Waha Rara 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹“Eme ʒi Bezalele â Oholiabe erâ ŋic meafec gâcne gie iŋucne baniŋte Wofuŋzi maŋɋârâŋ â mamana tahac‐jopame furufic bapare fuŋne manaŋgopieŋ jaŋe sasawa Wofuŋzi mutâcnewec irec sâcko jâmbâŋ bafârenʒepieŋ.”

²Eme Mose e Bezalele â Oholiabe erâ ŋic meafec sasawa Wofuŋzi metâ bapare mamana tahac‐jopawec â maŋjeŋiczi gie i ware baniŋte qacfahac ejarewec jaŋe hefârec‐jopawec.

³Erâ Mose e Israe ŋic ŋokac jaŋe furufic bapare taha wiac bafisimbiŋ i jare‐fârewec, ehame ŋic ŋokac jaŋe furic sâc buafec jaha taha gâcne ʒuhuckerâ bafisihuc jumbiŋ.

⁴Irec metâ bapa furuficte gie bambiŋ jaŋe sasawa gie‐jeŋic bahuc jumbiŋ i beherâ

⁵Moserao fisirâ mumbiŋ, “Ŋic ŋokac jaŋe wiac bafisiŋgopieŋ i Wofuŋzi gie banaŋte muwec irec sâc sirickekac.”

⁶Iŋuc mupie Mosezi dâŋ ʒiŋuc râeme teuŋ sâcke‐fârewec: “Ŋic me ŋokac moczi furuficte taha wiac ʒuhuckerâ mocwâc mi bafisinʒepieŋ.” Iŋuc muhuc ŋic ŋokac wiac ʒuhuckerâ bafisinʒipiŋte aka hejarewec hâcne,

⁷i wiac bafisikicne izi giere sâc sirickewecte.

⁸Eme gie bambiŋ jaŋeraonec ŋic meafec sasawa jaŋe tiri boze i qoruc furi sâko fâfâsâc â keŋkeŋne â bâbâroŋ â âmuc âmucne 10 izi bambiŋ, ehuc qoruc i qâreŋnehec fupie kerubim hawari fuawec. I Bezalelezi iŋuc bawec.

⁹Qoruc moc i ʒoricne‐ticnere sâc kubi 28 â otecne‐ticnere sâc kubi 4, iŋuc bapie sâcjeŋic mocjaha efârewec.

¹⁰Eme e qoruc 5 jaŋe moc buc ʒuhuc‐jopawec â 5 jaŋe iŋuc jaha moc buc ʒuhuc‐jopawec.

¹¹Erâ e qoruc qaŋeŋnao jâmbâŋ qoruc furi sâko keŋkeŋnezi ʒâʒâficke muc barâ râewec â qoruc mocte qaŋeŋnao jâmbâŋ iŋuc jaha ewec.

¹²Qoruc mocte ʒâʒâfickere muc 50 â qoruc mocte qaŋeŋnao ʒâʒâfickere muc 50 jaha basanaŋkewec. Iŋuc eme ʒâʒâfickere muc i qoruc ŋifec â ŋifec sâckoa forawec.

¹³Erâ heheawic 50 golzi barâ izi qoruc heawic‐jofame tiri boze mocjaha fuawec.

¹⁴Erâ bupure qoruc 11 i noniŋ kanʒaŋnezi bawec.

¹⁵Qoruc buc buc ʒoricne‐jeŋicte sâc kubi 30 â otecne‐jeŋicte sâc kubi 4, qoruc 11 sâcjeŋic mocjaha hâcne.

¹⁶E qoruc 5 moc buc ʒâfic‐jopawec â qoruc 6 jaŋe iŋuc jaha moc buc ʒâfic‐jopawec.

¹⁷Erâ ʒâʒâfickere muc 50 i qoruc tataranere qaŋeŋnao râe rawec erâ ʒâʒâfickere muc 50 jaha i qoruc mocte qaŋeŋnao iŋuc jaha râe rawec.

¹⁸Erâ qoruc ʒuhucke itic eme mocjaha eocte aeŋ bâbâroŋzi heheawic 50 bawec.

¹⁹Erâ qoruc boze bupune i lama ŋicnere sahac peŋ bâbâroŋzi rikekicne â noniŋ sahacne izi bawec.

²⁰I tarame tiri bozere katapa hâŋ ââeckene jâmiŋzi fasaewec.

²¹Katapa ʒoricnere sâc kubi 10 â otecnere sâc kubi moc â nâfocne sasawa.

²²Katapa sasawa bareŋ‐jeŋic jajahec jajahec, i ʒuʒuhuc eniŋte tiri bozere katapa iŋuc sasawa bawec.

²³Tiri bozere katapa ine kecʒiŋuc bafârewec: Sâpene juwic mâreŋkopec irec biŋe 20,

²⁴erâ katapa 20 irec juwic tofanao siliwazi râqâc 40 bawec; katapa mocte bareŋne jajahec irec râqâc jajahec â katapa mocte bareŋne jajahec irec râqâc jajahec, iŋuczi iŋuc.

²⁵Erâ tiri bozere sâpene faic mâreŋkopec irec katapa 20

²⁶â siliwazi râqâc‐ticne 40 jaha, katapa mocte râqâc jajahec â katapa mocte râqâc jajahec jaha.

²⁷Tiri boze râpene, ʒoaŋ huhunaopec hâcne, irec katapa 6 fasaewec.

²⁸Erâ fic gurucne râpenao irec wâtuŋ jajahec fasaewec.

²⁹Eme wâtuŋ i juwic rârâwiŋ domahuc feku faic hoŋeŋeŋ micne fowecko iitic epic; gurucne jajahec irec wâtuŋ jajahec iŋuc hâcne bawec.

³⁰Katapa 8 i siliwazi râqâchec hâcne, mocte râqâc jajahec mocte jajahec, iŋuc râe rame 16 ewec.

³¹Eme jâmiŋzi babasanaŋ fasaewec, ine tiri bozere neŋgoc ŋifec 5,

³²â tiri bozere neŋgoc ŋifec 5, â râpene ʒoaŋ huhunaopec irec biŋe 5 jaha.

³³Eme babasanaŋ ʒâʒâŋiŋko fowec izi katapa ombâŋnao ŋifeckonec ware raku ŋifecko fisiwec.

³⁴Eme katapa sasawa golzi ɋorockewec, erâ babasanaŋte raraʒi, hoŋeŋeŋ hâcne i golzia bawec, â babasanaŋ i wâc iŋuc jaha golzi ɋorockewec.

³⁵Qoruc ââketâc ine qoruc furi sâko keŋkeŋne â âmuc âmucne â bâbâroŋ â fâfâsâc izi bawec, ehuc qâreŋnehec fume kerubiŋ hawari fuawec.

³⁶Erâ wâtuŋ‐ticne 4 jâmiŋzi fasaerâ golzi ɋorockewec; wâtuŋ heheawic‐ticne golzia bakicne â râqâc‐ticne ine siliwa rike sueŋkekicnezi bawec.

³⁷Qoruc boze motâcte qoruc i qoruc furi sâko keŋkeŋne â âmuc âmucne â bâbâroŋ â fâfâsâc izi bawec wâc, ehuc geroŋkewec.

³⁸Erâ wâtuŋ‐ticne 5 i heheawic‐ticnehec bawec. Wâtuŋ utune â otecne i golzi ɋorockewec â râqâcne ine aeŋ bâbâroŋzi wâc bawec.