Isaiah 59

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Kunubewu ngudda ngurriyime yimankek Yawey nakka minj kundulkarre kakarrme dja minj ngunngehke. Dja mak wardi ngurriyime yimankek nungka bengwarr dja minj ngunbekkan kore ngurrikayhme bu ngurridjare ngunbidyikarrme.

²Burrkyak. Nungka ngunbekkan dja minj ngunwokmarrkmang, dja njalekenh? Kuhni kayime ngudberre kunwarrekenh. Ngudda ngurrikurduyimi kunwarre, dja kuhni wanjh ngurrikurrmerrinj djarreh kore God kahdi. Ngudda ngurrikurduyimi kunwarre dja kuhni wanjh ngurrimarnbom nungka ngunmarnekebborledkerrinj.

³Ngudda wanjh kunkurlba ngurribiddjuhkerrinj. Ngurriwernhwowarreworrinj. Ngudda wanjh ngurrikurrehkurrinj dja mak ngudda manmolk ngurriyolyolmi kunwarrekenh.

⁴Minj nangale bininj ngudberre kadjare ngurridjadmerren bu djal mandjadkenh. Minj nangale bininj kayolyolmerren kunwoybuk dorrengh. Ngudda ngurriwern ngurridjalyolyolmerren bu djal burudjangkenh, dja minj kunwoybuk ngurrimulewarren. Ngudda wanjh ngurridjare kunyid ngurrimarnbun dja mak ngurridjare ngurrikurduyime kunwarre.

⁵Ngudda yiman kayime nayin nabang nawu kawirlarrkngukden. Bininj nawu kangun mahni wirlarrk wanjh karrowen. Bu mahni wirlarrk kabakme, wanjh nayin yaw kambebme. Ngudda yimankek kardab nawu kamarnmarnbun red ngarre.

⁶Dja kunyarl ngarre kardab minj kamak bu bininj kamarnbun kunmadj. Ngudda yimankek ngurridjongburren kunwarrewi, dja minj kuhni ngurriwarlkkarren! Burrkyak. Kuhni rowk ngurriyime wanjh kunwarre duninjh, dja ngurridjare ngurriburren kundowikenh dorrengh.

⁷Ngudda wanjh ngurriburrirlobmen kore ngurrikurduyime kunwarre, dja ngurrbenkurlbawon binihbininj. Ngudda ngurriburrbun kore djal kunwarrekenh munguyh. Bu baleh yarrka ngurrire, wanjh ngurribolkwarrewon.

⁸Ngudda minj ngurriburrbun kunmodmikenh, dja mak minj ngurrire kore mandjadkenh. Ngurribolhwarrewon manbolh ba kabolhmarnburren kabarlibarli, dja bininj nawu kabirrire kumekbe wanjh kabolkmayahme dja kunmodmikenh yak.

⁹Yawey nuye bininj kabirriyime, “Bolkkime ngarriburrbun bu God minj kanngehke, dja birriwarre bininj ngandidjalbun. Minj ngarrinan ngudda kanmarnekurduyime mandjad kore ngudda ke kunmak. Ngarriyawan kore ngudda kanmarnebolkwolkan, dja larrk, kadjalbolkkumun kore ngad. Ngarridjalle kore kukak, dja ngudda minj kanmarnebolkwolkan.

¹⁰Ngad ngarriyimerranj yiman ngarrimimbunje bininj. Ngarridjalbidwayhme ba bu ngarrire yeleyeledj. Bu ngarrire kunbarnangarraburrk, bonj, minj ngarriwernhbolknan dja ngarridjalmankan. Ngad yiman ngarringudjyak bininj, dja minj ngarrikarrme kunngudj.

¹¹Ngarridjalkele dja mak ngarrikangewarreun. Ngad ngarriyawayawan kunmak, dja bonj, ngudda minj kanbidyikarrme kore kunyid kawernmerren ngadberre, dja minj mak kanngehke.

¹²O Yawey, ngarriwarnyakmulewarren bolkkime. Ngarrikurduyimi kunwarre kunwern kore ngudda kankurdunang, dja kunmekbekenh ngudda kanwarrewan. Ngad munguyh ngarridjalburrbun ngadberre kunwarre, dja ngarriyimerren bu woybukkih, ngarridjalbakkeng ke mankarre.

¹³O Yawey, ngad wanjh ngundikoweng dja ngarridjalwokburriwerng ngudda ke mankarre rowk. Ngundibodmewong ngudda nawu God ngadberre. Ngad wanjh ngarrikurrehkurren munguyh, dja mak ngarrbenmarnburren bu ngarribakkabakke ke mankarre rowk.

¹⁴Kunmekbekenh minj ngarrikarrme kunmak dja minj ngudda kanngehke dja kanbebke kore kunwarrekenh. Minj ngad ngarriyolyolme kunwoybukkenh, dja ngarridjalkurren munguyh.

^15aNgad minj ngarriyawan kunwoybuk, dja ngarridjalwirrihme bininj nawu kawarnyak kunwarre kayime.

^15bNawu Yawey benwohnang dja nang bedberre kunwarre bu minj birriyimi djal kunmakkenh. Wanjh nungka yidduy.

¹⁶Nungka wanjh kangebarrhmeng bu minj nangale bininj kabenbidyikarrme nawu birrimarladj dja nawu birringudjwarre bininj. Wanjh nungan kumwam dja benbidyikarrmeng. Nungka benngehkeng kunngudj dja mak kunmak nuye dorrengh.

¹⁷Kuhni wanjh yiman berrekalkdjongburrinj kunmakkenh nuye, dja mak yiman kodjdjongburrinj kahngehkekenh. Dja mak nungka djaldjareminj benngehkeyi bininj nuye dja kabendung bininj nawu bindiwarrewong bedberre. Nungka wernhdjareminj bu kayimerran kamak rowk, dja kuhni yiman kayime djongbuyindi nawu madjkudying nuye.

¹⁸Nawu Yawey kabenbun bininj rowk nawu kabirriwirrihme dja kabirrikurduyime kunwarre. Kabenbun birriwarlahkenh rowk birrimekbe bininj kore kubolkbubuyika warridj.

¹⁹Kunmekbenh wanjh birriwern bininj kabirrikelemen nawu Yawey, yiman bininj nawu kabirrihni djarreh kore karrikad, dja mak kore koyek. Bedda wanjh kabirringeykelemen nuye dja mak kabirriburlume nuye kundulkarre. Wanjh nungka kamre yiman kayime kundjurrhkimuk bu nungka kabuhme dja kaboburriwe.

²⁰Wanjh nawu Yawey kayime, “Ngaye nawu ngehke ngudberre ngamre kore kunredkimuk Zion. Ngudda nawu mawahmawah nuye Jacob, bu ngurriwarnyakmulewarren kore kunwarre ngudberre, wanjh ngaye ngamre ngehke.

²¹Mak ngaye Yawey marneyime bu ngawokkurrmerren ngudberre. Ngaye ngakurrmeng Namalngmakkaykenh ngardduk ngudberre, dja ngakurrmeng ngardduk kunwok kore kurrang ngudberre, dja kore kurrang bedberre wurdwurd ngudberre. Bolkkime ngurrikarrme ngardduk kunwok, dja kaluk yerrekah nawu ngurrbenkebmawahme, wanjh bedda kabirridjalkarrme warridj, dja munguyh munguyh kahdi kunwok ngardduk.” Kuhni rowk yimeng nawu Yawey.