Amosi 8

1

2

3

4

5

6

7

8

9

¹Wofuŋ Anutuzi wiac kecʒiŋuc nowatuwec: Sasac mocko jâchândâŋ quecne ŋeme honepo.

²Eha ʒiŋuc wio‐narewec: “Amosi, go wemo wiac honekomec?” Mume mupo: “No sasac mocko jâchândâŋ quecne ŋeme honekopac.” Eme Wofuŋzi ʒiŋuc nazawec: “Israe ŋicgurufâc‐nane jaŋere dameŋ qosackekac hâcne, irec no mocwâc jowaruhuc mi akic‐jopapemu.

³Ŋokac naru ŋicwofuŋte ufuŋko gae heeŋgopieŋ jaŋe dameŋ ira kio uu eniŋmu, ehame qâŋɋâŋ bocjaha fuame ira me ira kosa behec‐jopapie niniŋ siarereŋ fuarâ foocmu.” Wofuŋ Anuture dâŋ iŋuc.

⁴Ŋic hapetac ro waha âte ejareeŋgopieŋ, â mâreŋ ʒirec ŋic qarâ suriŋne sipiric‐jopaeŋgopieŋ ŋoŋe dâŋ ʒi mananiŋ.

⁵Ŋoŋe ʒiŋuc muhuc wiac i eeŋgopieŋ hâcne: “Mosa ɋâricne wahaekac irec hombaŋ i wezimucko tarame padi jacgoŋ wiac furi bapa fuaocmu? Me sabata hombaŋ ŋeŋe i mo dameŋko tarame padi rowaŋficte motâc ronaŋmu, ehuc padi sâcticne bawahahuc furi‐ticne fehuc ronaŋmu, â sigeli bâsifuckerâ ŋic eatuc‐jopanaŋmu?

⁶Erâ ŋic qarâ suriŋne jaŋe siliwazi furi bacjopanaŋmu, â hapetac jaŋe kikehuhu jajaheczi furi‐jeŋic banaŋmu, erâ padi jawane râehuc moneŋ jaha ronaŋmu?”

⁷Jakobore kikefuŋ jaŋe Wofuŋte manapie feha Wofuŋ e jahacnao ɋetickehuc ʒiŋuc mupaŋkewec: “No eebapa‐jeŋicte moc mi nikecnu‐jâmbâŋkeocmu.

⁸Mâreŋ e wiac iŋucnere erâ mi ɋiɋiteckeocmu me? Â ŋecjucfâc‐ticne jaŋe ki busâqoc mi eniŋmu me? Me Nilu opâ sâkozi siwiŋnerâ feku mocwâc fâre wahaekac irec sâc mâreŋzi huhuckerâ feku mi uruŋkerâ huocmu me?”

⁹Wofuŋzi kecʒiŋuc mukac: “Eme no dameŋ ira ʒoaŋ ecnepe guŋpiticko gâpâreme mâreŋ i ʒoaŋ ɋaɋackoa dapâc eocmu.

¹⁰No ʒeri hombaŋ‐ŋeŋic hetikiepe busâqoc hombaŋ eocmu, â ʒeri gae‐ŋeŋic hetikiepe ki makuc gae efâreocmu. No mateŋ qonaŋke‐ŋare‐fârepemu â mupe ŋic sasawa jaŋe qizec‐jeŋic ropie utu pârâc fua‐fâreocmu. Ki mamakuc fuaocmu, i motec mocsâkoazi juku hâmome ki mamakuc fuaekac irec sâc. Ʒoaŋ irec tataranao busâqoczi ŋemâckerâ hâtâne eocmu.”

¹¹Wofuŋ Anutuzi ʒiŋuc mukac: “Manaŋgopieŋ, dameŋ moc maickeocmu ira mupe roroc fuaocmu, erâ i nânâ opâ jahere roroc aricne, Wofuŋ dâŋticnere roroc fuame mananiŋte eipieniŋmu.

¹²Jaŋe hâwec ŋifeckoneczi hâwec ŋifecko, â mâreŋ faickonec ʒoaŋ wewefunao rahuc domaniŋmu, ehuc Wofuŋte dâŋ bâfuaniŋte rac warec ehuc basa‐bipieniŋmu.

¹³“Dameŋ ira naru ʒeŋoŋ sahac hawari biaŋ, â motec ʒeŋoŋ jaŋe opâre hâmohuc marac‐jeŋic kereŋkeme rândiŋkeniŋmu.

¹⁴Eme ‘Daŋ, go nemuge jujâmbâŋkekac’ erâ ‘Bere‐Seba hae, go joroc nemuge jujâmbâŋkekac,’ iŋuc muhuc Samariare nemu ŋokac ʒâŋene Asima erao ɋetickehuc dâŋ mupaŋkeeŋgopieŋzi waha jopame mocwâc mi faharenʒepieŋ.”