1Niŋgiŋ tâmiric junaŋte Kristozi goroŋ‐nâpowec. Irec gâcnezi niŋgiŋko râec‐ŋoparâ kiŋaŋ qaqa eniŋte muŋarepie qikiŋnenʒepieŋ.
2No Paulozi ŋazape mananiŋ, ŋoŋe sahac‐ŋeŋicko ma bapie Kristozi ŋoŋerao wiac omane tinac eocmu.
3Mocwâc harierâ ŋaza‐jâmbâŋkepe, moc e sahac‐ticnao ma baocmuzi sâcmutâc dâŋ gâcne sâko mâmâc hâpo‐fâreme sâckeocmu.
4Sâcmutâc dâŋ reŋkehuc kiŋfâsâc ezo mueŋgopieŋ ŋoŋe Kristohec ʒâʒâfic embiŋ i tâcnekac â aki anonoczi ŋoŋerao fârimâc ekac.
5Nâŋe ine Mârorao ŋesiŋnehuc mamanasiŋte erâ kiŋfâsâc ee bâfuanaŋte irec mamanac jueŋgopeneŋ.
6Kristo Jesurao fisirâ mahec juju â ma tâmiric juju irec mâmâc jaha fârimâc muzo, mamanasiŋte qâreŋ maŋko fuame irec mocjaha fârine muzo.
7Ŋoŋe mitire hata sâcne fuŋkerâ âtembiŋ. Âtehapie mozi aka heŋareme dâŋ fâri qizecne râpeckeŋgopieŋ?
8Hefârec‐ŋopawec eki irec esoc qafeŋ mi eŋarekac.
9Qowi hâhâtâcne pitic siŋgaŋ gaucnezi nânâ sicko hurâ mâmâc sâcke‐fâreocmu.
10Erâ ŋoŋe nore dâŋ mi qikiŋneniŋmu, i Wofuŋte erâ manabâc tâmiric mukopac. Â ŋic izi me izi maŋ bâsifuc eŋareocmu, e kiŋ irec okacne fisicneocmu.
11Âgofâc, no ine mahec eniŋte ŋic jazazapo muzac, wemocko fific guguriŋ moc enarenʒapiŋ? Iŋuc jazazapoo maripoŋte mamana gâpâre i mâmâc omaezac.
12Maŋqaqa eŋareeŋgopieŋ ŋic iŋucnezi sahac‐jeŋic hetâc qâtâcnenʒapiŋ me!
13Âgofâc‐nane, ŋoŋe niŋgiŋ tâmiric juniŋte hefârec‐ŋopakicne, erâ niŋgiŋ tâmiric jujuzi âki eha sahacte dâŋ reŋkeniŋte mâcne, maŋjauŋko kiŋaŋ qaqac eniŋte irec hefârec‐ŋopakicne.
14Irec hâcne sâcmutâc dâŋte qâqâhâc ʒiŋuc mukicne: “Gahacnere egareekac, sâc ijaha âgogere egarezejec.”
15Ŋoŋe ine miczi nânâc ehuc kikic qaqac boc erâ oomaec enʒipiŋte uŋ ŋazakopac.
16Erâ ine ʒiŋuc mukopac: Ŋoŋe Mârore tâpirio siŋkerâ junʒepieŋ, iŋuc ehuc maŋraŋɋare sasec gie mi baniŋmu.
17Maŋraŋɋare aŋaczi hâcne Mâro kisueekac â Mârozi maŋraŋɋa kisueekac, eme jahe hâcne rârâsi epire ŋoŋe wiac ezo mueŋgopieŋ i sâcne mi afeckerâ eeŋgopieŋ.
18Mârozi jowa baafec eŋareme ine sâcmutâc dâŋzi ŋicbomboŋ mi eŋareocmu.
19Maŋraŋɋare gie i soŋsoŋko mi foekac, i ʒiŋuc fuaekac: Boe sau, mamakâc, nâ areŋ,
20nemu araŋ babajare, hafec qaŋgec, rârâsi, sosopec, iiŋguuŋ, kimbeŋ, hehefaric, fâfâuc, rârâwiŋ,
21mu kâroŋ, opâ momori me bec qowi âmbâŋ nânâ, erâ wiac gâcne. Wiac iŋucnere mârâc jaha ŋazapo erâ ʒi mocwâc ŋazape: Sâqocne i baniŋmuzi Anuture uucmaŋko mi raʒiniŋmu.
22Mârore fârine ine kecʒiŋuc fuaekac: Maŋjauŋ, bubiaŋ, wama, bumâteŋ, buafec, buuruc, ââgo sanaŋ,
23ruaine, maŋzi sowa juju. Mârore fârine hâcne irec aka mi fokac.
24Kristo Jesure biŋe jueŋgopieŋ jaŋe juju raŋɋa‐jeŋic sasec â sâqocnere andachec i maripoŋko qapie omaewec.
25Mârore tâpirire jueŋgopeneŋko Mârore hata jaha âtenʒepeneŋ.
26Sahaczi fecko fec ehuc hehesuac mi enʒepeneŋ, erâ wâc iiŋguuŋ mi eec enʒepeneŋ.
