GALESIA 5

1

2

3

4

5

6

¹Kale Krais imi aget fugunin uyo, nuyo sok de imolin binim ilitap tambaliim bom-bilipta o age-nalata, numi Moses imi ulo tebe-nulu sok de imolin ke-suu uyo talaa imda-se kale, ibo imkalip Juda kasel iyo tebe sok de imolin kelip Moses imi ulo uyo asok maak so waafunamin ba kale, titil fagaa mo bom-bilipta o ageta ko.

²Niyo Fol nita weng baga-e-bii kale, tinangkulin. Kanube tinum ibo, God iyo nuyo, “Tol tinum o,” agelak o age-nilipta, Juda kasel iyo imkalip tebe-nilipta, ipmi kaal uyo ukan kebelip umdii, Krais imi at diim kaan-se boyo ibo dong dogobelan-temaalu kale, atin binim ko.

³Kale imkalup tebe numi kaal uyo ukan kebelin o agan-bilip tinum ibaa. Niyo weng koyo asok kem bogobelan-temi kale, dogap kapta kanupmin kuguup bota waafulap umdii, kabo Moses imi ulo alugum umi afak tem iinapta, sok de kamolin kelan-temu ko.

⁴Kale tinum iip maak maak ipmi aget fugunin uyo, God iyo nuyo bogobe-nala, “Ibo tol tinum o,” agelak o age-nilipta, Moses imi ulo uta waafusip kuta, kanupmin kuguup boyo ibo Krais iyo dupka-nilipta, God imi tebe ipmi dong dogobelan agin umi ilep uyo kupka-silip ko.

⁵Kuta numi aget uyo kam aganbaalup binim kale, God imi Sinik iyo kuntuk mobela God imi ilak uyo dolup kalaa age-nalata, bogobe-nala, “Ibo tol tinum kelip o,” age-se kale, nuyo utamupta, God imi weng bota atin fen kalaa age-nulupta, weng boyo fen-bulupta, mitam abuluk o age-nulupta, fen-bulup ko.

⁶Kale kanube tinum iyo Yesus Krais imi diim kal febala uyo, kaal ukan kemin bota tebeta, dong dogopman-temaalu e minte, kaal ukan kemin binim ugol mungkup dong dogopman-temaalu no ko. Ale kanube tinum iyo Yesus Krais imi ilak uta do-nala ipkumal unang tinum migik iyo inal o agan-kala umdii, kanupmin kuguup bota tebe-nuluta, beyo dong dogopman-temu ko.

⁷Siin uyo ipmi Krais imi ilak dugamin uyo mitam titil faga-suu kuta, kamano koyo tinangkulita, “Bilip iyo God imi tuluun weng uyo maak so waafubaalip o,” agelip tinangku-nilita, nimi aget tem uyo kumang mo-nilita, mafaganepnebu ko.

⁸God iyo ibo olabela meng ilami finang uyo talan-bomip kale, God ita tebe, “Ibo uget togolita, nimkalin o,” agan-nuubaala ko.

⁹Ipkil utamsip kale, kanube kabo mufekmufek atul tebesu uyo katip daalap yak unan-kalin umi iibak tem kwek iinon-tema uyo, bemi atul tebe unan-kalin boyo bugulan-temu ko. Ulutap kale, tinum tebe bisop weng ipmi baga-e-bilip bilip iyo iip maak maak ita kup kuta, bilip iyo tebe unang tinum kwiin tagang iyo ifak daalan-temip ko.

¹⁰Kale niso mangkal ninggil maagup ke Kamogim Yesus imi ilak uyo do-sulup kale, niyo utamita e, fen ibo nimi aget fugunin bota waafulan-temip uta, ibo bisop bagamin tinum kulip imi aget fugunin uyo migik umaak waafulan-temaalip kalaa agan-bii ko. Kale tinum iyo waantap ita tebe-nilip ipmi aget fugunin kufak daga-e-bilip umdii, bota God yagal tebe tinum bemi fengmin bomi yan uyo kepman-tema ko.

¹¹Kuta tinum iip maak maak iyo bogo-nilip, “Fol ita tebe alugum tinum iyo bogobe-nala, ‘Ipmi kaal uyo ukan kebelipta, God iyo bogo-nala, “Ibo tol tinum o,” agelak o,’ age-nalata, baga-emin kup tebesa o,” agan-nuubip kale, duubal ibaa. Kanube niyo weng boyo baga-em tebesi nimnam, Juda kasel iyo kuguup mafak uyo kupkanem tebesaalip kuta ko. Kale kanube niyo kanupmin weng boyo kam age-nili baga-e-bii nimnam, Yesus imi at diim kaan-se bomi sang umaak tebe-nuluta, Juda kasel imi bubul atul kobeluta, olsak tabanbaalip kuta ko.

¹²Kale tinum ko tebe-nilip ipmi aget fugunin kufak daga-e-bilip bilip iyo, kanubelip umdii, bilip iyo atuk atuk kemin ba kale, ilimi kaal uyo alugum ukan kebelin o ageta ko.

¹³Duubal ibaa. Dam kale, God iyo ibo olabelata, te tam Moses imi ulo waafunamin bomi ilep uyo kupkaa sok de imolin binim ilitap ke-silip kuta, ibo ilipmi aget uta fugun-bom-nilip e, “Nuyo nugol nulumi aget uta kup fugun-bom mufekmufek kemin tinum ke-sulup kale, kanube nuyo siin kuguup boyo kanubelum o agelup uyo kanube-numup o,” agan-kalin ba kale, ibo ipmi ipkumal imi aget uyo kobe-nilip e, ilami bon tem kup kiit fen-bom dong dogobina tala ke-bom-nilipta o ageta ko.

¹⁴Kale alugum ulo bomi iibak tem uyo maagup kale, boyo bogo-nulu e, “Kabo kalapmi kaal umi ilak do tambaliim tiin mobap ulutap ke kapkumal kek kek imi ilak uyo do telelemal o,” agesu ko.

¹⁵Kuta kanube ibo dinan-kalin kup yakyak ke-bom niing aa fik aa dupkegina tala kemip umdii, ipmi aget maagup kiina tala kemin boyo binimanu e, alugum ibo kwego dego ke mafaganan-temip kale, ibo tele utama-bom-nilipta o ageta ko.

¹⁶Kale nimi weng uyo kulbu ko. Ibo God imi Sinik beta dupkalip tebe ibo tiin molata o ageta kale, ibo kanuman-temip uyo ibo siin kuguup uyo maak so waafulan-temaalip binim kale, God imi Sinik imi kuguup kafale-be uta kup waafulan-temip ko.

¹⁷Kale nulumi siin aget fugunin yagalami bogo-nala, “Bota kanumal o,” agan-bala e minte, God imi Sinik yagalami bogo-nala, “Bota kanumal o,” agan-bala no kem-nuubip kale, alop bilip ita waasi kebina tala ke-bilipta kale, kabo, kuguup tambal uyo waafulan o agan-balap uyo bagang-kale waafu-namap binim kem-nuubap ko.

¹⁸Kale God imi Sinik imi weng waafusip ibo Moses imi ulo umi afak tem kal albaalip ko.

¹⁹Kale ibo siin umi kuguup kanumin uyo utamsip kale, tam sa dagamin kuguup min, unang umi utam kumang mo uget tagamin min, yak kuguup mafak mafak fitom tebesu kuguup min,

²⁰men amem umi aman duga-emin min, timon unan-kalin min, waasi kebina tala kemin min, dinan-kalin kuguup min, olsak tebemin min, titinin kuguup min, nuta nuta kelupta o agan-kalin min, wengaal digin-kalin min, tinum miit begelamin kuguup min,

²¹tinginmin kuguup min, iman kwiin tagang tigi-bii ko unan-bom ok mafak unan-bii ilum ilum kemin kuguup min, kanupmin kanupmin kuguup kemin bomi sang uyo siin uyo ibo bogobe-sii kale minte, kamano koyo asok alaang weng koyo bogobelan-temi kale, alugum unang tinum iyo kanupmin kuguup boyo waafulin kup kemip umdii, bilip iyo God imi daam tem uyo tam unipta, yagal tiin molata, tambaliim nan-temaalip ko.

²²Kale minte God imi Sinik tebe kuguup tambal uyo kwep mitam daagan-nuuba boyo kulbu ko. Tam ipkumal i-filinin min, deng tebemin kuguup min, aget tem bilili agan-kalin min, tiin itama-bilip ipkumal tebe imi mufekmufek fengemin kuguup min, ipkumal dong daga-e-bom kuguup tambal kupka-emin min, kuguup tambal uyo kup-kagamin binim suun kup waafulin kup kemin min,

²³nangkaal kuguup min, siin kuguup umi aget kup-kagamin min boyo ulo maagup umaak bogo-nulu, “Boyo kanumin ba o,” agesaalu binim ko.

²⁴Kale alugum Krais imi ilak dolin unang tinum iyo siin kuguup umi aget tem albu kwek so kuguup mafak umi aget ugaa kwaasip so uyo ungkwalip daak kaanu kupka-silip ko.

²⁵Kale God imi Sinik yagal tebe atin suun kup nin uyo numi kobe-se kale, mungkup nugol God imi Sinik imi weng uta waafulupta, yagal numi tiinemin tonamin uyo tiin mobelata o ageta ko.

²⁶Kale nuyo nulumi win uyo bisop uyo kufumin ba e minte, nuyo nugumal imi aget fugunin uyo kufak daabelup iyo olsak tebemin ba e minte, nuyo imi mufekmufek uyo tingine-bom kemin ba no ko.