Ekisodas 40:9-33

⁹Ita e mena wadee ape kakaiwa ita bedewe nitu uduudu wineia osouwo memamoa ita nitu sa uduudu enapune awowasaa, ita nitu kakaiwa segantopu.

¹⁰Tane mena wadee pulo sumpa watawa ita nituwa uduudu osouwo memamoa ita nitu sa uduudu enapune awowasaa, ita nitu kakaiwa segantopu.

¹¹Ita do mena wadee witapu ita wau mitompa abomawa ita itumpa bolawa enapune nambemoe kakaimoa.

¹²Tane Aron ita me obampa do otamoe ape kakaiwa moape ita esa mampe duadimoa.

¹³Ita Aron gara kakaiwa mampe benasaa ita mena me osowe memea ita me enapune nambesawo pirisilepie ne simbianeampa.

¹⁴Tane me obampa otamoe wine pirisi garawa mampe benamoa.

¹⁵Ita mo mambu osowe mena memeana rua mo osouwo memea ita mo ne simbianeampe pulo sumpa apanawa wanantopu. Tane mena sa mo osouwo memeana mo nosinosiu do pulo sumpa apanawa wanantopue wankasantompa.”

¹⁶Iawe God wana rua Moses dewa uduudu dewasantuwan.

¹⁷Ita ena nata bedewe uaboa dea ita walama dea bumpe mo ape kakaiwa dewasaiena.

¹⁸Moses unsia endolepia bolawa dewamone ita bedeuwo endolen ita kambara ita rou teeno alen ape wadepidodepia baiwa.

¹⁹Ita me ape sa dewasane aupe rupu isiwa otene teabodalen tane osowesane onapainta pue etepa mampe ape iwa ita belawa itunboden, Iawe God wana rua.

²⁰Ita Moses seu nata tabatabau otene saua badowa bokisiwa bedewe aimon ita bokisi sa wawa osouwo riniwa dola nagawa bedewe kewa neanamono waiwa dauwo nomoiena. Ita osowe kadi insadabua enabodawa itune boden.

²¹Tauma me saua badowa bokisiwa wadene alene ape kakaiwaida bedewe itune ita ape bedewe gara seunboden, Iawe God me diena rua.

²²Ita do me wata awanene alene ape kakaiwa bedewe gara seudia danawe wita on deneuwe eindoden.

²³Ita do me parawa susula Iawe God mampe amonalene wata osowe itun, Iawe God me diena rua.

²⁴Tane me siwa endowa nepa wadene odene ape kakaiwa bedewe wita sen deneuwesane wata enedia waiwa dauwo eindoden

²⁵ita me Iawe God emawe siwa sumon, Iawe God me diena rua.

²⁶Me watawa gold mampe dewala osowe piupiu sumpo bonawa alempa wadene gara seuiena danawe itun

²⁷ita me piupiu sun Iawe God me diena rua.

²⁸Tane me gara wadene ape kakaiwa intawa moa seunboden.

²⁹Ita me pulo sumpaa watawa wadene ape kakaiwa danawe itun ita osowe me pulolepia baiwa pue bosan. Ita do me parawa pulolene sun, Iawe God me diena rua.

³⁰Ita me witapu ita wau mitompa abomawa wadene alene ape kakaiwa ita pulo sumpaa watawa sawanauwo itun ita aboma sa bedewe esa memeno nopelen duadi baiwa

³¹ita sape Moses, Aron ita me obampa do witapu ita wau mitamoie

³²walamaipa mo ape kakaiwa bedewe odaodawa baiwa ita do pulo sumpaa watawa mampe antompa mo bauta duadintoi, Iawe God me diena rua.

³³Ita me ape kakaiwa ita pulo sumpaa watawa gonaalene gara mampe intawa moawa seunboden. Ita mape me nola uduudu diasan.