ESODO 40:9-33

⁹Bena dehoro helaḡana bavabia, dubu mai kohuna idoinai ba nevaridia: unu ba hahelaḡadia toma, bena bae helaḡa.

¹⁰Ihaboulaina patana danu mai kohuna ida ba nevaridia: unu ba hahelaḡadia toma; hari ihaboulaina patana baine helaḡa herea.

¹¹Hurihuri dihuna danu mai ihahelai-kauna ḡauna ida ba nevaridia, vada bae helaḡa.

¹²Bena Aaron mai natuna ida hebou kalagana iduarana ai bae gini bou. Ba hadigudia;

¹³bena Aaron na dabua helaḡadia do ba hadokilaia. Bena ba horoa, baine helaḡa; lauegu hahelaḡa tauna ai bainela.

¹⁴Natuna danu bavabidia, ba hadokilaidia;

¹⁵bena ba horodia, tamadia o horoa heḡereḡerena, egu hahelaḡa taudia ai baela. Ihorodia dainai idia na hahelaḡa taudia ai baela, edia uru iboudiai, ela bona hanaihanai.

¹⁶Mose na unu e kara toma. Iehova ese haḡania heḡereḡerena, unu mo e kara toma.

¹⁷Laḡani iharuana gini-gunana dina na gini-gunana ai dubu na e haginia.

¹⁸Mose ese dubu e haginia: hahelaikau ḡaudia na gabudia ai e atodia; haba kahadia e hagini; raroraro e toi hanai; bona du e holo.

¹⁹Bena dubu na kalaga amo e koua heḡeḡe, bona guhi dabuana amo e ḡovaia ahu, Iehova ese e haḡania heḡereḡerena.

²⁰Bena taravatu nadidia e abi, maua helaḡana ai e uda. Maua ena maduna e toi hanai, bona ikaruhina amo e karuhia ahu.

²¹Bena maua na dubu lalonai e huaia vareai, bona e sesea ahu, Iehova ese e haḡania heḡereḡerena.

²²Pata helaḡana na hebou kalagana ai e atoa, dubu mirigini kahana ai, seseahu murimurinai;

²³bona flaoa helaḡana na pata latanai e dabaraia, Iehova vairanai, Iehova ese e haḡania heḡere=herena.

²⁴Bena lamepa patana na hebou kalagana ai e atoa, pata helaḡana e havaira henia, dubu diho kahana ai;

²⁵bena lamepa e ha-ara Iehova vairanai, Iehova ese e haḡania heḡereḡerena.

²⁶Bena muramura patana, gold ḡauna, na hebou kalagana ai e atoa, seseahu vairanai;

²⁷bona muramura mai bonadia ia latanai e gabu, Iehova ese e haḡania heḡereḡerena.

²⁸Bena dubu e sesea ahu.

²⁹Bena hebou kalagana dubuna iduarana vairanai ia ese ihaboulaina patana e atoa, bona ḡole-oho boubouna bona flaoa boubouna ia latanai e ato, Iehova ese e haḡania heḡereḡerena.

³⁰Bena ihaboulaina patana bona hebou kalagana padadiai ia ese hurihuri dihuna e atoa, bona ranu e seia,

³¹Mose bona Aaron bona Aaron natuna imadia bona aedia ihurilaidia ranuna.

³²Hebou kalagana ai e raka vareai bona ihaboulaina patana e raka henia kahi negadia iboudiai idia na unu e digu tomava, Iehova ese Mose e haḡania heḡereḡerena.

³³Bena maḡu dabuadia e tau dae heḡeḡe, dubu bona ihaboulaina patana e ḡeḡe ahu, bona e sesea ahu. Mose ena ḡaukara idoinai unu e haḡuḡurua toma.