Pɔli la bataki lawa Kalatikailu ma 5

1

2

3

4

5

6

¹Ɲenematɔmɔnin ka an hɔrɔya, sa an di kɛ mɔɔ hɔrɔyani jɛrɛ jɛrɛ ri. Wo le rɔ, ai ye ai rajala. Ai kana sɔn mɔɔilu ye ai bila sariya jɔnya rɔ kokura.

²Ai ye ai tolo malɔ! Nde Pɔli kan ko ni ai sɔnda mɔɔilu ye ai kojiikɛ, Ɲenematɔmɔnin ka baara mɛn kɛ ai yɛ, wo tɛ foyi ɲa ai ma.

³N ye a fɔla ikɔ ko mɔɔ mɔɔ wa sɔn mɔɔilu ye a kojiikɛ ten, fo wo tii ye Nabi Musa la sariya bɛɛ labato; diyagboya le wo ri.

⁴Ai mɛnilu ye a ɲininna ka kɛ mɔɔ telen ri ka fara Nabi Musa la sariya la, ai ra ai jɛrɛ fara Ɲenematɔmɔnin na. Ai ra ai kɔdon Alla la ɲumaya la.

⁵Kɔni andeilu, an jii ye a kan ko Alla ri an jate mɔɔ telenni ri. Nin Sɛniman ye an dɛmɛnna ka wo le makɔnɔ ka fara an na lemɛniya la.

⁶Baa ni mɔɔ sidini Isa Ɲenematɔmɔnin ma, kojiikɛ tɛ foyi ri butun, kojiikɛbaliya fanan tɛ foyi ri butun. Mɛn ye ko ba ri, wo ye lemɛniya le ri, lemɛniya mɛn ye mɔɔ lɔla kewalilu kɛla kaninteya kosɔn.

⁷Ai tɛrɛ ye ai borila koɲuma! Yon ka ai la sila tɛɛ, ka ai mabali tuɲa labatola?

⁸Mabalili wo ma bɔ ale rɔ, mɛn ka ai kili.

⁹«Lɛbɛn fitinin di buru siyaman nawuli ka a funun.»

¹⁰Nba, n lani ai la ko ai la miriya a ni n na miriya a ri kanya, baa an bɛɛ sidini Maari ma. Kɔni mɔɔ mɛn ye ai hankili ɲaaminna, wo tii ri a sara sɔrɔn, a kɛra mɔɔ su su ri.

¹¹N badenmailu, ni n ye mɔɔilu kawandila fɔlɔ ko alu ye kojiikɛ, nfenna mɔɔilu ye n tɔrɔla? Ni n ye mɔɔilu kawandila ten, Ɲenematɔmɔnin faa ko gbɔngbɔn jiri kan, wo tun tɛna gbala mɔɔ si la.

¹²Mɔɔ mɛnilu ye ai lamaala, woilu ka kan ka ie jɛrɛ cɛya diya tɛɛ!

¹³N badenmailu, Alla ka ai kili sa ai ri kɛ mɔɔ hɔrɔyanilu ri. Kɔni ai kana hɔrɔya ko wo kɛ sababu ri ka ai farikolo diyana koilu kɛ. Ɛɛn! Ai ye ai ɲɔɔn dɛmɛn, kanintɛya kosɔn.

¹⁴Baa Alla la sariya bɛɛ ye sɔrɔnna ɲin kuma kelen de kɔndɔ ko: «I ye i mɔɔɲɔɔn kanin ikomin i jɛrɛ.»

¹⁵Ni ai ka ai ɲɔɔn cin ka ai ɲɔɔn rafarafara, ai ri ai jɛrɛ tiɲan.

¹⁶N ye a fɔla ai yɛ ko ai ye taama ka a bɛn Nin Sɛniman na sila ma, wo rɔ nata juu mɛnilu ye ai fari rɔ, woilu tɛ ai lɔ kojuu kɛla habadan.

¹⁷Baa nata juu mɛnilu ye ai fari rɔ, woilu ye Nin Sɛniman sɔsɔla. Nin Sɛniman fanan ye woilu sɔsɔla. Alu ye ie ɲɔɔn kɛlɛla. Wo rɔ, ai ye a fɛ ka mɛn kɛ, ai ti se wo kɛla.

¹⁸Kɔni ni ai ye taamala ka a bɛn Nin Sɛniman na sila ma, ai tɛ Nabi Musa la sariya fanka kɔrɔ butun.

¹⁹Farikolo ye baarada mɛn kɛla, wo le ɲin di, bɛɛ ka a lɔn: jatɔya ni ko nɔɔni kɛ ni malobaliya koilu

²⁰ni joo sɔli ni subaaya ni lagboyaɲɛ ni sɔsɔli ni kɛlɛya ni jusu mangbɔya ni natabaya ni bɛnbaliya ni kanintema le fara ie ɲɔɔnna,

²¹ni nata ni dɔlɔmin ni manamana ko dan natamin mɔɔilu, a ni wo ɲɔɔn gbɛrɛ. N ye ai lalɔninna sisen ikomin n ka ai lalɔnin ɲa mɛn fɔlɔ ko mɔɔ mɛnilu ye ko su woilu kɛla, woilu tɛ ninyɔrɔ sɔrɔn Alla la mansaya rɔ.

²²Kɔni Nin Sɛniman ye a den mɛn kɛla mɔɔ jusu kɔndɔ, wo le ɲin di: kaninteya ni sewa ni jususuma ni muɲunnin ni mɔɔ dɛmɛnnin ni ɲumaya ni lemɛniya

²³ni sabari a ni senjɛrɛla. Sariya si tɛ ko su woilu kanma.

²⁴Mɔɔ mɛnilu ye Isa Ɲenematɔmɔnin ta ri, alu ra ie sawonan koilu ni ie nata juu bailu bɛɛ gbɔngbɔn jiri kan.

²⁵Ni an da ɲenemaya kura sɔrɔn Nin Sɛniman na, an ka kan ka an taama ka a bɛn a la sila ma.

²⁶An kana jɛrɛdabaya kɛ, an kana sɔsɔli lawuli an ni an ɲɔɔn tɛma, an kana an ɲɔɔn kɛlɛya.