝ tɑɑ wɩɩ nɔɣɔlʋ.
12Amɑ mɑ kooliɣi kɛ́ sɩ mpɑ pɑ lɑkɩ-mɛɣɛ yɛlɛyɛlɛ kɛ́ mpʋ tɔ pɛlɛ pɑ́ lɑkɩ mpʋ nɑ pɑ́ puki te, hɑlǝnɑ pɑ́ pǝsɩ kɑtɑɑsɩ kɛ pɑ mɑɣɑmɑɣɑ.
13Mɑ tɑɑpɑlɑɑ ye mɛ ɩlɛ pɑ lǝsɑ-mɛɣɛ sɩ ɩ́ pǝsɩ kɑsɑɣɑmpiyɑ. Amɑ kʋlʋmtʋ kɛ́ sɩ ɩ́ tɑɑ hʋʋ sɩ ye ɩ́ pǝsɑ kɑsɑɣɑmpiyɑ kɛ mpʋ ɩ́ hikɑ mǝ tǝɣǝlɛ sɩ ɩ́ tǝŋǝɣɩ mǝ yʋlʋwɛɛtʋ kʋnyɩɩlǝŋ. Aɑɩ pǝ fɛɩ mpʋ se. Amɑ nti tɔɣɔlɛ sɩ ɩ́ sɔɔlǝɣɩ tǝmɑ, nɑ ɩ́ teŋ tǝmɑ, nɑ mpʋ ɩnɩ pǝ lɑpʋ sʋʋnɑ-mɛɣɛ teu.
14Kʋsǝsɩɩtʋ tǝnɑ nyʋɣʋ ntɛ́ sɩ: Sɔɔlɩ nyɑ́ tɔɣɔntǝlɛ ɩsɩɩ n kɑ́ sɔɔlɩ nyɑ́ tɩ tɔ.
15Amɑ ye ɩ́ lɑkɩ ɩsɩɩ tɑɑlɛ wontu nɑ ɩ́ cǝlǝɣɩ tǝmɑɣɑ sǝkpɑŋ nɑ kelɑ nɑ ɩ́ wɑkǝlǝɣɩ tǝmɑɣɑ mpʋ, ɩ́ lɑ lɑɑkɑlɩ, tɔfɔ ɩ́ kɑ́ kɔɔ nɑ ɩ́ kʋ tǝmɑ tǝkpɑtɑɑ kɛ́ ɑtɛ cǝnɛ.
16Nti mɑ wɛnɑ sɩ mɑ heeliɣi-mɛ tɔɣɔlɛ sɩ ɩ́ tǝŋǝɣɩ nti Feesuɣu Nɑŋŋtʋ hʋ́lǝ́ɣɩ́-mɛ tɔɣɔ tɑm, ɩ́ tɑɑ nɩɩnɑ mǝ yʋlʋwɛɛtʋ kʋnyɩɩlǝŋ.
17Pǝ tɑɣɑ pʋlʋ, yʋlʋwɛɛtʋ kʋnyɩɩlǝm nɑ Feesuɣu kʋnyɩɩlǝm pǝ tɑ kɑɑ pʋlʋ, hɑlǝnɑ pɩɩ tɩɩ cɑɑ pǝ́ nɩɩ tǝmɑ sɔŋ. Pǝ tɔɔ kɛ́ ɩɩ pǝsǝɣɩ nɑ ɩ́ lɑ́ ɩsɩɩ mǝ mɑɣɑmɑɣɑ ɩ cɑɑ tɔ.
18Ye nti Feesuɣu Nɑŋŋtʋ hʋ́lǝ́ɣɩ́-mɛ tɔɣɔ ɩ́ tǝŋǝɣɩ ɩlɛ ɩ́ tɑ kɛ́ kʋsǝsɩɩtʋ yomɑɑ tɔtɔ.
19Pɑɑ wei ɩ nyǝmɑ́ teu kɛ ɩsǝnɑ yǝlɑɑ mpɑ pɑ tǝŋǝɣɩ pɑ yʋlʋwɛɛtʋ tɔ pɑ kʋlɑpʋtʋ wɛɛ tɔ. Asilimɑ nɑ tɛtɛlɑkɑsɩ ɩsɑɣɑsɩ nɑ yɑɑsi ɩsɑɣɑʋ.
20Pɑ pɑɑsǝɣǝnɑ tɩɩŋ lɑɑʋ nɑ topotopo tǝmɑnɑɑ. Pɑ lɩɩkɩ tǝmɑɣɑ koloŋɑ nɑ pɑ́ yookinɑ tǝmɑɣɑ tɑm nɑ ɩsɛsɛɛmɛɛ hɑŋɑ pɑ hɛkʋ, pɑ kǝlɑ pɑ́ɑ́nɑ́ nɑ ɩkǝllɛ pɛɛkʋɣʋ, n kɑ́ nɑ́ pɑ fɑɣɑɑ nɑ pɑ́ tɑlɑ kpekɑ kpekɑ nɑ pɑ́ sʋʋ tǝmɑɣɑ yoonɑʋ.
21Ye ɩ nɑwɑ ɩ tɔɣɔntǝlɛ pʋlʋ ɩ tɑɑ hɑŋ, pɑ kɛ́ sʋlʋnyɔɔlɑɑ, pɑ fɛɩ pɑ tɩ kpɑʋ kɛ leleŋ nɩɩlɩ ɩ tɑɑ, nɑ pɑ́ lɑkɩ ɩsɑɣɑtʋ lɛntǝnɑɑ kɛ mpʋ tɔtɔ. Mɑ tɑsǝɣɩ-mɛɣɛ heeluɣu ɩsɩɩ mɑ tɛm-mɛɣɛ heeluɣu tɔ, pɑ tǝnɑ mpɑ pɑ lɑkɩ mpʋ tɔ pɑ kɑɑ fɛlɩ nɔɔhǝlɛ kɛ Ɩsɔ Kɑwulɑɣɑ tɑɑ.
22Amɑ Ɩsɔ Feesuɣu nɑ́ lɑkɩ nɑ yǝlɑɑ sɔɔlǝɣɩ tǝmɑ nɑ pɑ́ hikiɣi lɑŋhʋlʋmlɛ, nɑ pʋlʋ ɩɩ pɛkǝlǝɣɩ-wɛ, nɑ pɑ́ wɛnɑ tǝmɑ nɑ suulu, nɑ pɑ wɛnɑ pɛɛlɛɛ nɑ pɑ lɑkɩ tǝmɑɣɑ kʋpɑntʋ nɑ pɑ́ tǝŋǝɣɩ tɑmpɑnɑ.
23Nɑ pɑ wɛ tǝpɑmm nɑ pɑ́ tɔkǝɣɩ pɑ tǝɣɩ teu. Kiiu fɛɩ ŋku kʋ kʋɣɩ tǝnɛ ɩnɩ tǝ tɑɑ nɑtǝlɩ tɔ.
24Mpɑ pɑ pǝsɑ Yesu Kilisiti nyǝ́mɑ tɔ pʋntʋnɑɑ kpɛŋnɑ pɑ yʋlʋwɛɛtʋ nɑ tǝ kʋnyɩɩlǝŋ nɑ tǝ kɔtɔɩnɑɑ kɛ́ nɑ pɑ́ kʋ́ tǝnɑŋnɑŋ.
25Feesuɣu lɑpǝnɑ nɑ tǝ́ hiki weesuɣu pǝ tɔɔ kɛ́ tɩɩ yele nɑ tǝ́ tǝŋ mpi kʋ hʋ́lǝ́ɣɩ́-tʋ tɔ.
26Tǝ́ tɑɑ hɔŋ tɑ́ tɩ nɑ tǝ́ kpɑɑsǝɣɩ, tǝ́ tɑɑ kʋsǝɣɩ tɑ́ tǝmɑ pɑ́ɑ́nɑ́ nɑ tǝ́ lɑkɩ tǝmɑɣɑ ɩsɛsɛɛmɛɛ.
