1Hinokara lopu papaka sisigiti sa Limana e Zihova pude harupu gamu, meke lopu nuli sa Taliṉana pude avoso gamu pana titioko hata tinokae si gamu.
2Ba sari na mia tinavete kaleadi si va paqaha gamu koasa mia Tamasa; koa gua koari na mia sinea si tomea Sa sa Isumatana Sa koa gamu, ke korona avoso gamu Sa.
3Ura sari na limamia si napiti i na ehara, sari kakarutu limamia si koa i na sinea. Sari berumia si tozi koha, meke sari meamia si zama va kaleana.
4Loke tie si hata ia sa tinoṉoto pa vinaripitui; loke tie si vivinei ni sari nana ginugua pa hinokara. Kalavarae si arini pa vinari tokei aledi meke pa koha; hata tinasuna si arini meke va podopodoe kinaleana.
5Na vovoto noki variva mate si poraki rini meke na aba tana kaqa si tigisia rini. Asa pu henai sari vovoto arini si kote mate mo, meke pana poraka si keke vovoto si na noki variva matena mo si kote vura.
6Sari dia aba si lopu leana pude tavete ni poko; lopu boka nobi ni rini sapu taveti rini. Sari dia tinavete si na tinavete kaleadi, meke na ṉinovaṉovala koari na tie mo si koa pa limadia.
7Sari nenedia si edi hiva haqala la pa sinea; tuturei hola pude va mate tie sapu loke dia sinea. Sari dia binalabala si na binalabala kaleadi mo; na huhuara mo sa dia hahanana.
8Sa siraṉa tana binule si lopu tumae nia rini; sa vinilasa va toṉoto si lopu koa pa vasina enea rini. Na ele va koqi i rini sari na siraṉa; ke loke tie pu ene vasina kote tumae nia sa binule.
9Sa vinilasa va toṉoto si seu hola koa gita, ke sa tinoṉoto si lopu kamo mae koa gita. Doṉo hata kalalasa si gita ba sa hinuporo mo si koa doduru vasina; hata galegalearane bakaladi, ba pa opoadumu mo si ene gita.
10Gua ari tie behudi sapu ene zazapa luli gobagoba, si tapotapoe si gita guana tie loke matadi. Pa korapa rane toa si tubarae ni gita guana pa hupohuporona tu; be koa koari na tie ṉiṉiradi, ba guana tie mateda si gita.
11Gita doduru si kurumu gua tugo na bea; talotaṉa meke kunikunisi kumana guana kukuva. Hata vinilasa va toṉoto si gita, ba lopu boka dogoro vagi; pude ta rupaha pa tinasuna gua, ba seu hola sapu asa.
12Ura sari mami tinavete kaleadi si soku hola pa kenumu Agoi, meke va sosode puleni gami koari mami sinea. Sari mami tinavete kaleadi si koa hola turaṉi mo gami, meke gilani gami sari mami sinea:
13va karikari meke va qoraqora la koe Zihova, va mudia gami sa Tamasa, ṉoṉovala i gami sari tie meke kana ia gami sa Tamasa, zama ni gami sari kinokoha sapu podakadi pa bulo mami.
14Ke sa ṉinoṉo si rizu taloa meke sa tinoṉoto si turu va seu, sa hinokara si tubarae nia pa sisiraṉa, meke sa hinelahelae si lopu boka nuquru.
15Sa hinokara si lopu boka ta dogoro, meke arini pu kilua sa kinaleana si ta ṉoṉovala koari na tie meke ta hiko dia likakalae. Doṉo la se Zihova meke lopu qetu sina loketoṉa sa tinoṉoto.
16Dogoria Sa sapu loke tie si koa pude harupi saripu ta ṉoṉovaladi, ke ta lotaṉa si Asa. Ke sa limana mo Sa si la meke variharupi, meke Nana tinoṉoto mo na kopu nia si Asa.
17Va sage ia Sa sa tinoṉoto guana poko raqaraqa pa vinaripera, meke pa batuna si na toropae tana hinarupu; pokopoko ni Sa sari pinokopoko tinubehe meke hade pule nia si Asa koasa Nana inokoro ṉiṉirana pude va kilasi sari Nana kana.
18Luli gua sapu tavetia rini, asa tugo si kote tavete hobea Sa, na tinaṉaziri la koari Nana kana meke na vina kilasa koari tie va gugue; kote tubehe i Sa sari na nunusa gua sapu garodi.
19Koari pa lodu rimata, si kote matagutu nia ri tie sa Pozana e Zihova, meke pa kali gasa rimata, si kote pamaṉa nia rini sa Nana ṉiniraṉira. Ura kote mae si Asa guana naqe ṉiṉirana sapu sa siniṉo te Zihova mo va rizu ia.
20“Sa Hinarupu si kote mae gua pa Zaione, koari na tie te Zekopi pu kekere koari na dia sinea,”
21Zama pule si Asa, “Ba sapu Arau, hie sa Qua vinariva egoi koa rini. Sa Maqomaqoqu, sapu koa koa gamu, meke sari Qua zinama sapu ele vekoi Rau pa ṉuzu mia si lopu kaqu vura taloa pa ṉuzumia babe pa ṉuzudi ri mia koburu, ba be pa ṉuzudi ri na tuti dia podalae kamahire meke kamoa na kamoa,” zama gua se Zihova.
