Miti Mânec 19:1-14

¹Sambâŋ jaŋe Anuture eri tatamac mufuaeŋgopieŋ, meqâreŋ‐ticne qânikiŋzi musokaekac.

²Ʒoaŋ moczi ʒoaŋ âgone dâŋ qâmockecneekac, ŋafe moczi ŋafe âgone biŋe âzâcneekac.

³I mumac qamanac eene mâcne, me nazaŋ gazaŋ wâc arictac, marac fânâŋ hazeczi mi mamanane;

⁴eha sifu micfânâŋ‐jeŋiczi mâreŋ sâcke‐fâreekac, â dâŋjeŋiczi mâreŋ qaŋeŋnao fisiekac. Ira hâcne Anutuzi ʒoaŋ boze bacnewec.

⁵Eme eki socɋâri moczi ficticnaonec fahareekac irec sâc wefuekac, ehuc momori ŋic iŋucne hata‐ticne âteocte aŋackeekac.

⁶Wewefu‐ticne sambâŋ qaŋeŋnao wefuekac, â huhu‐ticne sambâŋ dowaŋnao huekac, â fâroroc‐ticnezi wiac moc mi bâtiriekac.

⁷Wofuŋte sâcmutâc dâŋ i qarâ biaŋ, maŋ qâqâtâc âke ɋâreekac; Wofuŋte mumutaniŋ dâŋ i fârine, ŋic maŋtac maŋɋârâŋ bacjopaekac;

⁸Wofuŋte muqâmoc dâŋ i fâretiŋ, ʒeri bubiaŋ bâfuaekac; Wofuŋte sâcmutâc sanaŋ i nanaŋ ʒurec ʒurecne, ŋicʒâŋe batamaeekac;

⁹Wofuŋ araŋ babacne i ɋaɋacne, dameŋ sâc fohuc juocmu; Wofuŋte mumutâc dâŋ i fâri fideteŋhec, erâ tiŋne sasawa.

¹⁰Erâ i gol sirickehuc furi sâko ekac, gol emataucke‐hâmokicne mâmâc sirickekac; erâ wâc baŋacte aŋac qâhucke‐fârekac, â bore wâc iŋuc jaha.

¹¹Dâŋ i sasawazi kiŋaŋŋicge nore uŋsawaŋ eekac wâc; moczi reŋkeocmu e furine fekicne roocmu.

¹²Erâ mozi bâbâsifuc‐ticne hone taraocmu? Bahac soŋne mutâmire‐narec.

¹³Maŋfefe bahac irec wâc sabecnuzemec, izi ŋicbomboŋ mi enarezejec. Eme no ŋicsaric juhuc, bahac ŋemâcne mi bâfuapemu.

¹⁴Go micbipic‐nanere dâŋ â maŋnanere mamanasu, i hone manac etec sâckezejec, o Wofuŋ, jâcnane â bâbâpiaŋ‐nane.