Isaías 10:2-33

²Bemar, dule-wilemalad-ibmar-nikuega be imaksurmalad, an-dula-wilesagwa-gudimaladga be igar nudaksurmalad. Siamar-ei-sui-burgwisadi, be wiodimalad, dule-sergan-sated-ibe be ibmar atursadimalad.

³Bemar sabsur-odurdaklealile, ¿bemar igi imakoe? Boni-dummad bannaba-nosa begi-dani be dakalile, be-bendakega, ¿doase be goloe? ¿Bia be-ibmar-nuegan be odukumaloe?

⁴Ar be bar oakalogosurmalad. Ar bemar gales seledmaloed. Emar-gales-bukwad-abargi be mesagwar gumarmogoed. Sulile, burgwarmalad-imbagi be oburgwilemarmogoed. Weyob bemar imaklego-inigwele, Bab-Dummad-urwedi, amba bogigumaiosulid, Bab-Dummad amba amargi urwemaioed.

⁵Bab-Jehová weyob soged: “An bela-bela sae-itoged, Asiria-e-Rey anga sabsur-odurdaked-suaryobi guoed. A-suargine, an sabsur-dulemar-odurdakoed. An isdar-itogedbali, a-suar an ebugoed.

⁶Yala-nue-isgus-naidse an barmidoed, dulemar an-ourwega-imakbukwadse an barmidoed, adi, ibmar ei atursanaega, e-ibmar ei bela weenaegar. Igi-dule dii-dii napa-imake, deyob-emar-imaklegega an barmidoed.

⁷Ar Asiria-e-reydi deyob-imakodeeye gwen binsassulid, deyob-imakedgi gwen binsassulid. Unnila dulemar-obelogedginbi binsaed, unnila bukidar yar-baigan-osulogedginbi binsaed.”

⁸Bab-Jehová weyob soged: “Ar ade, Asiria-e-rey weyob soged: ‘¿Ar reymarde anga dummaganga-arbabukwadbisursi?

⁹¿Ar Calno-neggwebur, Carquemis-neggweburyob gussursi? ¿Hamat-neggwebur, Arfad-neggweburyob gussursi? ¿Ar Samaria-neggwebur, Damasco-neggweburyob gusmosursi?

¹⁰An ibmar-bab-dummadyob-imakleged-yalamar obelos gusad. A-yalamar, Jerusalén-neggweburba, degi, Samaria-neggweburba, bur bule melu ibmar-bab-dummadyob-imaklemalad nikagusana, degite, an obelosad.

¹¹An igi Samaria-neggwebur-imaksa, degi, igi e-ibmar-bab-dummadyob-imaklemaladse-bakale, an obelosa, deyob an Jerusalén-neggwebur imakoed. E-ibmar-bab-dummadyob-imaklemaladse-bakale, an obelomogoed.’ ”

¹²Bab-Jehová, Sión-yalagi-ibmar-imakoed bela-obelosale, degi, Jerusalén-neggweburgi-ibmar-imakoed bela-obelosale, sogdagoed: “Asiria-e-rey-san-dummarba-itogedba an sabsur-odurdakoed, emar-saedakedba an sabsur-odurdakoed.”

¹³Ar ade, Asiria-e-rey weyob soged: “We-ibmar an-ganguedba an imaksad, an-binsaed-nikaa-daedba an imaksad, ar ande, nue-ibmar-wisid-duled. Ani an neggweburmar-e-abingunanaid ogwasad, ani an e-ibe ibmar-nuegan atursasad, ani an sorda-bila-onoged-buled-guedsoggu, an e-reymar-obelosad.

¹⁴E-yalamar bela e-ibe an susad. Igi dule sikwi-e-akwa-bukwad weedae, deyobi, an e-ibe e-yalamar susad. Igi dule sikwi-uu sudae, deyobi, dule-e-ibmar-nuegan-nikad an susad. An-abinni, dule-wargwensaale gochasulid, dule gwen akar sogsasulid.”

¹⁵Isaías weyob soged: “¿Ar akande sunna dule-e-ebunaidba bur san-gannarbaa na imaksi? ¿Ar sunna esnali-sapisikedde dule-e-ebunaidba bur bule-bule na san-imaksi? ¿Gaapoledde, dule-e-ganikidgi obinosi? ¿E-nabiedba naosi? ¿Bia be daksa, suar-garagwadi, sapiwar-dummad-nakwaa imake? Deyob be dakdisulid.

¹⁶”A-ulale, Bab-Jehová, Bab-Jehová-Bela-Gangued-Nikadi, Asiria-e-rey-sorda-bila-onomalad-bulegangi boni-dummad barmidagoed. Amar-e-nug-odummoleged-muchubbi, uelleged-dummad ega ukoed, uellegedi sooyobi uegu egi nasikoed.

¹⁷Bab-Dummad-wargwenna-guedi, Israel-dulemarga-neg-meegwadyobi-guedi, soo-gaeyobi gudoed. Bab-Jehová-Isligwaled soo-gwichigumaidyob gudoed. Ibagwen-nuedi, Asiria-sordamar-obelogoed, ikomaryobi, gagan-ikomaryobi, soogi bela obelogoed.

¹⁸Bab-Dummad, bela Asiria-e-sapur-yeerdakle-nanaidi, e-nainu-nanaidi, obelogoed. Dule-geg-bar-gugus-gegumaiyobi bela ibmar nasikoed.

¹⁹Sapur-naidgi sapimar napi-ichee ambikuoed. Ichegwadbali, burwigana sunna ebisge guoed.”

²⁰A-ibagangine, Israel-dulemar-napi-bemaloedi, Jacob-wagan-napi-gudimaloedi, dule-e-obelosmaladba bar naguosurmalad. We-napi-bemaloedi, Israel-e-Bab-Dummad-Jehová-Isligwaledba, nue innikigwadba nagumaloed.

²¹Israel-dulemar-napi-bemaloedi, gannar Bab-Dummadba nagudmaloed, Jacob-wagan-dula-napi-gudimaloedi, Bab-Dummad-Bela-Gangued-Nikadba gannar nagudmaloed.

²²Israel-dulemar, bemar ukub-demar-gakaba-mergueyob-guen-inigwele, unnila bemar napi-ichee gannar nonimaloed. Israel-dulemar-obelolegoye bato soglesmaid. Bela ega igar nabolegoed.

²³Ar Bab-Dummad-Jehová-Bela-Gangued-Nikad, Israel-dulemar-obelolegoye bato sogsad. Ar deyob yargi-gudimaladgi imakoed.

²⁴A-ulale, Bab-Dummad-Jehová-Bela-Gangued-Nika-Maid weyob soged: “An-dulamar, be Sión-yalagi-bukwamalad, melle be Asiria-dulemar dobee itomalo. Asiria-sordamar gaapoledgi be-sarsomalo-inigwele, begi suar-oyodamalo-inigwele, melle dobgumalo. Igi-Egipto-dulemar bemar-imaksagusa, deyob bemar-imakdago-inigwele, melle be dobgumalo.

²⁵Emisgwasaale, bemargi an-nue-sae-itogedi berguoed. An-urwedi, be-isdarmaladgi yoledoed.”

²⁶Bab-Jehová-Bela-Gangued-Nikad, Asiria-dulemar-sabsur-odurdakoed. Bab-Jehová, igi-akwasaila-Orebʼye-nugadgi Madián-dulemar-imaksagusa, deyob Asiria-dulemar-imakoed. Bab-Dummad, igi-Egipto-dulemar-igarba-nadapgu e-gaapoled-oyosgu, egi demar-arwega-imaksagusa, deyob Asiria-dulemar-sabsur-imakoed.

²⁷A-ibagangine, bemar we-boniganba-galitodiidi bela bega berguoed, bemar gangudoedba, sabsur-wilediidgi be ollorgudmaloed.

²⁸Be-isdarmalad-Asiria-sordamar Ajatʼye-neg-nugadgingus naid, Migrónʼye-neg-nugadgi nadapid, Micmasʼye-neg-nugadgi e-ibmarmar obesad.

²⁹Diwar-dinnagwadgi obakmamaid, degi weyob sogmalad: “Gebaʼye-neg-nugadgi anmar obunnomaloye.” Ramá-dulemar dobedba wawanmakdemalad, Saúl-neggwebur-Gabaaʼginmalad duurmakdemalad.

³⁰¡Omegan-Galim-neggweburginmalad binnasur be oimakmala! ¡Omegan-Lais-neggweburginmalad be itomala! ¡Anatot-neggwebur be abinsamarmoga!

³¹Madmena-dulemar wakitemalad, Gebim-dulemar dukudmalad.

³²Emi-ibagi, Asiria-sordamar Nobʼye-neg-nugadse ambikunonimaloed. Sión-yalagi gwichiguega, guagwar ambikumaloed. Siónʼde, Jerusalén-e-yalad.

³³¡Nue be dake! Bab-Dummad-Jehová-Bela-Gangued-Nikad-abin, sapi-anagan doos-doos naded. Sapi-suigan bibichis nanaed, sapi-dummagan e-abin ailade nanaed.