Zaburi 78:11-72

¹¹Walisahau matendo yake, mambo ya ajabu ambayo yeye amewaonesha wao.

¹²Walisahau mambo ya ajabu aliyofayafanya machoni pa mababu zao katika nchi ya Misri, katika ardhi ya Soani.

¹³Aliigawa bahari na akawaongoza katikati ya bahari; aliyafanya maji yasimame kama kuta.

¹⁴Wakati wa mchana aliwaongoza kwa wingu na usiku wote kwa nuru ya moto.

¹⁵Alipasua miamba jangwani, na aliwapa maji mengi, ya kutosha kujaza vina virefu vya bahari.

¹⁶Alifanya maporomoko ya maji kutiririka tokea mwambani na aliyafanya maji yatiririke kama mito.

¹⁷Lakini bado waliendelea kutenda dhambi dhidi yake, wakiasi dhidi ya Aliye Juu katika jangwa.

¹⁸Walimjaribu Mungu mioyoni mwao kwa kuomba chakula cha kuwatosheleza hamu zao.

¹⁹Waliongea dhidi ya Mungu; walisema, “Kweli Mungu anaweza kuweka meza ya chakula kwa ajili yetu jangwani?

²⁰Tazama, wakati alipoupiga mwamba, maji yalibubujika, mito ikafurika. Lakini anaweza kutoa mkate tena? Ataweza kuleta nyama kwa watu wake?”

²¹Yahwe aliposikia haya, alikasirika; moto wake uliwaka dhidi ya Yakobo, hasira yake ikamshambulia Israeli,

²²kwa sababu hawakumwamini Mungu na hawakuamini katika wokovu wake.

²³Lakini yeye bado aliziamuru mbingu juu na kufungua milango ya mbingu.

²⁴Aliwanyeshea mana ili wale, na aliwapa nafaka kutoka mbinguni.

²⁵Watu walikula mikate ya malaika. Aliwatumia chakula kingi.

²⁶Alisababisha upepo wa mashariki kupiga mawinguni, na kwa uweza wake aliuongoza upepo wa kusini.

²⁷Aliwanyeshea nyama kama mavumbi, na ndege kama wingi wa mchanga wa baharini.

²⁸Walianguka katikati ya kambi yao, na maeneo yote karibu na hema zao.

²⁹Hivyo walikula na walishiba. Maana aliwapa kile walichokitamani sana.

³⁰Lakini walikuwa bado hawajatosheka; chakula chao kilikuwa bado kinywani mwao.

³¹Ndipo hasira ya Mungu iliwashambulia na kuwaua wenye nguvu kati yao. Aliwaangusha chini vijana wa Israeli.

³²Licha ya hili, waliendelea kutenda dhambi na hawakuyaamini matendo yake ya ajabu.

³³Hivyo Mungu alizikatisha siku zao; miaka yao ilijawa na hofu.

³⁴Wakati wowote Mungu alipowataabisha, nao waligeuka na kumtafuta yeye kwa bidii.

³⁵Walikumbuka kuwa Mungu alikuwa mwamba wao na kuwa Mungu Aliye Juu Sana alikuwa mwokozi wao.

³⁶Lakini walimsifia tu kwa vinywa vyao na kumdanganya kwa maneno yao.

³⁷Maana mioyo yao haikuwa thabiti kwake, na hawakuwa waaminifu kwa agano lake.

³⁸Lakini yeye, kwa kuwa alikuwa alikuwa na huruma, aliwasamehe uovu wao na hakuwaangamiza. Ndiyo, wakati mwingi aliizuia hasira yake na hakuionesha ghadhabu yake yote.

³⁹Alikumbuka kuwa waliumbwa kwa mwili, upepo ambao hupita nao haurudi.

⁴⁰Mara ngapi wameasi dhidi yake jangwani na kumuhuzunisha nyikani!

⁴¹Tena na tena walimjaribu Mungu na wakamtilia mashaka Mtakatifu wa Israeli.

⁴²Hawakufikiria kuhusu uweza wake, jinsi alivyo waokoa dhidi ya adui

⁴³alipofanya ishara za kutisha katika Misri na maajabu yake katika konde la Soani.

⁴⁴Aligeuza mito ya Wamisri kuwa damu ili wasipate kunywa kutoka katika vijito vyao.

⁴⁵Alituma makundi ya inzi yaliyowavamia na vyura ambao walisambaa katika nchi yao.

⁴⁶Aliwapa mazao yao panzi na kazi yao nzige.

⁴⁷Aliiharibu mizabibu yao kwa mvua ya mawe na miti ya mikuyu kwa mvua ya mawe zaidi.

⁴⁸Aliinyeshea mifugo yao mvua ya mawe na alirusha radi ya umeme ikapiga mifugo yao. Ukali wa hasira yake ulielekea dhidi yao.

⁴⁹Alituma gadhabu, uchungu na taabu kama wakala aletaye maafa.

⁵⁰Aliifanyia njia hasira yake; hakuwakinga dhidi ya kifo bali aliwakabidhi kwa pigo.

⁵¹Aliwaua wazaliwa wote wa kwanza katika Misri, wazaliwa wa kwanza wa nguvu zao katika mahema ya Hamu.

⁵²Aliwaongoza nje watu wake mwenyewe kama kondoo na aliwaelekeza kupitia jangwani kama kundi.

⁵³Aliwaongoza salama na pasipo na woga, lakini bahari iliwaelemea adui zao.

⁵⁴Kisha aliwaleta mpaka wa nchi yake takatifu, kwenye mlima huu ambao aliutwaa kwa mkono wake wa kuume.

⁵⁵Aliwafukuza mataifa mbele yao na akawapa urithi wao. Aliwakalisha makabila ya Israeli katika mahema yao.

⁵⁶Lakini bado walimjaribu na walimkaidi Mungu Aliye Juu na hawakushika amri zake takatifu.

⁵⁷Hawakuwa waaminifu na walienenda katika hila kama baba zao; walikuwa sio wa kutegemewa kama upinde mbovu.

⁵⁸Kwa maana walimkasirisha kwa mahali pao pa juu na walimgadhabisha hata akawa na hasira ya wivu kwa miungu yao.

⁵⁹Mungu aliposikia hili, alikasirika na alimkataa kabisa Israeli.

⁶⁰Alipaacha patakatifu pa Shilo, na hema alikoishi kati ya watu.

⁶¹Aliruhusu nguvu zake kutekwa na kuutoa utukufu wake mkononi mwa adui.

⁶²Aliukabidhi upanga watu wake, na aliukasirikia urithi wake.

⁶³Moto uliwavamia vijana wao wa kiume, na vijana wao wa kike hawakuwa na nyimbo za harusi.

⁶⁴Makuhani wao waliangushwa kwa upanga, na wajane wao hawakulia.

⁶⁵Kisha Bwana aliamshwa kama aliyetoka usingizini, kama shujaa apigaye kelele kwa sababu ya mvinyo.

⁶⁶Aliwarudisha adui zake nyuma; aliwaweka kwenye aibu ya milele.

⁶⁷Aliikataa hema ya Yusufu, na hakulichagua kabila la Efraimu.

⁶⁸Alilichagua kabila la Yuda na Mlima Sayuni aliyoupenda.

⁶⁹Alipajenga patakatifu pake kama mbinguni, na kama nchi aliyoiimarisha milele.

⁷⁰Alimchagua Daudi, mtumishi wake, alimchukua kutoka zizi la kondoo.

⁷¹Alimtoa kutoka katika kufuata kondoo pamoja na wana wao, na kumweka kuwa mchungaji wa Yakobo, watu wake, na Israeli, urithi wake.

⁷²Daudi aliwachunga kwa uadilifu wa moyo wake, naye aliwaongoza kwa ujuzi wa mikono yake.