عَننَبِ عٍسَيِ 10:2-33

²عَلَكٌ عٍ شَ مِسِكِينّ تْورْ كِيتِ حَاشِ رَ، عٍ تِنشِنتَرٍيَ رَبَ سٍتَرٍيٍ رَ نَشَن بَلٌي بَمَ كَاحّ فِنّيٍ نُن كِرِدِيٍ يِ رَ.

³وٌ مُنسٍ رَبَمَ دّنتّفّ سَ لْشْي عَلَتَلَ يَ عِ؟ وٌ وٌ شَشِلِ تِمَ ندٍ رَ عَلَكٌ وٌ شَ رَتَنفَ؟

⁴وٌ بِرَ مَ نّ فٍيلِمَنِيٍ بُن مَ، وٌ بْنْ مِشِ قَشَشِيٍ يَ مَ. هَلِ نَ بِرِن تٌ رَبَمَ، عَلَتَلَ شَ شْنّ مُ فبِلٍنمَ وٌ قْشْ رَ، عَ بّلّشّ مَن عِتٍمَ نّ وٌ شِلِ مَ.

⁵حَشَنكَتّ نَ عَسِرِيَ بّ، نَشَن قِندِشِ ﭑ مَ وُرِ بْنبْ تِ سٍ رَ ﭑ مَ شْنّ كُي. ﭑ مَ فبٍندٍفٍلَ نَ عَ رَ.

⁶ﭑ عٍ تَن نَن شّيمَ حَمَنّ مُرُتَشِ شِلِ مَ، ﭑ عٍ تَن نَن نَسِفَمَ حَمَ شِلِ مَ، نَشَن ﭑ نَشْنْشِ، عَلَكٌ عٍ شَ نَاقُلِ بَ نَ حَمَ يِ رَ، عٍ قَ عٍ مَبٌرٌن تَا كُي عَلْ بٌورَ.

⁷كْنْ عَسِرِيَكَيٍ شَ نَتّ تَن نُ نَ قٍ فبّتّ نَن مَ. عٍ نُ بَرَ نَتّ تٌنفٌ عٍ شَ عٍ شُن نَكَنَ كٍرٍنيِ رَ، عَلْ عٍ لُمَ عَ رَبَ رَ دُنِحَ مَ كِ نَشّ.

⁸عٍ شَ مَنفّ نَشّ، «ﭑ مَ سْورِ يَرٍرَتِيٍ بِرِن مُ قِندِشِ مَنفّيٍ شَ رَ؟

⁹كَلَنٌ تَا مُ سْنتْ شّ عَلْ كَرَكٍمِسِ؟ شَمَتَ قَن مُ قَشَ شّ عَلْ عَرَثَدِ؟ سَمَرِ مُ كَنَ شّ عَلْ دَ مَسِ؟

¹⁰شَ ﭑ بَرَ نْ نَ بْشِيٍ رَ عَ نُن عٍ شَ كُيٍيٍ، كُيٍ نَشٍيٍ سّنبّ فبٌ دَرِ سَلَمُ نُن سَمَرِ فبٍيٍ بّ،

¹¹ﭑ مُ نَ مْولِ رَبَمَ شّ دَرِ سَلَمُ قَن نُن عَ شَ كُيٍيٍ رَ؟ ﭑ نَشَن نَبَشِ سَمَرِ نُن عَ شَ كُيٍ رَ، ﭑ مُ نْمَ شّ نَ قَن نَبَدٍ دَرِ سَلَمُ رَ شّ؟»

¹²«كْنْ ﭑ تَن عَلَتَلَ نَ فّ ﭑ مَ وَلِ بِرِن نَكَمَلِدٍ سِيٌنِ فٍيَ قَرِ نُن دَرِ سَلَمُ، ﭑ قَمَ نّ ﭑ يَ رَقِندِدٍ عَسِرِيَ مَنفّ مَ، ﭑ عَ شَ يّتّ عِفبٌيَ سَرٍ رَفبِلٍن عَ مَ،

¹³بَرِ مَ عَ لُمَ عَ قَلَ رَ، ‹ﭑ بَرَ يِ بِرِن نَبَ ﭑ يّتّ سّنبّ رَ، ﭑ مَ قَهَامُي نَن عَ نِيَ دُنِحَ بْشِ بِرِن شَ لُ ﭑ يِ رَ، ﭑ بَرَ سِيٍ شَ نَاقُلِ تٌنفٌ ﭑ يّتّ بّ، ﭑ بَرَ نْ مَنفّ بِرِن نَ، ﭑ قِندِشِ مَنفّ سّنبّمَ نَن نَ.

¹⁴ﭑ بَرَ ﭑ بّلّشّ عِتَلَ سِيٍ شَ بَننَيَ تَفِ، ﭑ قَ نَاقُلِ تٌنفٌ عَلْ مِشِ شْنِ شّلّيٍ بَمَ عَ تّي كُي كِ نَشّ. مِشِ يٌ مُ نْ تْنيِ دْشْدٍ ﭑ مَ.›»

¹⁵«بٍرَ كٌلٍ عَ يّتّ مَتْشْمَ عَ رَوَلِمَ بّ؟ سّرَ عَ يّتّ مَتْشْمَ كَمُدّرِ بّ؟ بْنبْ وُرِ نْمَ مِشِ بّلّشّ رَتٍدٍ؟ لُشُسِنيِ نْمَ مِشِ بْنبْدٍ؟

¹⁶نَ كُي عَلَتَلَ سّنبّمَ قَمَ نّ عَ شَ سْورِ شُنفبٍيٍ شْسِدٍ، عَ قَ عٍ فَن تّ شْرْشْي رَ.

¹⁷عِسِرَيِلَ مَرِفِ عَلَتَلَ لُمَ نّ عَلْ تّ سّنِيّنشِ، نَشَن عٍ شَ تُنبٍ نُن بَافِ بِرِن فَنمَ لْشْ كٍرٍن.

¹⁸عِسِرَيِلَ شَ قْتْنيِ نُن عَ شَ شّيٍ شُن قَمَ نّ كَنَدٍ عَلْ قُرٍ مَ نَشَن نَ شْسِقٍ.

¹⁹دِ مّدِ يَتِ نْمَ عَ شَ وُرِ بِلِ دْنشْييٍ كْنتِدٍ نَشٍيٍ لُمَ عَ شَ قْتْنيِيٍ كُي.»

²⁰نَ لْشْي عِسِرَيِلَ مِشِ دْنشْييٍ مُ عٍ شَشِلِ تِمَ مِشِيٍ رَ سْنْن، نَشٍيٍ نُ بَرَ نْ عٍ رَ. يَشُبَ بْنسْي عٍ شَشِلِ تِمَ عَلَتَلَ نَن نَ، نَشَن قِندِشِ عِسِرَيِلَ شَ سّنِيّنتْي رَ.

²¹يَشُبَ بْنسْي مِشِ دْنشْييٍ قَمَ نّ فبِلٍندٍ عَلَ سّنبّمَ مَ.

²²عِسِرَيِلَ، هَلِ عِ شَ حَمَ سَ فبٌ نّ عَلْ مّيّنيِ نَشَن نَ بَا دّ رَ، دٌندٌرٌنتِ نَن تُن فبِلٍنمَ عٍ شْنيِ. عَلَتَلَ بَرَ نَتّ تٌنفٌ تِنشِنيِ كُي عِسِرَيِلَكَيٍ سْنتْقٍ رَ.

²³عَلَتَلَ سّنبّمَ قَمَ نّ نَ نَتّ رَكَمَلِدٍ بْشِ بِرِن كَنَقٍ رَ.

²⁴نَ كُي عَلَتَلَ سّنبّمَ بَرَ يِ مَسٍنيِ تِ، عَ نَشّ، «وٌ تَن، ﭑ مَ حَمَ نَشَن سَبَتِشِ سِيٌنِ، هَلِ وٌ مُ فَاشُ عَسِرِيَكَيٍ يَ رَ، نَشٍيٍ نَ وٌ بْنبْقٍ لُشُسِنيِ نُن وُرِ رَ، عَلْ مِسِرَكَيٍ نُ عَ رَبَمَ كِ نَشّ.

²⁵عَ فبٍ مُ لُشِ ﭑ مَ شْنّ شَ فبِلٍن وٌ قْشْ رَ، عَ قَ عٍ تَن شُن نَكَنَ.»

²⁶عَلَتَلَ سّنبّمَ قَمَ نّ عَ شَ لُشُسِنيِ عِتٍدٍ عٍ شِلِ مَ، عَلْ عَ نَشَن نَبَ مَدِيَنكَيٍ شَ مَنفّ عٌرٍبِ رَ. عَ قَمَ نّ عَ شَ يِسُشُوُرِ عِتٍدٍ بَا شُن مَ، عَلْ عَ رَبَ مِسِرَ بْشِ مَ كِ نَشّ.

²⁷نَ لْشْي عَلَ وٌ شَ كٌتٍ بِنيٍ بَمَ نّ وٌ تُنكِ مَ عٍ نَشَن سَشِ وٌ شُن مَ. وٌ شُن نَكٍلِمَ نّ هَن نَ كٌتٍ بِرِن بَ وٌ شُن مَ.

²⁸وٌ يَشُييٍ سٌمَ نّ عَيَتَ، عٍ دَنفِ مِفِرٌن رَ، عٍ كٌتٍ ندٍ لُ مِكِمَسِ.

²⁹عٍ دَنفِمَ مّننِ نّ، عٍ يٌنكِن فٍبَلِ. فَاشُي رَ مَكَيٍ سُشُمَ نّ، مِشِيٍ عٍ فِمَ نّ سْلُ شَ بْشِ مَ فِبٍيَ.

³⁰بَتِ فَلِمُكَيٍ نَ وَقٍ. «لَيِسَكَيٍ، وٌ شَ وٌ تُلِ مَتِ. عَنَتْتِكَيٍ، وٌ مَكِنِكِنِ.»

³¹مَدَ مٍنَكَيٍ نَ يٍسٍنقٍ، فٍبِمِكَيٍ نَ عٍ نْشُنقٍ.

³²نَ لْشْي نَ يَشُييٍ دَنمَ نٌبٌ نّ، عٍ عٍ بّلّشّ رَ مَشَ سِيٌنِ فٍيَ شِلِ مَ دَرِ سَلَمُ.

³³مَرِفِ عَلَتَلَ سّنبّمَ مَتٌ، عَ نَ وُرِ بِلِ سَلٌنيِ بٌلٌنقٍ سّنبّ رَ. عَ نَ وُرِ بِلِ عِتٍشِ رَبِرَقٍ بْشِ مَ.