ጋላቲያ 5

1

2

3

4

5

6

¹ኑኒ ኣይሌቴꬃይ ባይናን፥ ዴዓና ማላ፥ ኪሪስቶሲ ኑና ኣይሌቴꬃፔ ኬሴዳ፤ ሲሚ ሚኒዴ ኤቂቴ፤ ላዔንꬁዋ ኣይሌቴꬃ ሞርጌ ሚꬃን ዋፄቶፒቴ።

²ሲሲቴ፥ ታኒ ጳዉሎሲ፥ ሂንቴንታ ያጋይ፤ ሂንቴ ቃፃሬቲያዋ ጊዶፔ፥ ኪሪስቶሲ ሂንቴንታ ኣይኔ ማዴና።

³ቃፃሬቲያ ኡባቱ ሂጊ ጊያዋ ኡባ ፖሊዴ ናጋናው ቤሲያዋ ጉጃዴ ቆፔꬃይ።

⁴ሂጊያ ናጊዴ ፂላናው ኮዪያዋንቶ፥ ኪሪስቶሳፔ ሻኬቴዲታ፤ ፆሳ ኣꬎ ኬካቴꬃፔካ ኩንዴዲታ።

⁵ኑና ጊዶፔ፥ ኑኒ ፆሳ ኣያና ባጋና ኣማኑዋን ፂላናው ናሼቻን ናጌቶ።

⁶ኣዪሲ ጎፔ፥ ኑኒ ኪሪስቶሲ ዬሱሳና ኢቲፔ ዴዖፔ፥ ሲቁዋን ኦꬂያ ኣማኑዋፔ ኣቲን፥ ቃፃሬቲናካ፥ ቃፃሬቴናኒ ኣጊናካ ኑና ኣይኔ ማዴና።

⁷ካሴ ሎዖ ዎፂታ፤ ሺን ቱማቴꬃው ሂንቴ ኤኖ ጌና ማላ፥ ኦኔ ሂንቴንታ ዲጌዳዌ?

⁸ሃ ጪሙ ሂንቴንታ ፄሴዳ ፆሳፔ ዪቤና።

⁹ኣሳይ ጊያዋዳን፥ ጉꬃ ኢርሹ ሙናቃ ኡባ ዴንꬄ።

¹⁰ሂንቴንቱ ሃራባ ቆፔናዋ ታኒ ፆሳን ኣማኔታይ፤ ሺን ሂንቴንታ ሜቲያ ኡራይ ኦና ጊዶፔኔ፥ ፆሳፔ ባሬ ፒርዳ ኣካናዋ።

¹¹ሺን ታናዳን ኣማኒያዋንቶ፥ ታኒ ሃዋ ጋካናው ቃፃራይ ኮሺያዋ ኦዲያዋ ጊዶፔ፥ ታና ኣዪሲ ዬዴርሲኖ? ሄዌ ቱማ ጊዶፔ፥ ታኒ ኪሪስቶሳ ማስቃሊያባ ታማሪሲና ኣይኔ ሜቲያባይ ባዋ።

¹²ሂንቴንታ ሜቶꬂያዋንቱ ባሬንታ ባሬንቶካ ጎይሬሪኪኖሻ!

¹³ሂንቴንታ ጊዶፔ፥ ታናዳን ኣማኒያዋንቶ፥ ኣይሌቴꬃፔ ኬሳናው ፄሴቴዲታ። ጊዶፔኔካ ኣይሌቴꬃፔ ሂንቴ ኬሴዳዋን፥ ሂንቴ ኣሳቴꬃ ኣሙ ሂንቴንታ ሞዶፖ። ሄዋ ዲራ ሲቁዋን ኢቱ ኢቶ ሞዴቲቴ።

¹⁴ኣዪሲ ጎፔ፥ ሂጊ ኡባይ ኢቲ ሃሳያን ቃሼቴዳ፤ ኢካ፥ «ኔ ሾሩዋ ኔ ሁጲያዳን ሲቃ» ያጊያዋ።

¹⁵ሺን ሂንቴ ኢቱ ኢቱዋና ሳዔቲያዋኔ ሜቴቲያዋ ጊዶፔ፥ ሂንቴ ሂንቴ ጊዶን ዉሬና ማላ ናጌቲቴ።

¹⁶ሺን ሲሲቴ፤ ፆሳ ኣያናይ ሂንቴንታ ካሌꬂያዋ ጊዶፔ፥ ሂንቴ ኣሹዋ ኣሙዋ ሙሌካ ፖሊኪታ።

¹⁷ኣዪሲ ጎፔ፥ ኑ ኣሹ ኣሞቲያዋ ጌሻ ኣያናይ ኢፄ፤ ቃሲ ጌሻ ኣያናይ ኣሞቲያዋ ኑ ኣሹ ኢፄ፤ ሃዋንቱ ኢቱ ኢቱዋና ኢፄቲኖ። ሄዋ ዲራው፥ ሂንቴ ዶሲያዋ ኦꬃናው ዳንዳይኪታ።

¹⁸ሺን ፆሳ ኣያናይ ሂንቴንታ ካሌꬂያዋ ጊዶፔ፥ ሙሴ ሂጊ ሂንቴንታ ሞዴና።

¹⁹ኣሹዋ ኦሱ ኤሬቴዳዋ፤ ኢካ ኣዬ ጎፔ፥ ዎሹሚያዋ፥ ቱናቴꬃ፥ ኣꬌዳ ቱናቴꬃ ኦሱዋ፥

²⁰ኤቃው ጎዪኒያዋ፥ ቢቲያዋ፥ ሞርኬቴꬃ፥ ፓሉማ፥ ቃናቲያዋ፥ ሃንቁዋ፥ ባሬና ዶሲያዋ፥ ዋላቄቲያዋ፥ ኢቱ ኢቱዋፔ ሻኬቲያዋ፥

²¹ኣሳዋ ኣሞቲያዋ፥ ማꬆቲያዋ፥ ዬꬃንቻ ጊዲያዋኔ ሃዋንታ ማላቲያዋንታ። ካሴካ ታኒ ሂንቴንቶ ኦዴዳዋዳን፥ ሃዋንታ ማላቲያዋንታ ኦꬂያዋንቶ ፆሳ ካዉቴꬃን ጌሊያሳይ ባዋ።

²²ሺን ጌሻ ኣያና ኣይፊ፥ ሲቁዋ፥ ናሼቻ፥ ሳሮቴꬃ፥ ዳንዳያ፥ ኬካቴꬃ፥ ሎዖቴꬃ፥ ኣማኔቲያዋ፥

²³ኣሺኬቴꬃ፥ ባሬ ሁጲያ ናጊያዋ። ሄዋንታ ማላቲያዋንታ ዲጊያ ሂጊ ባዋ።

²⁴ኪሪስቶሳ ዬሱሳባ ጊዲያዋንቱ ባሬንቱ ኣሳቴꬃ ኣ ኢታ ቆፋናኔ ኣ ኣሙዋና ኢቲፔ ማስቃሊያ ቦላን ሚሲማሪያን ꬊሺዴ ካቄዲኖ።

²⁵ኑሲ ጌሻ ኣያናይ ዴዑዋ ኢሞዋፔ ጉዪያን፥ ኑና ቃሲ ኢ ካሌꬆ።

²⁶ኣኔ ኦቶሬቲያዋ፥ ዎይ ኢቱ ኢቱዋ ሃንቄꬂያዋ፥ ዎይ ኢቱ ኢቱዋ ቃናቲያዋ ኣጎይቴ።