1मिनु परमप्रभु यावेमी बेचालेल, ओहोली-आब नु अरु आन कली आ बाक्तीक सेल्चा, दे जोक्ब तुइक्ब नु रुप्तीक थुं गेशो मुर नेल्लेमी, परमप्रभु यावेमी देंशो खोदेंशो पा गेय पचा माल्नीम” दे मोसामी इस्राएली आन कली देंत।
2मिनु मोसामी, बेचालेल, ओहोली-आब नु परमप्रभुमी जोक्ब तुइक्ब सेल्शो मुर नेल्ल आन कली ब्रेत्ताक्नमी। सु सु आन थुंमी “गो यो मेको गेय पाइनुङ” दे मिम्शो बाक्मा, मेको आन कली यो ब्रेत्ताक्नमी।
3इस्राएलीपुकीमी परमप्रभु यावे आ बाक्तीक सेल्चा कली मार मार चाक्शो बाक्मा, आन थुंमी ग्येरशा गेशो नेल्ल मोसा आ गुइ रे ताक्तेक्म। मेना सम्म मुरपुकीमी सुनी कुस कुस मार मार चाक्स ङा चाक्स बाक्तेक्म।
4मिनु परमप्रभु यावे आ बाक्तीक सेल्ब जोक्ब तुइक्बपुकीमी आन गेय प्रोंइशा, मोसा आ बाक्तीक जाक्तेक्म।
5मिनु मेकोपुकीमी मोसा कली “परमप्रभु यावेमी अरेशो सेल्चा कली माल्शो क्येङा यो शुश चाक्ना चाक्न बाक्नीम” देंतेक्म।
6मिनु मोसामी “मुल रे परमप्रभु यावे आ बाक्तीक ङा गेय कली सुइम मारेइ मचाक्कीन” दे मुर आन बाक्तीक बाक्तीकेमी नेंपाइक्थ मुर सोइक्ताक्मी। मोपा मारेइ मचाक्कीन, दे आन चाक्चा नाइक्पाइक्तेक्म।
7मारदे हना आन चाक्शो मारेइ मारेइ गाप्शा, शुश दुम्शो बाक्त।
8मिनु जोक्ब गेय पाइब नेल्लेमी परमप्रभु यावे आ बाक्तीक कली १० ओटा सुम्तीक वा सेल्तेक्म। रिम्शो पा किरशो सुती श्येले के प्रोव़शो वा के नु नीलो, प्याजी नु लल रङ ङा श्येलेमी शुश रिम्शो करूबपुकी बुटा आप्शा सेल्तेक्म।
9मेको सुम्तीक वा का का पा २८ कुबीत दुइश्शो नु ४ कुबीत ब्रेम्शो, खाल का ङा पा सेल्तेक्म। कुबीत का ०.५ मिटर खोदेंशो बाक्ब।
10मेकोपुकीमी ५ ओटा सुम्तीक वा बोइश्शा, का सेल्तेक्म। मिनु अर्को ५ ओटा बोइश्शा, अर्को का सेल्तेक्म।
11सुम्तीक वा का आ एर सुर गे नीलो रङ ङा ५० ओटा बोइक्तीके सेल्तेक्म। अर्को सुम्तीक वा के यो ओंथ सुर गे ५० ओटा नीलो बोइक्तीक सेल्तेक्म।
12सुम्तीक वा कामी ५० ओटा बोइक्तीके नु अर्को सुम्तीक वा कली यो ५० ओटा बोइक्तीके सेल्शा, निक्शी कली का सेल्चा कली ठीक पा वोइक्तेक्म।
13मिनु मेकोपुकीमी ५० ओटा सुन के ग्याइक्पाइक्तीके सेल्शा, ङोंइती ङा नु नोले ङा सुम्तीक वा आस कली बोइश्शा, का सेल्तेक्म।
14परमप्रभु यावे आ बाक्तीक साप्चा कली यो क्यारश आ चां के ११ ओटा सुम्तीके सेल्तेक्म।
15मेको सुम्तीके का का पा ३० कुबीत लाइश्शो नु ४ कुबीत ब्रेम्शो खाल का ङा पा सेल्तेक्म। कुबीत का ०.५ मिटर खोदेंशो बाक्ब।
16मेकोपुकीमी का सेल्चा कली ५ ओटा सुम्तीके बोइश्शा का नु ६ ओटा सुम्तीके बोइश्शा अर्को का सेल्तेक्म।
17ङोंइती ङा सुम्तीके आ एर सुर गे ५० ओटा बोइक्तीक सेल्तेक्म। मिनु अर्को सुम्तीके आ ओंथ सुर गे यो ५० ओटा बोइक्तीक सेल्तेक्म।
18मिनु ताम्बु सुम्तीके का सेल्चा कली कांसा के ५० ओटा ग्याइक्पाइक्तीक सेल्तेक्म।
19मेकोपुकीमी ताम्बु सुम्चा कली लल रङ नुप्शो सांड आ कुशुल के सुम्तीक का सेल्तेक्म। मेको आ तारी नेल्ल क्येङा रिम्शो सेल्शो कुशुल के अर्को सुम्तीक का सेल्तेक्म।
20मिनु नोले मेकोपुकीमी परमप्रभु यावे आ बाक्तीक सेल्चा कली बोल्यो शी के फलेक सेल्शा, थारतेक्म।
21फलेक का का पा १० कुबीत लाइश्शो नु कुबीत का आधा ब्रेम्शो सेल्तेक्म। कुबीत का ०.५ मिटर, हात का खोदेंशो बाक्ब।
22फलेक का कामी, राप्पाइक्चा कली किला निक्शी गारपाइश्शा, सेल्तेक्म।। परमप्रभु यावे आ बाक्तीक सेल्चा कली फलेक नेल्ल मोदेंशो पा सेल्तेक्म।
23मिनु बाक्तीके आ दक्खिन गे कली २० ओटा फलेक सेल्तेक्म।
24मिनु मेको २० ओटा फलेक आन पुं गे, ४० ओटा चांदी के राप्पाइक्तीके, फलेक का कली राप्पाइक्तीके निक्शी सेल्तेक्म।
25उत्तर गे कली २० ओटा फलेक सेल्तेक्म।
26मेको आन कली ४० ओटा चांदी के राप्पाइक्तीके, फलेक का कली राप्पाइक्तीके निक्शी सेल्तेक्म।
27बाक्तीके आ पच्छिम गे कली ६ ओटा फलेक सेल्तेक्म।
28पच्छिम ङा सुर निक्शी कली, फलेक निक्शी सेल्तेक्म।
29मेकोपुकीम उइ रे ममाइ, इर गे मुन्द्रामी ग्याइक्पाइक्तेक्म।
30मोपा मेको नेल्ल ८ ओटा फलेक दुम्तेक्म। मिनु १६ ओटा चांदी के राप्पाइक्तीके, फलेक का कली राप्पाइक्तीक निक्शी दुम्त। प्रस्थान २६:-
31बोल्यो शी के लाइश्शो कोक्के सेल्तेक्म। परमप्रभु यावे आ बाक्तीक का पटटी कली फलेक ग्याइक्पाइक्चा कली ५ ओटा लाइश्शो कोक्के सेल्तेक्म।
32अर्को पटटी कली यो फलेक ग्याइक्पाइक्चा कली ५ ओटा लाइश्शो कोक्के सेल्तेक्म। आ नोले पच्छिम गे कली ५ ओटा लाइश्शो कोक्के सेल्तेक्म।
33मिनु फलेक ग्येत्थ आ दातेमी सुर का रे अर्को सुर सम्म कली लाइश्शो कोक्के सेल्तेक्म।
34मिनु फलेक नु लाइश्शो कोक्के आन कली सुनम गिल्तेक्म। मिनु लाइश्शो कोक्के शुइक्चा कली सुन के मुन्द्रापुकी सेल्तेक्म।
35मिनु नीलो, प्याजी नु लल श्येले नु रिम्शो पा किरशो सुती श्येले के प्रोव़शो वा के नेल्ल क्येङा चोव़खो कोठा फारतीक का सेल्शा, रिम्शो पा करूब बुटा आप्तेक्म।
36मेकोमी मेको फारतीक कली बोल्यो शी के ४ ओटा थाम सेल्शा, सुनम गिल्तेक्म। मेको आन ग्याइक्तीके सुन के सेल्तेक्म। मेको आन कली ४ ओटा चांदी के राप्पाइक्तीके सेल्तेक्म।
37मिनु नीलो, प्याजी नु लल श्येले नु रिम्शो पा किरशो सुती श्येले के प्रोव़शो वा दारशो बुटा आप्शो ताम्बु आ ओव़तीके कली फारतीक का सेल्तेक्म।
38मेको फारतीक ब्वेक्चा कली ५ ओटा थाम सेल्तेक्म। मेको आन पिया, ब्वेक्तीक नु हाम्तीक कोक्के सुनम गिल्तेक्म। मेको ५ ओटा थाम आन राप्पाइक्तीके चहिं कांसा के सेल्तेक्म।
