1O Kristus amen oslobodzinďa, hoj te avas slobodne. Vašoda ačhen andre odi sloboda a ma visaren tumen pale andro otroctvo.
2Me, o Pavol, tumenge phenav, hoj te tumen dena te občhinel (obrezinel), akor tumenge o Kristus nane pre ňisavi chasna.
3Ale kamav te phenel dojekhe manušeske, ko pes del te občhinel, hoj mušinel te doľikerel calo zakonos.
4Tumen, save kamen te el ospravedlňimen prekal o zakonos, imar na san le Kristoha. Peľan avri andral le Devleskero lačhipen (milosť).
5Ale amen pes mukas pre oda, hoj anglo Del avaha ospravedlňimen pačabnaha prekal o Duchos.
6Bo te hin o manuš andro Ježiš Kristus, na džal pal oda, či hino občhindo (obrezimen), abo na. Džal pal o pačaben, so pes presikavel le kamibnaha.
7Avke mištes denašenas! Ko tumen zaačhaďa, hoj te na šunen o čačipen?
8Oda, ko tumen prevakerel, na sas Olestar, savo tumen vičinďa.
9“Sikra drožďi anel upre calo chumer.”
10Pačav andro Raj pal tumende, hoj tumen na gondoľinena avres. Ale o Del marela oles, ko tumen diliňarel andre, choc te ko oda ela.
11Phralale, te me mek vakerďomas, hoj pes kampel te občhinel (obrezinel), akor soske pre mande mek furt džan? Te oda uľahas čačo, ta akor o kerestos le Kristoskero imar lenge na anďahas o rušiben.
12Ola manuša, save tumen upre maren, peske mi čhinen avri sa!
13Ale phralale, tumen san vičimen pre oda, hoj te aven slobodne. No, ma len e sloboda prekal tumaro ťelos, hoj kerena oda, so kamen tumare žadosci, ale služinen jekh avreske andro kamiben.
14Bo calo zakonos hin dokerdo andre jekh prikazaňje: “Kameha avres avke, sar pes korkores!”
15Ale te jekh avres chan the danderen, den pozora, hoj te na aven jekh avrestar zachale!
16Ale phenav: Dživen pal o Duchos a na kerena o žadosci le ťeloskere.
17Bo o ťelos na kamel oda, so o Duchos, a o Duchos na kamel oda, so o ťelos.
18Ale te tumen ľidžal o Duchos, na san tel o zakonos.
19O skutki le ťeloskere igen dičhol a oda hin kala: Te kerel o lubipen, te kerel o nažužipen, te dživel bi e ladž,
20te služinel le modlenge, te čarinel, te džal jekh pre aver, te vesekedinel pes, te thovavel pes, te choľarel pes, te marel upre jekh avres, te rozulavel pes, te rozmarel o khangera,
21te zavidzinel, te murdarel, te mačol a te mulatinel. A mek hin but ajse veci. Pal kala veci tumenge imar anglal phenav, sar imar the sigeder phenďom: Ola, save keren kala veci, na chudena le Devleskero kraľišagos.
22Ale o ovocje le Duchoskero hin o kamiben, o radišagos, o smirom, o avriľikeriben, o lačhipen, o lačhejileskeriben, o pačivaľiben,
23o kovlejileskeriben the o zľikeriben. Pre kala veci nane zakonos.
24Ola, save hine le Kristoskere, primarde pro kerestos peskere nalačhe binošne žadosci.
25Te dživas le Duchoha, mušinas the te phirel andro Duchos.
26Te na amenge džal pal oda, hoj amen o manuša te lašaren; te na pes jekh avres provokinas; te na zavidzinas jekh avreske.
