Kalatia 5

1

2

3

4

5

6

¹Iwe, sia ngasala, pun Kraist a angasakich. Iei mine oupwe üppos usun aramas mi ngas, ousap chüen atolongasefälikemi lon tettelin amanau.

²Oupwe aüseling! Ngang Paulus üpwe ürenikemi, pwe are oupwe mwütätä pwe oupwe sirkomsais, wewen chök nge a fokun lomotongau mine Kraist a föri fän itemi.

³Üpwe asilesefäli ngenikemi, pwe ika eman mwän epwe tipeeu ngeni an epwe sirkomsais, ätewe epwe fokun aleasochisi ekewe Allük meinisin.

⁴Iwe, chokewe me leimi mi sotuni ar repwe küna pwüng me ren Kot ren ar aleasochisi ekewe Allük, ra püsin aimwürela seni Kraist. Iwe, ir ra nonom lükün än Kot ümöümöch.

⁵Nge kich sia apilükülükü pwe Kot epwe föri pwe sipwe küna pwüng me ren. Iei met sia witiwiti ren ewe manamanen Ngünün Kot mi angang loch ren ach lükülük.

⁶Pun lupwen sia fen nonom lon Kraist Jesus, esap chüen wor lomoten ach sipwe sirkomsais ika sisap sirkomsais, nge met chök a aüchea, iei ach lükü Jesus mi pwä lon ach echeni aramas.

⁷Oua fokun fefeitä lon ämi lükü Kraist! Iö a aükätiu ämi aleasochisi mine a let? Ifa usun an pesekemi?

⁸Ei sokun pesepes esap pop seni Kot, ewe mi körikemi.

⁹Mi wor eu mwiitun a apasa, “Ekis chök iis a apwotä unusen ewe pilawa.”

¹⁰Nge ngang üa chüen apilükülükükemi. Ach eufengen me ach Samol a eselipato ai apilükülük, pwe ämi oupwe tipeeu ngeniei lon ai ekiek. Nge Kot epwe apwüngü ätewe mi atolongakemi lon fitikoko, ese lifilifil ika i iö.

¹¹Ämi pwii kana, are üpwe chüen afalafal pwe aramas repwe sirkomsais, pwota chök üpwe chüen küna riaföü? Ika epwe pwüng ei, mürin ai afalafal usun ewe iräpengesin Kraist esap eselipato osukosuk.

¹²Üa äneän pwe amwo chokewe mi afitikokokemi repwe chök sopwela ar föför o püsin pöküela och kinikinin inisiir.

¹³Nge ämi pwii kana, Kot a körikemi pwe oupwe ngas. Nge pokiten oua ngas, ousap ekieki pwe oua tongeni mwüt ngeni mochenian fitukemi epwe chüen nemenikemi, nge oupwe angangfengen lefilemi fän tong.

¹⁴Pun ekewe Allük meinisin ra unusolong lon ewe eu chök allük, “Kopwe echeni chon arum usun püsin om echenuk.”

¹⁵Nge are oua usun manmwacho ren ämi küfengenikemi o ocheifengenikemi, oupwe tümwünükemi pwe ousap arosafengenikemi.

¹⁶Iei wewen mine üa mochen apasa: Oupwe tipeni pwe ewe Ngünmifel epwe emwenikemi, mürin ousap apwönüetä mochenian fitukemi.

¹⁷Pun mochenin fitukach a ü ngeni mine Ngünmifel a mochen, iwe, mine Ngünmifel a mochen a ü ngeni mochenin fitukach. Ekei ruu mochen ra üküfengen, wewen pwe ousap tongeni föri met oua mochen föri.

¹⁸Nge are Ngünmifel a emwenikemi, mürin ousap nonom fän nemenien ekewe Allük.

¹⁹Iwe, a pwä ekewe angangen fituk: Lisowu, limengau, mocheisou,

²⁰fel ngeni anümwäl, angangen rong, oputfengen me fiufengen, koumfengen, song, apangau, tipefesen, mwichaiei,

²¹lolowo, ünüpuch, mongömong me sokun föför mi wewe ngeni ekei. Üpwe apasasefäli ngenikemi iei, met üa fen ürenikemi me mwan: chokewe mi föri ekei sokun föför resap tongeni mwüni Mwün Kot.

²²Nge iei ekewe uän Ngün: chen, pwapwa, kinamwe, mosonotam, kirikiröch, aramasöch, allükülük,

²³tipetekison me tipepwora. Esap wor och allük a ü ngeni ekei sokun föför.

²⁴Iwe, chokewe ir nöün Kraist Jesus ra iräpengesi mochenian fituker me sokun ar mocheniangau me mochenian leluker.

²⁵Ewe Ngünmifel a fang ngenikich manau, i epwe pwal fokun nemeni manauach.

²⁶Sisap lamalamtekia ika akuffengenikich ika lolowofengen lefilach.