Exodus 40:9-33

⁹—Ma oil viaiainana ma vaia ma numa gara ma purapura anatapui au orana ma buloi ma ma vovivirei da vivivireina.

¹⁰Ma pulo aniapuna ma ana purapura maiteni ma buloi ma ma vovivirei da vivivireina.

¹¹Anioḡa abomana ma ana animairi maiteni ma buloi ma ma vovivirei da vivivirei.

¹²—Aaron natunatuna ma neiai numa gara vivivireina au metaetana ma wairei ma oḡai.

¹³Ma Aaron pirisi ana gara vivivireina ma vioteni ma oilei ma vovivirei da aubaiu ina vipirisi pulo tauapuina.

¹⁴Ma natunatuna ma neiai ma pirisi pulo tauapuina ai gara ma vioteni.

¹⁵Ma ma buloi me amai u buloi nanare da ina vipirisi pulo tauapuina. Wei viaiainana Aaron ana epaepaia i vovivirei da mara nonoa kimtana patapatana awari ina vipirisi pulo tauapuina.

¹⁶Moses anatapuna i kauana-paiei me Bada i ririwa nanare.

¹⁷—Anina ma madeḡa au viruaina au pom tagogi nawaravi tagogi, taui numa gara vivivireina i vimairini.

¹⁸Moses dogo i ḡarai ma tuatua i tonei ma terewaba ma anitapejijinana i ragini.

¹⁹Ma gara ḡamoḡamo opinei i ḡauḡauri au tepana i ebani, Bada i ririwei nanare.”

²⁰Anina ma Moses ḡaima dabadabai ruaḡa bokisi au orana i terei. Ma anipawe loji au orana i vionaḡi bokisi au adana, ma uḡuna i viaitani.

²¹Ma bokisi i ruiei God ana au numa gara vivivireina ma anitereḡaḡara i terei da bokisi i mae-ḡaḡari, Bada i ririwei nanare.

²²Ma nanare teibol i ruiei God ana au numa gara, anitereḡaḡara i mae ma au doei, au laubadei i terei

²³ma teibol au tepana palawa i pulopuloei Bada awarina i terei, Bada i ririwei nanare.

²⁴Rampa aniterenana i vaia ma au numa gara teibol au naona, au babaḡela au rauanaḡei i vikialai.

²⁵Ma rampa i apui Bada awarina, me i ririwei nanare.

²⁶Incense aniapuna goldei anitereḡaḡara au naona i terei numa gara vivivireina au orana.

²⁷Anina ma au tepana incense ḡabuḡabui i apui, Bada i ririwei nanare.

²⁸Ma anitereḡaḡara i terei da aninae au numa gara vivireina i gudui.

²⁹Pulo aniapuna Bada ana numa gara vivivireina au metaetana. Au tepana ḡamoḡamo ma palawa i apui me Bada i ririwei nanare.

³⁰Ma aboma ḡaeḡaena numa gara ma pulo aniapuna au poui i terei, ma au orana waira i waḡi anioḡa aubaina,

³¹ma kampa Moses ma Aaron ma natunatuna urai ma aei i oḡai.

³²Taui aei ma urai e oḡaoḡai maranai e ruirui au numa gara bo e nenae pulo au aniapuna.

³³Ma Moses Numa gara ma Pulo aniapuna i gari-kwaviviroi. Ma anitereḡaḡara i terei au anirui. Anina ma Moses ana nola i kwa.