Zaburi 119:137-174

¹³⁷Wewe ni mwenye haki, Yahwe, na amri zako ni haki.

¹³⁸Umezipa amri za agano lako haki na uaminifu.

¹³⁹Hasira imeniangamiza kwa sababu adui zangu husahau maneno yako.

¹⁴⁰Neno lako limepimwa sana, naye mtumishi wako analipenda.

¹⁴¹Sina umuhimu na ninadharauliwa, lakini bado siyasahau maagizo yako.

¹⁴²Hukumu yako ni ya haki milele, na sheria yako ni ya kuaminika.

¹⁴³Japo dhiki na taabu vimenipata, amri zako bado ni furaha yangu.

¹⁴⁴Amri za agano lako ni za haki milele; unipe uelewa ili niweze kuishi. QOPH.

¹⁴⁵Nililia kwa moyo wangu wote, “Unijibu, Yahwe, nitazishika sheria zako.

¹⁴⁶Ninakuita wewe; uniokoe, nami nitazitii amri za agano lako.”

¹⁴⁷NInaamka asubuhi kabla jua halijachomoza na kulia kwa ajili ya msaada.

¹⁴⁸Ninatumaini katika maneno yako. Macho yangu yako wazi usiku kucha ili niweze kutafakari juu ya neno lako.

¹⁴⁹Sikia sauti yangu katika uaminifu wa agano lako; uniweke hai, Yahwe, kama ulivyoahidi katika amri zako za haki.

¹⁵⁰Wale wanaonitesa wananikaribia, lakini wako mbali na sheria yako.

¹⁵¹Wewe uko karibu, Yahwe, na amri zako ni za kuaminika.

¹⁵²Muda mrefu uliopita nilijifunza kutoka katika amri za agano lako ulizoziweka katika mahali pa milele. RESH.

¹⁵³Uyatazame mateso yangu na unisaidie, maana siisahau sheria yako.

¹⁵⁴Unitetee na kunikomboa; unihifadhi, kama ulivyo ahidi katika neno lako.

¹⁵⁵Wokovu uko mbali na waovu, maana hawazipendi amri zako.

¹⁵⁶Matendo yako ya huruma ni makuu, Yahwe; uniweke hai; kama ufanyavyo siku zote.

¹⁵⁷Watesi wangu na adui zangu ni wengi, lakini bado sijaenda mbali na amri za agano lako.

¹⁵⁸Nimewaona wasaliti wakitia kinyaa kwa sababu hawalishiki neno lako.

¹⁵⁹Tazama jinsi niyapendavyo maagizo yako; uniweke hai, Yahwe, kama ulivyoahidi katika uaminifu wa agano lako.

¹⁶⁰Kiini cha neno lako ni kweli; kila mmoja mwenye amri za haki hudumu milele. SHIN.

¹⁶¹Wakuu hunitesa bila sababu; moyo wangu hutetemeka, ukiogopa kutolitii neno lako.

¹⁶²Ninalifurahia neno lako kama apataye nyara nyingi.

¹⁶³Ninachukia na kudharau uongo, lakini naipenda sheria yako.

¹⁶⁴Mara saba kwa siku ninakusifu wewe kwa sababu ya amri zako za haki.

¹⁶⁵Wana amani nyingi, waipendao sheria yako; hakuna cha kuwatia mashakani.

¹⁶⁶Naungoja wokovu wako, Yahwe, na ninatii amri zako.

¹⁶⁷Ninazishika amri zako thabiti, na ninazipenda sana.

¹⁶⁸Ninayashika maagizo yako na amri zako thabiti, kwa maana unajua kila kitu nifanyacho. TAV.

¹⁶⁹Sikia kilio changu, Yahwe; unipe uelewa wa neno lako.

¹⁷⁰Maombi yangu yaje mbele zako; unisaidie, kama ulivyoahidi katika neno lako.

¹⁷¹Midomo yangu na imwage sifa, maana wewe unanifundisha sheria zako.

¹⁷²Ulimi wangu na uimbe kuhusu neno lako, maana amri zako zote ni za haki.

¹⁷³Mkono wako unisaidie, maana nimechagua maagizo yako.

¹⁷⁴Ninautamani wokovu wako, Yahwe, na sheria yako ni furaha yangu.