1Alatala ito nan falaxi, a naxa, “Kore xɔnna nan n ma manga gbɛdɛn na, bɔxɔn yi findi n san tiden na. Ɛ nɔɛ banxin mundun tiyɛ n xa, n ma matabuden findɛ minɛn na?
2N tan nan seni itoe birin daxi, e yi lu na. Nayi, n na n yɛɛn tima muxun sifani ito nan na: tɔrɔ muxun naxan niin sɔxɔlɛxi, naxan xuruxurunma gaxuni n ma falan bun.” Alatalaa falan nan na ra.
3Naxan na ɲingen ba saraxan na na yatɛma nɛn alo muxu faxana, naxan na yɛxɛɛn ba saraxan na, na luxi nɛn alo a baren nan faxama, naxan na bogi se saraxan ba, na luxi nɛn alo a xɔsɛn wunla nan nalima n ma, naxan na wusulanna gan, na luxi nɛn alo a suxuren nan kima, na muxune birin biraxi e yɛtɛ kirane nan fɔxɔ ra, e haramu feene yi rafan e ma.
4N fan fe xɔdɛxɛn nan nagidima e ma. N na e gaxu feen nafama nɛn e ma, bayo n bata xinla ti, muxu yo mi a ratin, bayo n bata falan ti, muxu yo mi a tuli mati n na. Koni naxan naɲaxu n ma, e yi na liga, naxan yo mi rafan n ma, e yi na sugandi.
5Ɛ tuli mati Alatalaa falan na, ɛ tan naxanye xuruxurunma gaxuni a falan bun ma. A naxa, “Ɛ ngaxakedenne ito nan falaxi, ɛ raɲaxu naxanye ma, naxanye e mɛma ɛ ra n xinla fe ra, e naxa, ‘Alatala xa a binyen mayita, nxu yi ɛ sɛwan to!’ Koni e tan nan yagima.
6Sɔnxɔ xuiin minima nɛn taani! Gbelegbele xuiin yi mini Ala Batu Banxini! Alatala nan a yaxune saranma e kɛwanle ra.”
7“Benun a kuiin xa keli a ra, a bata diin xali, benun a xa diin barin xɔlɛn kolon, a bata a dii xɛmɛn bari!
8Nde bata na fe sifan mɛ singen? Nde bata na fe sifan to singen? Yamanan tiyɛ lɔxɔ kedenni ba? Siyana nde nɔɛ sɔtɛ lɔxɔ kedenni ba? Anu, Siyon taan luxi nɛn alo ɲaxalan fudikanna, a kuina a xɔlɔ fɔlɔxi nɛn tun, a yi a yamaan bari!”
9Alatala naxa, “N tan dii bari waxatin nafɛ ba, diin mi bari? Xa n tan nan diin barin nagidixi, n tondɛ na ma ba?” Ɛ Ala naxa na kiini.
10Ɛ ɲaxan Yerusalɛn kaane xɔn, a xa findi ɛ sɛwa xunna ra, a rafan ɛ tan naxanye birin ma! Ɛ ɲaxan Yerusalɛn kaane xɔn han, ɛ tan naxanye birin sunuxi a fe ra.
11Amasɔtɔ, a luma nɛn alo ɛ nga, ɛ yi a xiɲɛn min, a yi ɛ madɛndɛn. Ɛ lugoma nɛn, ɛ yi a fanna nun a binyen kolon.
12Bayo Alatala ito nan falaxi, a naxa, “N bɔɲɛ xunbenla rasigama Yerusalɛn ma nɛn alo baana, e nun siyane nafunla alo fufana. Ɛ xiɲɛn minma nɛn, ɛ yi banba, ɛ masugusugu xinbin fari,
13alo muxuna nga a madɛndɛnma kii naxan yi, n fan ɛ madɛndɛnma na kii nin. Ɛ madɛndɛnma nɛn Yerusalɛn taani.”
14Ɛ na toma nɛn, ɛ bɔɲɛn yi lu sɛwaxi, ɛ mɔn yi sabati alo sɛxɛna. Alatala a sɛnbɛn yitama nɛn a walikɛne ra, a yi a xɔlɔn yita a yaxune ra.
15Bayo Alatala fama tɛɛn nan na, a yɛngɛ so wontorone luxi alo wuluwunla, alogo a fitinaxin xa a xɔlɔn nakamali a kɔnkɔ xuiin yi rakamali tɛɛ dɛgɛ gbeen na.
16Alatala muxune birin makitima nɛn tɛɛn nun silanfanna ra. Alatala muxu faxaxine rawuyama ayi nɛn.
17Naxanye e yitɔnma, e yɛtɛ rasariɲan alogo e xa siga kide nakɔne yi, e biraxi e bode fɔxɔ ra, siga nakɔɔn tagini, e tan naxanye xɔsɛ subene nun sulumɛne nun haramu seene donma, ne birin halagima nɛn e bode xɔn. Alatalaa falan nan na ra.
18Ala naxa, “N na e kɛwanle nun e miriyane kolon. Siyane nun xuine birin malan waxatin bata a li. E fama nɛn, e yi n ma binyen to.
19N taxamasenna sama nɛn e tagi: yamaan muxu dɔnxɛn naxanye luxi e nii ra, n na ndee rasigama nɛn siyane ma, siga Tarasisi kaane nun Pulone ma e nun Ludu kaane, xali woli kɛndɛne. Ndee mɔn yi siga Tubali nun Girɛki yamanani e nun fɔxɔ ige tagi bɔxɔ makuyene, naxanye mi n xinla fe mɛxi, naxanye mi n ma binyen toxi, e yi n ma binyena fe fala siyane tagi.
20E fama nɛn ɛ ngaxakedenne birin na, keli siyane birin yi, e findi kiseene ra Alatala xa, e fa soone fari e nun wontorone nun wontoro xunna soxine kui e nun sofanle nun ɲɔgɔmɛne fari, fa n ma geya sariɲanxin fari Yerusalɛn yi. Alatala naxa na kiini. E fama e ra nɛn alo Isirayila kaane fama e bogi se saraxane ra Alatala Batu Banxini kii naxan yi goron sariɲanxine kui.
21N mɔn e tan ndee findima nɛn saraxaraline nun Lewi bɔnsɔnna muxune ra.” Alatala naxa na kiini.
22“Ɛ xinla nun ɛ yixɛtɛne luma nɛn n yɛtagi alo kore xɔri nɛnɛn nun bɔxɔ xɔri nɛnɛn luma n yɛtagi kii naxan yi, n fama naxanye dadeni.” Alatalaa falan nan na ra
23“Nayi, kike nɛnɛ yo kike nɛnɛ, Matabu Lɔxɔ yo Matabu Lɔxɔ, adamadiine birin fama nɛn, e fa e xinbi sin n bun ma.” Alatala naxa na kiini.
24“E na mini, e yi muxune binbine to, naxanye murutɛxi n xili ma. Kunla naxanye e donma, ne mi faxɛ mumɛ, tɛɛn naxan e ganma, na mi tuyɛ mumɛ! Adamadiine birin yi kabɛ e tɔrɔyaan ma.”
