Jon 3

1

2

3

4

5

6

7

8

9

10

11

12

13

14

15

16

17

18

19

20

21

¹Ono Juda agena ilo oso ijan Nikodimas bilen. Uqa Farisi am eundec oso.

²Dana eu witic osona uqa Jisasca humei madon, “O Meca, hina kobolkobol odogona eu oso odocwe qee, euqa oso Anut uqaca bilecebfi eu odocnu ihoc. Eunu hina iwalgec dana Anut sulheceb hom eu ege doqona,” don.

³Odocob Jisas uqa jejeg hewi madon, “Ija je mele mahigina, oso uqa haun qee basudecebfi uqa Anutna cul qee feiaun,” don.

⁴Odocob Nikodimas sisildon, “Dana ben mi hedocob eu adi haun basudigian? Uqa anag waug dunuh leceb haun basudecwe qee!” don.

⁵Odocob Jisas jejeg hewi madon, “Ija je mele mahigina, oso uqa wanaca kisnaca qee basudecebfi uqa Anutna cul dunuh lecwe qee.

⁶Oso dana cajaca gug tatawi basecebil cali hona eu dana deweg cebac ona. Oso Kis baseceb cali hona eu kis cebac ona.

⁷Ija age cunug haun basadecnu ec mahiga eunu cain tumatumaagaun.

⁸Fufu uqa ana isec nuigiannu gale dona eu odi nuina. Hina uqa fulufulueceb tebandogona qa anadec hona, ana nuina hina qee dogona. Dana cunug age kis basadeceb cali hogina euha odi bahic,” don.

⁹Odocob Nikodimas sisildon, “Ceteh i mataga eu adi cali hugian?” don.

¹⁰Odocob Jisas jejeg hewi madon, “Hina Isrel agena iwaladec osoqa, hina eu qee dogona, eu adi?

¹¹Ija je mele mahigina, ege doqona eunu maadoqona, ege fom eunu qasali maadoqona, euqa egena qasali maadec docnu culegina.

¹²Ija ceteh mahanadecnu maadecemin wawaga mele qee el. Ija ceteh saonadecnu maadeceminfi adi wawaga meleigian?

¹³Oso sao jobonna qee ti calel. Dana Melah himec uqa sao jobonnadec toni nen,” don.

¹⁴“Anut uqa Melah mahana dana agena silailnu gesiladigiannu suldocob qee nel qa mahana dana cahahaadeceb demico biluqagannu suldocob nen. Odocob Anut uqa dana cunug mahana bilegina nalunuga mimei cunug age uqanu wawaga meleigian eu age qee fadalowain qa age cebac bilec catanec eu oqagannu uqa melah osol himec culiaden. Eunu Moses uqa wadauna man sononec ihicon qoc suli u caqusenwe dana cunug age uqanu wawaga meleena eundec age cebac bilec catanec eu oqagannu Dana Melah age odi suli u caqusuqagan,” don.

¹⁸“Oso uqa Melahnu waug meleena eu uqa gesildoc qee gulucdoiaun. Euqa oso uqa waug qee meleena uqa Anut Melah osol ijannu waug qee meleelnu eu uqa wele gesildoc oc bilina.

¹⁹Gesiladecnu silig i edi. Fulacdoc mahana wele nen. Dana ageqa age cunug me qee odogina eu age fulacdoc sagagdogina. Odimeig age egena odoc camasac meiaun imeig fulacdocna qee hogina. Eunu agena odoc me qee nijianu fulacdoc eu cewudimeig tuna bilec gawegina.

²¹Osoqa uqa mele kobol odona eu fulacdocna hona. Eunu Anut cesuldocob uqa Anutna kobol toodu odona eu dana age camasac foqagan,” don.

²²Saen eu hedocob Jisas uqana malogom gami Judia hatuna belimeig bilein. Ono bibili Jisas dana wa joaden.

²³Jon uqaha Ainon jobonna wa mati bahic nijeinnu ono dana wa jojoaadi bilen. Ainon eu Salim jobon ono isec nijen. Dana cajaca uqaca liliein, uqa wa jojoaadien. (

²⁴Saen euna Jon gihacdoc jona qee mudec bibilen.)

²⁵Saen euna Jonna malogom age Juda dana osoca age Juda agena kobolnu age dewenega gegehin mecdainnu wa joc oloig eunu togodudu fee dadanein.

²⁶Odimeig age Jonca humeig madoin, “Meca, dana uqa wele, hina Jodan wa gesacna ono isec bibilegan, hinaca hon, hina uqanu je qasali magem eu uqadodoc dana wa joadena. Odocob dana cajaca cunug age uqaca legina!” doin.

²⁷Odocob Jon jejenega hewi maaden, “Anut uqa sao jobon bilia uqa dana oso ceteh oso qee utecebfi dana eu ocwe qee.

²⁸Ija wele maadem, ija Anutna Krais qee. Anut sulteceb ija uqana aqunitoc hom eu agedodoc ijanu qasali mamadegin doin.

²⁹Dana oso uqa caja ocob dana eu uqa caja eu gemug. Dana caja ona eu uqana danah eu tatawi caja gemug je madeceb dah mimei waug ceel bahic ena. Eunu ijaha qila ijana ceeli bilec ihoc lena.

³⁰Uqa ijan eu meca caligian. Odocob ija ijani eu mahana tonigian,” aden.

³¹Dana ohisdec nen uqa dana cunug wooladec ohis bilina. Oso mahanadec hon eu mahanadec dana, uqa ceteh mahana nijia eunu je madena. Euqa oso sao jobonnadec nen uqa dana cunug wooladec ohis bilina.

³²Uqa wele fifi dudu en eunu je qasali maadena euqa dana cajaca cunug age uqana qasali maadec culegina.

³³Dana eu Anut suldocob nen eu uqa Anutna je madena. Ge, Anut uqana Kis eu ihoc lec utina. Eunu oso uqa ohisdec uqana qasali maadec dah mimei gagadicca hewena eu uqa je sisi mec odi madena, “Anut uqa mele bahic,” ena.

³⁵Memige Anut uqa Melahnu nalug mena, uqana ceteteh cunug uqa ebenna muden nijia.

³⁶Oso uqa Anut Melahnu waug meleena eu uqa cebac bilec catanec eu wele on. Oso uqa Anut Melah je madena eu toodu qee odona eu cebac bilec catanec qee feiaun qa Anutna gemag bec eu uqa deweg fagdona.