1Cristo, Moisés-Igar-Mesisadgi anmar-ollor-imaknonikid. Agi-anmar-maiga-gudigusadgi anmar-onosad. Degisoggu, mer gannar be maiga-gumalaga, gandik na be imakmar.
2Degisoggu, ani Pablo, an bemarga sogmardo: Ar bemar be abgan-uka-duku-siked-igar Judíoʼmar-imakmaladyob be imakmalale, Cristo bemarga ibnuedga gwen guosurmalad.
3Bela-dulemarga gannar an sogbar: Ar doa-dule abgan-uka-duku-siked-igar imaksadibe, a-dule, Moisés-Igar-Mesisadba bela daergebed.
4Dulemar Moisés-Igar-Mesisadba-nanaedgi isgussuliyobgued-amimaladi, Cristoʼgi bangunonimarsunnad. Bab-Dummad-abonoge-wilubsulinadgi, bangusmalad.
5Ar anmardi, Bab-Dummad-Burbaba, Jesúsʼgi-bensulidgi isgussuliyob daklegoedi, anmar bensuli edarbedimalad.
6Ar Cristo-Jesúsʼgi-akanimaladgi, dule-abgan-uka-duku-sikaled, degi, dule-abgan-uka-duku-sikarsulid-ebo gwen akarsulid. Unnila dulemar Bab-Jesúsʼgi-bensulidba sabedgi-ibmar-imaked bur napiragwad.
7Ar bemar Bab-Jesúsʼba nue-nagus an be-daksamalanad. Ar emide, ¿doa mer igar-napiragwadba-nanaega bemar-igar-oburusmala?
8We-igar-be-oburusmaladi, Bab-Dummad-bemarse-gochadgi gwen danisulid.
9“Ar madu-ina ichegwale, degite, bela madu-omued.” Deyobdo, dule-wargwen neg-ichononidibe, belagwapa dulemar-ichoddaed.
10Bab-Jesúsʼgi an bensulid, bemar gwen akar be binsaosurmalad, anyob be binsamarmogad. Ar dule-bemar-binsaed-gadiiddi, ar doa-duledibe, we-duledi, nue-sabsur odurdaklegoed.
11Gwenadgan, abgan-uka-duku-siked-igargi amba an sunmakdiina, degite, ¿ibiga Judíoʼmarse amba an baregilledisunna? Ar deyob an sunmakdiina, Judíoʼmar Cristo-nakrusgi-bioklesad-igar baisur-itosmalanad.
12Bitigi, dulemar-abgan-uka-duku-siked-igargi bemargi-yoledimaladi bur bela na alugwagse-bakale, gwasumarsunnana, gadin.
13Gwenadgan, Bab-Dummad, Moisés-Igargi-bachik-guega, bemarse gochad. Emide, bemar Moisés-Igargi bachikgusmaladid. Degisoggu, Moisés-Igargi-bachikgusadi, melle be igar-isgana-imakega be imako. Suli, degisuli. Na be muchub-muchub sabguedgi bendakmar.
14Ar Moisés-Igar-Mesisad bela irgwen-sogar weyob soglesiid: “Ar igi na be san-sabgue, deyobi dule-baid be sabgumogoed.”
15Ar na be muchub-muchub uludmalale, nue salakarmar, ar na be dukin-dukin obelodmaloed.
16Degisoggu, bemarga an sogsun: Bab-Burba-sogedba be nanamar, melle be-san-ibmar-imakbiedba be damar.
17Ar ade, anmar-san-ibmar-sabied Bab-Burbagi gwisgunonidaed. Degi, Bab-Burba anmar-san-ibmar-sabiedgi gwisgunonidamogad. Degisoggu, na muchub-muchub egi gwisgumardo, adi, bemar na be-ibmar-sabiedi, melle imakmalagar.
18Ar Bab-Burba bemar-idumaile, bemar Moisés-Igar-Mesisadgi bar gudisurmardo.
19Dulemar na e-san-ibmar-sabiedba-damaladi, weyob damalad: E-omesuli, degi, e-suisuli na dikarba yolemalad. Yoo-abirgunagwar-na-nikue ebo negsichigi nanamalad. Galagwensuli sunnasur damalad. E-gwagegi galagwensuli nisaedginbi binsamalad.
20Bab-dummadyob-imakleged-e-nug odummoged. Emargi ina-isgana imaked. Na isdar-dakmalad. Gadi ourwemalad. Gadi nobgumalad. Sae ibmar-itomalad. Abin-abin imakmalad. Na abin-abin urwemalad. Igar-nued-maidgi bangumalad.
21Sae emar-ibmar-nikad dakmalad. Dulemar-oburgwemalad. Gadi mumgumalad. Agumakar iba onomalad. Degi, bela ibmar-wegi-gumalad imakmalad. Idu bato an bemarga sogsadyob, gannar an bemarga sogbalid, dulemar-degidamalad Bab-Dummad-e-negdakmaidse gwen dogosurmarye.
22Bab-Burbadi, weyob dule-dae imaked: Dule-sabee-nanae imaked. Weligwar-itoge imaked. Ulubgi-bogidik-itoge imaked. Ukurmakar-ibmar-imaksuli imaked. Yeer-itogedgi-dulemar-bendake imaked. Emargi-nueddae imaked. Bab-Dummadgi-bensulidae imaked.
23Binnalegwadgi-ibmar-sae imaked. Dukin-na-san-bargae imaked. Weyob Bab-Burba-dule-dae-imakedgi bela igarmar-mamaid geg egi gwisgued.
24Ar dule-Cristoʼgadid, na e-sanginbi-binsaedi, degi, galagwensuli-ibmar-isganabina-itogedi bar sedisulid, ar bato nakrusgi we-ibmar bioksad.
25Ar anmar Bab-Burbaba-gudiile, anmar Bab-Burba-sogedba nanamarbarsundo.
26Degisoggu, mer na san-dummarbaa imakmar. Mer na be muchub-muchub emar-ourwedii gumar, degi, mer be aimar-ibmar-nikad-isdardakdii gumarbar.
