Gálatas 5

1

2

3

4

5

6

¹Jesucrist mle zee nagakt be tub mos cheen ley. Kwaanzee, nye zo be lo xcheen Jesucrist nu nagaktra be tub mos cheen ley, nel lee ley nak mod tub yog kwaan nga nzhib yenn be, nu kwaanzee nawiitra be lo ley stuba.

²Bkenzha gu. Na Pab, nii na lo gu. Chelee gu ko gu gu beyy cheen nu, zee lee Jesucrist nanont lo gu.

³Nu stub welt nii na lo rese xaa kwaan nzhekla yo re xaa beyy cheen nu, nkin le xaa rese kwaan nabeyy ley cheen Ches.

⁴Re gu, xaa nzhekla kayaa Dios gu mod tub xaa nali nel nle gu kwaan nzhé ley cheen Ches, tira mbachii gu lo Jesucrist nu lo yalnkela cheen Dios.

⁵Per re be ngwii lo Dios kwent cheen Mbi Naban, nu nkambaz be gak be tub xaa nali lo Dios.

⁶Nel chelee be tubka nzo be kwaan Jesucrist, nanont yo xaa beyy o nayot xaa beyy cheen sawlazh na. Lee kwaan non nak le be rese kwaan kwent cheen yalnkela, zee nlu ngwii be lo Dios.

⁷Wen nzha re gu. ¿Cho mle zee namkenzhatra gu wdizh chul kwaan wli?

⁸Nu naleet Dios xaa kabezh gu mleya.

⁹Mod mbezh xaa: “Chepse lebadur ntexoob dubse koob”.

¹⁰Telisa ded xaa bid, re xaa kwaan nzhekla le chop xgab cheen gu, nexa cho xaa zee. Nu ne na lee Xaa Nabeyy, le zee lee re gu nacheet xgab cheen.

¹¹Wech nu bzan, chol ngle na jwers yo re xaa beyy cheen nu, xaa Israel, kwaan mle na yilo; nu chol sbaa ngle na nal, zee lee re sawlazh na nangrenalt na, nel zee lee kwent kwaan mkee Jesucrist lo krus, nangakt nik tub storb lo xaa.

¹²Nu lee re xaa kwaan kachee xgab cheen gu, ¡oj tira ngle kapon xaa xaa!

¹³Wech nu bzan, Dios mleey re gu zee nawiitra gu lo ley. Nakint kozhaw gu ley, per nanzhaalt le gu rese kwaan nzhekla kwerp cheen gu. Nu nal wen kela gu nu ble gu yudar tub gu stub gu.

¹⁴Nel dubse ley nzho mod nii beya kwaan tubka wdizh ne: “Bkela wechxinn lu modxa nkela lu leeka lu”. Lv. 19:18

¹⁵Per chelee gu nkwaan gu diizh nu ndil leeka re gu kwenta ma nakap, nzho mod lux gu leeka re gu.

¹⁶Kwaan nii na lo gu nak: Le be kwaan nzhekla Mbi Naban nu nalet be re kwaan nzhekla kwerp cheen be.

¹⁷Nel lee re kwaan nzhekla kwerp cheen be nzha kontr cheen Mbi Naban, nu kwaan nzhekla Mbi Naban nzha kontr cheen re kwaan nzhekla kwerp. Tuba nzha kontr stuba, kwaanzee nyent mod le be kwaan nzhekla be.

¹⁸Nu chelee Mbi Naban nabeyy lo be, zee lee ley nanabeyytra lo be.

¹⁹Nu nanagant luu re kwaan nle re xaa, xaa nle re kwaan nzhekla xkwerp: nchaal xaa stub ngwnaa, nzoblazh xaa chaal xaa zyen ngwnaa, nzho re xgab nachan yek xaa,

²⁰ngwii xaa lo maj, nya xaa lo wezh, nayii xaa ne xaa stub xaa, ndildiizh xaa, nzhak selos xaa, tira nanagant yii xaa, nzhak meskin xaa, nle rol xaa re xaa, nu nle xaa zee nakwiwent stub naz xaa,

²¹nzoblazh xaa, nzuzh xaa, nya xaa yalni pa nle xaa rese kwaan nzhekla kwerp cheen xaa, nu stub naz kwaan nawent kwenta re kwaane. Nu bare na nii na lo gu, kwentaxa nguniila naya lo gu yilo, lee re xaa kwaan tubka nle re kwaane, nayizot xaa Pa Nabeyy Dios.

²²Per lee kwaan nle Mbi Naban lextoo xaa nak: nkela xaa, chul nzhak lextoo xaa, chul nzo xaa kwaan Dios, nyela xaa, chul nkayaa xaa stub xaa, wen nak xaa, nanlaat xaa Dios,

²³nadoo nak xaa, nanlet xaa re kwaan nzhekla kwerp. Nu nik tub ley nyent mod né nawent re kwaane.

²⁴Per lee re xaa nak xaa Jesucrist, nanletra xaa rese kwaan nzhekla kwerp cheen xaa, nel mkeela xaaya lo krus kwaan Jesucrist, nu snee ngutla xaa lo re kwaan nak kwaan yizhyo ne.

²⁵Nu lee nal cheleeya kwaan Mbi Naban mban be, noka laa be nabeyy Mbi Naban be.

²⁶Natot be yalxwa, nakwaant be dil, nu nixa nazoblazht be cheen wechxinn be.