1Gore, mamu habotu pa kavuru, agoi Babiloni pu guana vineki vaqura; habotu pa pepeso koa sa vasina sapu lopu koa ia na habotuana baṉara, agoi tuna vineki ari pa Babiloni. Lopu kote ta pozae pule na vineki vaqura leleamu si goi.
2Vagi sari karua patu munamunalana palava; va gorea sa mua poko paere isumata. Daku sage nia sa mua poko, va dodoho ia sa nenemu mamu ene karovi sari na tototolo.
3Kaqu dogoria ri tie sapu dodohomu si goi; meke sa kinurekure tamugoi si kaqu tava vura. Kaqu hobequ si Rau; lopu keke tie si kote va hola ia Rau.”
4Sa nada Hinarupu, se Zihova Tadi na Qeto Minate, asa sa pozana Sa, Asa mo pu Hopena pa Izireli.
5Zama pule si Asa, “Habotu mamu lopu kulu, nuquru la koasa vasina hupohuporona, agoi sapu guana vineki vaqura tadi na tinoni pa Babiloni; beto, lopu kote ta pozae pule na kalaho tadi na binaṉara si goi.
6Na bugoro ni Rau sari Qua tinoni, ke kilua Rau sa Qua tinago; vatu ni Arau si arini pa limamu, ba lopu hite va dogoroni tataru goi. Koari na barogoso na kaleqe ba va hake ni pinaleke mamatadi goi.
7Zama si goi, ‘Arau si kote na kalaho lamo, kamoa na kamoa.’ Ba lopu hite rove vagi goi sari ginugua hire babe balabala ia sapu sa beka si kote ta evaṉa.
8Ego kamahire, va avoso mae, agoi pu okoro nia sa kinokoa qetuqetu tana kasia popoa, koa va leana meke loketoṉa matagutu nia meke zama eke telemu. ‘Arau mo si asa, loke tie pule si kekeṉoṉo gua arau. Lopu kaqu na naboko si rau babe talotaṉa nia sa matedi ri na koburu.’
9Karua beto hire kote kamo atu koa goi, pa vasi totoso hite mo, pa keke rane mo; sapu lopu koa sari mua koburu meke sapu kote naboko si goi. Uve, kote kamo va leana atu si arini koa goi, be vea soku gua sari mua tie sabusabukae meke vea soku gua sari na mua lineveleve.
10Agoi si ele raṉei sari mua hahanana kaleadi meke zama, ‘Loke tie na dogoro au,’ gua. Sari mua ginilagilana na tinumatumae na turaṉa va sea igo totoso zama eke gua hie si goi telemu, ‘Arau mo si asa, meke loke tie pule si kekeṉoṉo gua arau.’
11Na tinasuna si kaqu raza koa goi, meke lopu kaqu tumae nia goi vegua meke kote kasi pania mua potana si asa. Na tinahuara si kote hoqa kamo atu koa goi sapu lopu kote boka tabaria goi meke va hola ia. Na tinasuna sapu lopu boka dogoro va kenue ia goi si kote kamo va hodaka koa goi.
12Mamu nono latu, pude gua, koari mua potana meke sari soku mua tie sabusabukae, sari pu voriti taveti goi seunae gua tu kobukoburumu. Gina kote bokaboka mua, gina kote boka va mataguti goi si kaiqa tie.
13Sari doduru vinari tokae pa binalabala va mabomu si goi! Va mae i sari mua tie viliti pinopino, saripu tiro pinopino, pu boka tozia sa si kote ta evaṉa pa hopeke sidara, vekoi madi harupu igo koari ginugua pu kote kamo atu koa goi.
14Hinokara guana duduli popadi si arini; sapu kote sulu pani na nika. Na lopu kote boka harupu pule ni koasa ṉiniraṉira tanisa nika. Sa nika sapu loke patu lerana pude maliha sari tie; vasina loke nika pude habotu kapae ia.
15Asa mo sa tinokae boka tavete poni igo rini, sarini pu ele tavetavete turaṉi agoi meke hata tinokae si goi koarini seunae gua tu kobukoburumu. Kote hopeke ene nono la si arini pa dia tinavete seadi; meke lopu keke arini kote harupu igo.”
