Jesaja 11:2-15

²Wofuŋte Mârozi ere faio fohuc juocmu, maŋɋârâŋ mâro â maŋfânâŋ mâro, mumutâc mâro â tâpiri mâro, mamana mâro â Wofuŋ araŋ bapa mâro.

³E Wofuŋ araŋ babacnere aŋac bajuocmu. E ʒâŋezi sawa honehuc dâŋ mi mutaraocmu, me hazeczi sawa manahuc sâcne mi musanaŋkeocmu;

⁴e hapetac jaŋe tiŋne jujure sâcko dâŋ mutara‐jareocmu, â mâreŋko maŋhuhuŋ juŋgopieŋ dâŋjeŋic sâckoa dopeckeocmu, e micticnere gunuzi mâreŋ qaocmu, â micbipic‐ticnere rombâŋzi sindaŋŋic qâhâmoocmu.

⁵Tiŋne jujuzi ombâŋ ŋaqi‐ticne eocmu, â erâ‐eesanaŋzi becsahac‐ticne eocmu.

⁶Eme kâte qâto e lama motecnehec jojowac junicmu, â qowi mimicne lepad, e noniŋ motecnehec fofo wirec fonicmu. Bulimakao motecne â kâcɋene wokemaŋhec jahe laioŋhec ââgo eniŋmu, ehame motec ɋienezi hone soŋaŋ ejareocmu.

⁷Bulimakao â qowi mimicne bea jaŋe qâqâtec juhuc nânâ nâniŋmu; â motecfâc‐jeŋic jaŋe mâmâc ŋec foc eniŋmu; laioŋzi ine bulimakao iŋucne kecɋaŋ nâocmu.

⁸Motec susuoneczi qotâ e jâchawecko foha masirickeocmu, â motec gegecnezi sopâc homa usuraŋkeocmu.

⁹Tiri tiki mâreŋ‐nane ŋifec â ŋifec, ira bâbâʒâic â sisipiric moc mi fuaocmu; Wofuŋte fuŋne mamanazi mâreŋ fusucmaocmu, hâweczi ʒâkâŋ‐ticne bârârâŋne‐fâreekac irec sâc.

¹⁰Dameŋ ira Isai gitecnezi qâpuc ŋicguru ma doma‐jareocmu, ma i bâfuaniŋte ŋicne ŋicne babasa gie baniŋmu, â fic hae‐ticne eri tatamacnehec ŋeocmu.

¹¹Dameŋ ira Wofuŋzi meticne harierâ sicneme arec 2 eocmu, ehuc ŋicfâc‐ticne tiwâne juraŋgopieŋ bârisiec‐jopaocmu; Asiriaonec, Aigitaonec, Patarosionec, Etiopianec, Elamkonec, Sinaonec, Hamationec â Hâwec mâreŋkonec nusec‐jopaocmu.

¹²E qâpuc ŋicguru ma âkendâŋne‐jareocmu â Israe guruonec tuŋjopakicne qâzuc‐jopaocmu; ehuc mâreŋ qaŋeŋne 4 irecnec Judaŋic bâtâtiec‐jopakicne jaŋe qânusuc‐jopaocmu.

¹³Eme Eferaimzi Juda iiŋguuŋ ecneekac i omaeocmu, â Juda qaisockeeŋgopieŋ jaŋe siroweniŋmu. Eferaimzi Juda iiŋguuŋ mi ecneocmu â Judazi Eferaim mi qaisockeocmu.

¹⁴Jahe hâweckopec Filisa ŋic tiki‐jeŋicko ʒocnehec fenicmu, erâ ʒoaŋ wewefuopec ŋic fisi‐jarerâ mafa‐jeŋic jowac ronicmu. Erâ Edom â Moabi ŋicguru rauc‐jopanicmu, ehame Amoŋŋic jaŋe micjekic reŋkeniŋmu.

¹⁵Eme Wofuŋzi Aigita mâreŋte hâwec raʒikicne i mume omae‐fâreocmu, erâ meticne Eufrata opâopec sicnehuc micrombâŋ fâronezi ficneme tâtiehuc opâ piticne 7 fuame ŋiczi fotâcnepie kike‐jeŋic mi bânâŋkeocmu.