1Gↄ̃na zĩdadenↄ ũ yãin Kirisi ó bói. À zɛo gíngin, àsun tó ò ɛra ò bà káárɛ á yĩn zↄ̀nↄ ũ doro.
2Makũ Pↄlu matɛn oárɛ, tó a tò ò tↄ̃̀ↄ zↄ̃̀árɛ, Kirisi ni karana kɛárɛro.
3Ma ɛra ma ò, ma karaárɛ, gbɛ̃ kũ à tò ò tↄ̃̀ↄ zↄ̃̀arɛ, séto à mì natɛ Musa dokanɛ pínki.
4Ákↄ̃nↄ kũ átɛn wɛtɛ à bo mana doka gũnnↄ, a á zĩda kɛ̃̀ Kirisia, a kɛ̃ Luda gbɛ̃kɛa.
5Yesu náanikɛnaa gũn ó bona mana tãmaa vĩ, ó wɛ́ dↄi kũ a Nini gbãnao.
6Kirisi Yesu gũn tↄ̃̀zↄ̃na ke tↄ̃̀zↄ̃nasari yãke vĩro, séde Yesu náanikɛna kũ àdi yenyĩ ińnɛ.
7Átɛn gɛ́ arɛ yã manamana. Dí mɛ́ à tɛna yãpurai zɛ́ zↄ̃̀árɛɛ?
8Yã kũ a a zɛ́ lè dí bo Luda kũ à á sísi à á sɛ́ kĩnaaro.
9Lùbɛnɛ fítinna dì flawadɛna futɛ pínki.*f1Kↄ 5:6*
10Má á náani vĩ Dikiri gũn, kũ áni nɛ̀sɛ pãnde daro. Gbɛ̃ kũ àtɛni á likara sↄ̃, ani a zĩ gbɛ̀ le, bee dímɛ.
11Makũ sↄ̃ ma gbɛ̃nↄ, tó tↄ̃̀zↄ̃na waazin matɛn kɛ ari gbãra, bↄ́yãi òtɛni ma wɛ́ tãi dↄↄ? Tó lɛmɛ, de Kirisi gana lía yã ni ũ gbɛ̃kearo.
12Gbɛ̃ kũ òtɛni á likara kũ tↄ̃̀zↄ̃na yãonↄ gɛ́ ò ń zĩda fɛ̀rɛ kɛ se.
13Ákↄ̃nↄ sↄ̃ ma gbɛ̃nↄ, Luda á sísi à gↄ̃ zĩdadenↄ ũmɛ, ama àsun tó á gↄ̃na zĩdadenↄ ũ pì gↄ̃árɛ pↄyeinakɛna zɛ́ ũro. Àgↄ̃ mì natɛkↄ̃nɛ kũ yenyĩo,
14zaakũ yã mɛ̀n do díkĩnamɛ Musa doka sĩnda pínki mì ũ: Ǹgↄ̃ ye n gbɛ̃dakei lán n zĩda wɛ̃̀ndii bà.
15Tó átɛn saka tↄ̃tↄ̃kↄ̃a átɛn kↄ̃ sóso, à laakari kɛ kↄ̃kakatɛnaai.
16Matɛn oárɛ, à tó Luda Nini doárɛ arɛ, á bisãsirikɛ pↄyeina ni láka.
17Á bisãsirikɛ pↄyeinaa dì kↄ̃ sɛ́ kũ Luda Nini pↄ́oro, akũsↄ̃ Luda Nini pↄyeinaa dì kↄ̃ sɛ́ kũ á bisãsirikɛ pↄ́oro. Òdi gíkↄ̃imɛ, abire yãi adì fↄ̃ à yã kũ á yei kɛro.*fRom 7:15-23*
18Tó Luda Nini tɛn doárɛ arɛ, doka iko vĩáwaro.
19Ó ó bisãsirikɛ dànↄ dↄ̃ sãnsãn: Pãpãkɛnaa, gbãsĩkɛnaa, wé'isariyã,
20tãnagbagbanaa, gãwãkɛnaa, zãngu, fìtii, nɛ̀sɛgↄ̃baa, nɛ̀sɛwãnaa, denlawɛtɛnaa, kɛ̃kɛ̃kↄ̃anaa, kↄ̃kpaatɛtɛnaa,
21kɛna kũ kↄ̃o ĩni, wɛ̃dɛnaa, fàai pãpã bona kũ yã bire takanↄ. Ma a lɛ́ dàáwa lákũ ma dàáwa nà yã, yã bire taka kɛ̀rinↄ ni kpata kũ à bò Luda kĩnaa lero.
22Luda Nini sↄ̃, àdi yenyĩ ińnɛ kũ pↄnnao kũ aafiaao kũ mɛnao kũ gbɛ̃kɛo kũ manakɛnaao kũ náanio
23kũ busɛkɛnaao kũ zĩdakũnadↄ̃naao. Doka ke dì gí yã birenↄ takairo.
24Gbɛ̃ kũ ò de Kirisi Yesu pↄ́ ũnↄ ń bisãsirikɛ dàa pà lía kũ a pↄ́nidɛnanↄ kũ a pↄyeinanↄ lɛɛlɛ.
25Lákũ ó kú Luda Nini gãi nà, ò a dↄ̀rↄ sɛ́.
26Òsungↄ̃ yↄ̃̀gↄ̃ vĩro, òsun kↄ̃ dↄkↄ̃aro, òsun gↄ̃baa kpá kũ kↄ̃oro.
