1Kuhni kayime Yawey, “Kore kaddum heaven, nakka kore ngaye ngahni yiman kayime throne ngardduk. Dja kore kurorre, wanjh nakka yiman kayime ngadengebarndi. Dja ngudda yimankek ngurrimarnbun kurrambalk ngardduk? Kaluk baleh kururrkyime kore ngangehme?
2Ngayebidju ngabolkmarnbom njalehnjale rowk kaddum dja kurorre. Kunmekbekenh yehyeng rowk marnbuyindanginj.” Kuhni nawu Yawey yimeng. “Dja bininj nawu ngaye ngaburlume, nakka wanjh minj kaburlumerren, minj mak kakimukworren, dja nganmarnekele bu nganwokmarrkmang.
3Dja birribuyika bininj ngandinjilngwarrewon. Bu birrimekbe bininj ngandimarnebun bulikki, wanjh ngaye ngayime bedda yiman namarndeyi! Dja bu ngandiwon lamb ngardduk, wanjh ngayime bedda yiman duruk kabirirbun! Dja bu ngandiwon ngaye manmim manbu wheat, wanjh ngayime ngandiwoyi kunkurlba nuye bikkibikki! Dja bu ngandimarnekinje manmanjmak ngardduk, wanjh ngaye ngayime bedda yiman kabirrimarneboddan idol. Kaluk birrimekbe bininj birrikebrokmarnburrinj kore birridjaldjareni. Kabirridjare kunwarrewarre duninjh kore kunmalng bedberre.
4Wanjh kunmekbekenh ngaye ngadjare ngabenwirrihme dja ngabenbun bedberre. Ngaye ngabenmarnekurduyime kore kabirridjalkele. Kaluk ngaye ngabenkayhmeng, dja minj nangale ngawokmarrmayi. Mak ngaye ngawokdi bedberre, dja minj nangale nganbekkayi. Bedda birridjalkurduyimi kunwarre kore kumirrk ngardduk, dja birridjaldjareni kore ngandinjilngwarrewong.
5Mah, ngudda nawu kandiwokmarrkmang dja ngandimarnekuydelelme, wanjh kandiwokbekka ngaye nawu Yawey. Ngayime ngudberre, ‘Nawu ngurridangerrinj ngundiwirrihme bu ngardduk kunngeykenh, dja ngundidjalbebke. Dja mak ngundidjekmiwong bu birriyimi, “Mah! Ngarridjare ngarrinan Yawey bu nadjalmak duninjh, dja ngudda bu ngurrinjilngmak!” Bonj, bedda wanjh kaluk kabirriyemengarlmen.
6Adju, ngurrbenbekkabekkan nawu kabirrikayhme kore kururrkmirrnderri dja kore Temple kunrurrk. Njalekenh? A, nakka Yawey kabenbun nawu birriyidko nuye kore kunwarrekenh bedberre.
7Mah, wanjh ngurriburrbu. Daluk ngalbu kamerlem, bu kayawmang, wanjh werrk kababang, kaluk yerre wanjh karrangen nawu nabarrken. Yuwn bu kadjalyawmang werrk, dja minj kabekkarren.
8Minj nangale bolkwobekkayi bu kurduyimerrangimeninj. Dja minj nangale nayi. Yiddok bininj birrimirndewernmerrinj kore kubolkkimuk kore djal kunbarnangarrakudji? Burrkyak. Minj kayimerran bu kundjalburrikudji. Dja kunbuyika duninjh, bu kunbolk Zion, wanjh werrkwerrk duninjh kabenyawmang ngalengngarre wurdwurd!
9Ngaye nawu Yawey ngakan daluk bu kayingkihmarnburren wurdyawkenh, dja wanjh minj ngabawon, ngadjalmarnbun bu kayawmang. Bu ngayingkihmarnbun daluk, yiddok ngaye ngabalhme ngalengngarre kunwarlirl? Burrkyak.
10Mah! Wanjh ngurrimarnemarrmarr ngalengngarre kukadje Jerusalem, dja ngurrimarnenjilngmaknin, ngudda nawu ngurrimarnedjare. Ngudda nawu ngurrimarnenalkbuni, wanjh bolkkime ngurriwernhmarrmarr ngalengngarre!
11Kaluk ngudda yiman ngurribongun kore kundjikka ngalengngarre dja ngurrinjilngmakmen. Ngurridjalbongun kunkimuk, dja ngurrimarnemarrmarr ngaleng nawu ngunwon kundjalkimuk.
12Kuhni mak ngayime ngudberre, ngaye nawu Yawey. Ngaye ngawon Jerusalem ngardduk kunmodmikenh manbu kare yiman kayime mankabo. Ngaye mak ngawon namakmak nadjalwern duninjh kore kubolkbubuyikabeh, yiman kayime mankabo mankimuk bu kaborlobme. Ngaleng ngunkanahkan kore kuberl ngarre, ngudda ngurribongun kore kundjikka ngarre, ngudda ngurriyerrkang yiman wurdyaw kore kunkarre ngarre.
13Ngaye wanjh njilngmarnbun ngudberre yiman kayime ngalbadjan kabinahnan wurdyaw ngarre. Dja ngurrikangemakmen ngudda bu ngurrinjilngwarreni Jerusalemkenh.
14Bu kuhni ngurrinan kakurduyimerran, wanjh ngurrikangemarrmarr, dja ngurriwernhmakmen yiman kayime kundalk bu kadjaldjordme. Ngaye nawu Yawey wanjh marnebidbukkarrinj ngudda nawu kandimarnedurrkmirri. Dja nawu birriyidko ngardduk, wanjh ngabendjaldung kunkimuk.”
15Ngurrina! Yawey kamre kunak dorrengh. Nuye wirlbarra warridj kamre yiman kayime kunmayorrk kunkimuk. Nungka wanjh kayiddung wernkih duninjh, dja kabendung manbirluworldjen dorrengh!
16Kaluk ngaye Yawey ngabendjadme birriwarlahkenh bininj kunak dja kundjawak dorrengh. Ngaye ngabenbun birriwern.
17Bininj nawu kabirrikukdjamunworren bu kunwarrekenh, dja bu kabirridjirridjburren kore kabirrimarneboddan idol, wanjh kunwarre kabirriyime. Bedda nawu kabirridjarrkre kore kurralk ba kabirrikanjngun bikkibik dja rat, dja nabubuyika nawarrewarre mayh. Nangale kabirrimunkekadjung? Wanjh bedda kabirridjarrkyakmen! Kuhni ngaye ngayime nawu Yawey.
18Bu kunmekbe kunwarre kabirrikurduyime kore kabirrimayaliburrbun, wanjh ngaye ngayingkihmarnburren bu ngamre ba ngabenmirndemornname birriwarlahkenh birrimak bininj rowk, kore kubolbubuyikbeh, dja nawu kabirridjenbubuyika. Wanjh kabirrimirnderri dja ngaye ngardduk kunmakmak ngandinan.
19Mak ngaye ngakurrme yiman kayime bim ngardduk kore bedda. Yikahwi ngaye ngabenmunkewe nawu kabirridjaldarrkid bininj ba kabirrire kore kubolkbubuyika, yiman Tarshish, Libya, Lydia kore bininj kabirrikurdumak bonarra dorrengh, Tubal dja mak Greece, dja warridj kore manyunkurr kunwern kore djarreh duninjh, kore bininj minj ngaye ngandiwobekkayi, dja minj ngandinayi ngardduk kunmakmak. Bininj nawu ngabenmunkewe wanjh ngandiyolyolme bu kabindibengdayhke ngayekenh bu ngadjalmakkaykenh.
20Dja mak kabindimkan nawu ngurridangerrinj rowk nawu birrikang kubolkbubuyikabeh, dja kabirrimre rowk kore ngardduk kundulum kunmakmak kore Jerusalem. Bedda wanjh kabirrimre bu kabirrimorneni djarrang dja nuk donkey, yikahwi mak kabirrimre wirlbara dorrengh, dja mule dja camel dorrengh kabirrimre. Kabirrimkan kore kunrurrk manbu Temple nuye Yawey, yiman kayime nawu Israel benkebmawahmeng kabirrimkan manmim manbu kahdahkendi kore ngalng nawu kukbele, bu kabirriwon Yawey.” Kuhni nawu Yawey yimeng, dja mak yimeng,
21“Dja mak ngabendjarrngbun yikahwi birrimekbe bininj ba kabirriyimerran priest dja mak yikahwi Levites.”
22Wanjh nawu Yawey kamulewarren, kayime, “Mak ngayawoyhbolkkerrngehme manbu kaddum dja kurorre, dja kadjaldi munguyh munguyh kore kumirrk ngardduk, wanjh kunmekbe rerrih karohrok manbu kunngey ngudberre kadjaldi. Dja mak nawu mawahmawah ngudberre kabirridjaldi munguyh.
23Birriwarlahkenh bininj rowk kabirrimre ngandimarneboddan kore kumirrk ngardduk bu kunbarnangarradjamun rowk, dja bu nakerrnge dird kore nakerrnge dird.
24Mak kabirribebme dja kabindikuknan nawu birridowerrinj birrimekbe nawu ngandidjalwokweyi ngardduk. Yolk wanjh kabennudngun nakka minj karrowerren, mak kunak makka minj kabirludowen. Wanjh birridjalwern bininj kabindiwirrihme bedberre.” Kuhni yimeng Yawey.
