Waha Rara 40:9-33

⁹Izi rurua wokemaŋ rorâ tiri boze â maŋnao wiac ŋerakac sasawa i ruacnetec tiri ŋezejec.

¹⁰Qowi bâzi ririkere alata â gie bapare wiac‐ticne sasawa i iŋuc jaha wokemaŋ ruacnehuc bâtirizemec, eme alatazi tiri jâmbâŋ ŋezejec.

¹¹Erâ ʒuʒure râqâc â kikene i iŋuc jaha wâc wokemaŋ ruacnehuc bâtirizemec.

¹²Iŋuc erâ Aroŋ â ŋokâfâcne ejaretec ware tutumaŋ qoruc bozere motâcko domahapie opâ rua‐jarezemec.

¹³Erâ Aroŋ tiri ŋaqi‐ticne hecnetec hume wokemaŋ ruacnehuc mufirietecne taha bapa‐nane erâ juzejec.

¹⁴Eme ŋokâfâcne jaŋe wâc mutec ware domahapie ŋaqi ʒora hejaretec huzejec.

¹⁵Eme mamac‐jeŋic wokemaŋ ruacnecmu iŋuc jaha jaŋe wokemaŋ rua‐jaretec taha bapafâc‐nane erâ junʒepieŋ. Eme wokemaŋ rua‐jarehuc mimiŋzi ɋâric taha bapa gie forahuc juocte mutara‐jarezemec.”

¹⁶Eme Mose e Wofuŋzi mutâcnecnewec irec sâcko jâmbâŋ wiac efârewec.

¹⁷Eme jara namba 2 irec fufuŋke mosare ʒoaŋ gie bapa wâŋ ira tiri boze wiseme huwec.

¹⁸Mose e tiri boze ʒiŋuc ehuc bafaharewec: Râqâc wiac‐ticne heme ŋeha katapa âkendâŋnewec, erâ babasanaŋ‐ticne râerâ wâtuŋ bâfeŋnewec.

¹⁹Eme tiri boze bupunere qoruc fâreme sâcke‐fârewec, erâ fainao bupu sâsâc‐ticne i Wofuŋzi Mose âzâcnewec irec sâcko qaratiewec.

²⁰Izi ine Sâcmutâc Sanaŋ qorac tapa katapa maŋnao râeme huwec, erâ reŋ i fofonao esorieme raʒiwec, eme tapa‐ticne qorac tapa katapa fainao heme ŋewec.

²¹Eme qorac tapa katapa i tiri bozeo baferâ qoruc ââketâc ɋetickeme qorac tapa katapa sâockewec. Wofuŋzi Mose âzâcnewec irec sâcko ewec hâcne.

²²Erâ tebo i tutumaŋ qoruc boze ira faic mâreŋkopec qoruc ââketâc sahacnao heme ŋewec.

²³Ŋehame fainao poroŋ furu mukicne i Wofuŋte maio râe biric ewec, i Wofuŋzi Mose dâŋ âzâcne mutâc ewec irec sâcko jaha ewec.

²⁴Izi lambe dodoma i tiri boze juwic mâreŋkopec ira tutumaŋ qoruc bozeo tebo ŋifecnao heme ŋewec.

²⁵Erâ Wofuŋzi Mose âzâcne mutâc ewec irec sâcko lambe wiac‐ticne i wâc Wofuŋte maio âkendâŋnewec.

²⁶Eme alata golzi bakicne i tutumaŋ qoruc bozeo ââketâc qoruc heririŋnao heme ŋewec.

²⁷Ehame wiac âsu biaŋzi hosâc âsu rikewec, i Wofuŋzi Mose mutâcnecnewec irec sâcko ewec.

²⁸Ehuc tiri bozere motâcko qoruc ɋetickewec.

²⁹Qowi bâzi ririkere alata i ine tiri boze motâcnao heme ŋeha fainao qowi bâzi rikewec â taha bawec. Wofuŋzi Mose dâŋ âzâcnewec irec sâcko ewec hâcne.

³⁰Eme wiac ʒuʒure râqâc i tutumaŋ qoruc boze â alata ŋondeŋ‐jekicko heme ŋeha opâ qame huwec.

³¹Eme Mose mecne â Aroŋ â ŋokâfâcne mecne jaŋe ira me kike‐jeŋic ʒure jumbieŋ.

³²Ine tutumaŋ qoruc boze raʒimbiŋ sâc me alata maickembiŋ sâc iŋuc ejumbieŋ hâcne. I Wofuŋzi Mose âzâcne mutâc ewec irec sâcko embiŋ.

³³Wiac i tara‐fâreme tiri boze â alata rârec rârec hae ʒoŋa bafârewec. Ehuc hae ʒoŋa motâc irec qoruc ɋetickewec. Mose e iŋuc ehuc gie batarawec hâcne.