Zəbur 19:1-14

¹Musiqi rəhbəri üçün. Davudun məzmuru. Göylər Allahın əzəmətini bəyan edir, Göy qübbəsi əllərinin işini elan edir.

²Hər gün ertəsi günə nəql edir, Hər gecə o biri gecəyə bilik verir.

³Onların nə nitqi, nə də sözləri var, Onların səsləri eşidilmir.

⁴Amma avazları bütün dünyaya yayılır, Sözləri yerin ucqarlarına çatır. Allah günəş üçün göylərdə çadır qurur,

⁵Günəş gərdəyindən bəy kimi çıxır, Qaçışa çıxan bir igid kimi şad olur.

⁶Bir tərəfdən çıxır, göylərdə dövrə vurur, Heç nə istisindən gizlənə bilmir.

⁷Rəbbin qanunu kamildir, canı təzələyir, Rəbbin öyüdü etibarlıdır, nadanı müdrik edir.

⁸Rəbbin qayda-qanunları düzdür, ürəyi sevindirir, Rəbbin əmrləri pakdır, gözləri aydın edir.

⁹Rəbb qorxusu safdır, əbədi yaşayır, Rəbbin hökmləri haqdır, hamısı ədalətlidir.

¹⁰Onlar qızıldan, bol miqdarda olan saf qızıldan da çox sevilir, Onlar baldan, şanı balından da şirindir.

¹¹Bəndən bunlardan nəsihət alar, Onlara əməl edənin bol mükafatı var.

¹²Kim öz səhvlərini duya bilər? Məni gizli təqsirlərimdən təmizlə.

¹³Qulunu aşkar günahlardan qoru, Qoyma onların hökmü altında qalım. Onda kamilliyə çataram, Bütün itaətsizliklərdən ayrılaram.

¹⁴Ağzımdan çıxan sözlər, Qəlbimdəki düşüncələr Hüzurunda qəbul olunsun. Ya Rəbb, ey Qayam və Satınalanım!