2. Mojžišoskero 40:9-33

⁹Paľis le olejos pro pomakhľipen, pomakh o Stanos savoreha, so hin andre, a ela sentno.

¹⁰Pomakh the o oltaris pro labarde obeti savore leskere sersamenca. Sentňar les a ela neksentneder.

¹¹Pomakh the e nadoba le podstavcoha a sentňar la.

¹²Paľis an le Aron the leskere čhaven anglo Stanoskero vudar a thov (omor) len le paňeha.

¹³Uri le Aron andro sentno ruchos, pomakh les a avke les sentňar, hoj mange te služinel sar rašaj.

¹⁴An the leskere čhaven a uri pre lende o telune ruchi.

¹⁵Pomakh len avke, sar pomakhľa le Aron, hoj the on mange te služinen sar rašaja. Ada pomakhľipen kerela rašajen lendar the lengere potomkendar pro furt.”

¹⁶Paľis o Mojžiš kerďa sa avke, sar leske prikazinďa o RAJ.

¹⁷O Sentno Stanos ačhade ešebno džives andro ešebno čhon andro dujto berš paloda, sar omukle o Egipt.

¹⁸Sar o Mojžiš ačhaďa o Stanos, thoďa o podstavci, upral lende rakinďa o rami, zaispidľa o dručki a o slupi rozthoďa andro šoros.

¹⁹O Stanos zaučharďa le side lepedenca a thoďa upre e lepeda, avke sar o RAJ prikazinďa le Mojžišoske.

²⁰Paľis iľa o barune tabli le deše prikazaňjenca a thoďa andre Archa, zaispidľa pašal o seri o dručki a zaučharďa la le kritoha.

²¹Avke ľigenďa e Archa andro Stanos a figinďa o andruno pochtan, hoj te na dičhol e Archa, avke sar o RAJ prikazinďa le Mojžišoske.

²²O skamind thoďa anglo pochtan pre severno sera andro Sentno Than

²³a thoďa pre leste o sentne mare anglo RAJ, avke sar o RAJ prikazinďa le Mojžišoske.

²⁴O somnakuno momeľaris thoďa anglo skamind pre južno sera andro Sentno Than.

²⁵Pre leste thoďa o lampi anglo RAJ, avke sar prikazinďa le Mojžišoske.

²⁶O somnakuno kaďidloskero oltaris thoďa andro Sentno Than anglo pochtan

²⁷a labarďa upre voňavo kaďidlos, avke sar o RAJ prikazinďa le Mojžišoske.

²⁸Paľis figinďa lepeda paš o vudar andro Sentno Than.

²⁹O oltaris pro labarde obeti thoďa anglo Stanos. Pre leste obetinelas o labarde the chabeneskere obeti, avke sar o RAJ prikazinďa le Mojžišoske.

³⁰Maškar o Stanos the oltaris thoďa e brondzuňi nadoba a čhiďa andre paňi.

³¹O Mojžiš, o Aron the leskere čhave ole paňeha obthovenas (omorenas) o vasta the o pindre.

³²Sar džanas andro Stanos abo ko oltaris, obthovenas pes avke, sar o RAJ prikazinďa le Mojžišoske.

³³Pašal o Stanos the oltaris kerďa dvora a figinďa e lepeda paš e dvorakeri brana. Avke o Mojžiš dokerďa savori buči.